路加福音

15 收稅人同罪人全部都聚集喺耶穌周圍，聽佢講說話。 2 法利賽派同抄經士就細細聲噉議論話：「呢個人居然樂意接待罪人，同佢哋一齊食飯。」 3 於是耶穌同佢哋講咗個比喻： 4 「你哋當中邊個有100隻綿羊，走失咗一隻，唔會將99隻留喺曠野，去搵走失嗰隻，直到搵到呢？ 5 佢搵到嘞，就將隻羊放喺膊頭度，非常開心。 6 佢返到屋企，就請朋友同鄰居嚟，同佢哋講：『同我一齊慶祝吖，因為我已經搵返嗰隻走失嘅綿羊。』 7 我話俾你哋知，同樣，一個悔改嘅罪人，會比99個唔使悔改嘅義人，為天上帶嚟更大嘅喜樂。

8 「再舉個例，一個女人有十個銀幣*，唔見咗一個，點會唔點燈打掃間屋，細心噉搵，直到搵到呢？ 9 佢搵到之後，就請自己啲朋友*同鄰居嚟，話：『同我一齊慶祝吖，因為我已經搵返嗰個唔見咗嘅銀幣。』 10 我話俾你哋知，上帝嘅天使都同樣為一個悔改嘅罪人喜樂。」

11 耶穌又話：「有個人有兩個仔。 12 細仔同爸爸講：『爸爸，請將我應得嘅嗰份財產俾我。』爸爸就將家產分俾佢哋。 13 只係過咗幾日，細仔就帶晒所有嘢，去咗一個好遠嘅國家。佢喺嗰度過住放縱嘅生活*，揮霍晒自己啲財產。 14 使晒啲錢之後，嗰度有大饑荒，佢就咩都冇晒， 15 唯有投靠當地一個居民。嗰個人叫佢去野外嘅一塊地度放豬。 16 佢好肚餓，餓到想攞豬食嘅嘢*嚟充飢，不過就冇人願意俾嘢佢食。

17 「佢醒悟之後，就話：『我爸爸有咁多工人*，個個都有充足嘅食物，但係我就要喺呢度餓死！ 18 我要起程返去爸爸嗰度，同佢講：「爸爸，我得罪咗天，亦都得罪咗你。 19 我唔再配稱為你個仔嘞。你就當我係一個工人*啦。」』 20 於是，佢起程返去爸爸嗰度。佢仲未到屋企，爸爸離遠見到，就好可憐佢，跑過去攬住佢，親切噉錫佢。 21 個仔同佢講：『爸爸，我得罪咗天，亦都得罪咗你。我唔再配稱為你個仔嘞。』 22 不過爸爸就同奴隸講：『快啲拎最靚嗰件袍出嚟，幫佢著，幫佢戴戒指同著鞋。 23 仲要拉嗰隻肥美嘅公牛犢嚟劏咗佢，我哋要食餐好嘅慶祝吓， 24 因為我呢個仔係死而復生、失而復得㗎。』佢哋就開始歡樂慶祝。

25 「大仔當時喺田度。佢返嚟，就到屋企嗰陣，聽到音樂同跳舞嘅聲音， 26 就叫個僕人嚟，問佢發生緊咩事。 27 僕人同佢講：『你細佬返咗嚟。你爸爸見佢平安無事噉返嚟，就劏咗嗰隻肥美嘅公牛犢。』 28 佢就好嬲，唔肯入去。爸爸就出嚟勸佢。 29 佢同爸爸講：『咁多年嚟我一直好似奴隸噉幫你做嘢，從來冇唔聽你嘅吩咐，不過你連一隻山羊仔都冇俾過我，等我同啲朋友一齊享用。 30 但係你呢個仔同妓女一齊揮霍晒*你啲家產，而家佢一返嚟，你就為咗佢劏咗嗰隻肥美嘅公牛犢。』 31 爸爸同佢講：『阿仔啊，你一直同我一齊，我嘅所有嘢都係你㗎， 32 而你呢個細佬係死而復生、失而復得㗎，我哋好應該開開心心，慶祝佢返嚟。』」