路加福音

18 耶穌又講咗個比喻，教導門徒要時刻禱告，唔好灰心放棄。 2 佢話：「有座城，裡面有一個審判官，佢唔敬畏上帝，亦都唔尊重人。 3 嗰座城有個寡婦，成日去見佢，同佢講：『我同嗰個人之間嘅案件，你一定要幫我主持公道呀。』 4 審判官一直都冇理佢，不過後嚟心諗：『雖然我唔敬畏上帝，亦都唔尊重人， 5 但係呢個寡婦成日嚟煩住我，我就為佢主持公道啦，費事佢一路纏住我，煩死我。』」 6 主話：「呢個審判官係唔正義嘅，但係你哋留意吓佢點樣講吖！ 7 上帝又點呢？雖然上帝一直表現耐心，但係佢揀選嘅人日夜向佢呼求，唔通佢唔會為佢哋主持公道咩？ 8 我話俾你哋知，上帝會迅速為佢哋主持公道。但係人子嚟到嘅時候，喺世上搵唔搵到有呢種信心嘅人呢？」

9 耶穌亦都對一啲人講咗個比喻，嗰啲人認為自己好正義，又睇唔起其他人。佢話： 10 「有兩個人上聖殿禱告，一個係法利賽派嘅人，一個係收稅人。 11 嗰個法利賽派嘅人企喺度，喺心入面禱告話：『上帝啊，我感謝你，我唔似得其他人噉，又敲詐、又不義、又通姦，更加唔似呢個收稅人。 12 我一星期禁食兩次，將得到嘅所有嘢都奉獻十分之一。』 13 而嗰個收稅人就離遠企喺度，連抬頭望天都唔敢，佢揼住心口話：『上帝啊，我係個罪人，求你開恩*。』 14 我話俾你哋知，呢個人離開聖殿返去嘅時候，喺上帝眼中，佢比嗰個法利賽派嘅人更加正義。因為邊個抬高自己，就會被貶低；邊個內心謙卑，就會被抬高。」

15 有人帶埋小朋友*去耶穌嗰度，請佢將手放喺佢哋身上*。門徒見到，就鬧嗰啲人。 16 不過耶穌就叫人帶啲小朋友*過嚟，佢話：「俾啲小朋友嚟我呢度，唔好阻止佢哋，因為上帝嘅王國係屬於好似小朋友嘅人。 17 我可以好肯定噉同你哋講，邊個唔係好似小朋友一樣接受上帝嘅王國，就絕對唔能夠進入呢個王國。」

18 有個民間嘅首領問耶穌：「良善嘅老師，我要做啲乜嘢先可以得到永遠嘅生命呢？」 19 耶穌同佢講：「點解你要話我係良善嘅呢？除咗上帝一位，冇人稱得上係良善嘅。 20 你都知道呢啲誡命，就係：唔可以通姦，唔可以殺人，唔可以偷竊，唔可以作偽證，要孝敬父母。」 21 佢話：「呢啲誡命我自細就有遵守㗎啦。」 22 耶穌聽到之後，就同佢講：「你仲有一樣嘢要做，就係賣晒自己擁有嘅嘢，將得到嘅錢分俾窮人，噉樣你就有財寶喺天上；你亦都要做我嘅門徒。」 23 佢聽到耶穌噉講，就好唔開心，因為佢好有錢。

24 耶穌望住佢，就話：「有錢人要進入上帝嘅王國，係幾咁難呢！ 25 其實，駱駝穿過針眼，仲容易過有錢嘅人進入上帝嘅王國呀！」 26 聽到佢噉講嘅人就話：「噉仲有冇人可以得救呀？」 27 耶穌話：「對人嚟講冇可能嘅事，上帝都能夠做到。」 28 彼得話：「你睇，我哋已經揼低晒所有嘢嚟跟隨你嘞。」 29 耶穌同佢哋講：「我好肯定噉同你哋講，如果人為咗上帝嘅王國，捨棄咗房屋、太太、兄弟、父母或者仔女， 30 喺而家一定會得到更多，喺將來嘅制度*亦都會得到永遠嘅生命。」

31 耶穌同十二使徒行埋一邊，同佢哋講：「睇吓！而家我哋上去耶路撒冷，以前啲先知寫低關於人子嘅事，都會實現。 32 例如佢會俾人交俾外族人，俾人戲弄、侮辱同埋吐口水。 33 嗰啲人會鞭打佢，殺害佢，不過第三日佢會復活。」 34 但係使徒完全聽唔明。因為呢啲說話嘅意思對佢哋嚟講係隱藏嘅，佢哋唔理解耶穌講緊乜嘢。

35 耶穌行近耶利哥嘅時候，有個盲人坐喺路邊乞食。 36 嗰個盲人聽到有一班人經過，就問發生咩事。 37 有人話佢知：「係拿撒勒人耶穌經過呀！」 38 佢就大嗌：「大衛嘅子孫耶穌，可憐吓我啦！」 39 行喺前面嘅人就鬧佢，叫佢唔好出聲，點知佢就嗌得更加大聲：「大衛嘅子孫，可憐吓我啦！」 40 耶穌就停低，叫人將盲人帶到佢面前。個盲人行近，耶穌就問佢： 41 「你想我為你做啲乜嘢呢？」佢話：「主啊，求你令我睇到嘢啦。」 42 耶穌同佢講：「你恢復視力啦。你嘅信心令你好返嘞。」 43 佢即刻恢復返視力，就跟隨耶穌，榮耀*上帝。見到嘅人全部都讚美上帝。