馬太福音

9 耶穌上咗船，去到對面岸，入咗去自己嘅城。 2 當時有人用擔架抬住一個癱瘓嘅人去見耶穌。耶穌見到佢哋咁有信心，就同嗰個癱瘓嘅人講：「放心啦，阿仔！你嘅罪赦免嘞。」 3 有啲抄經士心諗：「呢個人講埋晒啲褻瀆嘅說話。」 4 耶穌知道佢哋諗緊啲乜嘢，就話：「點解你哋心裡面諗住啲咁邪惡嘅嘢呢？ 5 其實講『你嘅罪赦免嘞』係好容易㗎。但係有邊個可以同呢個人講『起身，行啦』，然後佢真係可以起身行到路呢？ 6 不過，為咗令你哋知道人子喺地上有權赦罪——」耶穌就同癱瘓嘅人講：「起身，拎起你嘅擔架，返屋企啦。」 7 嗰個人就起身，返屋企嘞。 8 民眾見到呢件事就非常驚嘆，讚美*上帝，因為佢俾咗噉樣嘅權力人。

9 耶穌離開嗰度之後，喺路上佢見到一個人坐喺收稅嘅地方，佢叫做馬太，耶穌同佢講：「嚟跟隨我吖。」馬太就企起身，跟隨佢嘞。 10 後嚟，耶穌喺馬太嘅屋企食飯嗰陣，有好多收稅人同埋罪人嚟到，同耶穌仲有佢嘅門徒一齊食飯。 11 法利賽派嘅人見到，就同耶穌嘅門徒講：「乜你哋嘅老師同埋啲收稅人仲有罪人一齊食飯㗎？」 12 耶穌聽到就話：「健康嘅人唔需要醫生，病咗嘅人就需要嘞。 13 經文話『我想人表現憐憫，而唔係獻祭俾我。』你哋諗吓呢句說話嘅意思啦。因為我嚟，唔係想叫啲正義嘅人*悔改，而係想罪人悔改。」

14 約翰嘅門徒嚟問耶穌：「點解我哋同法利賽派嘅人有禁食嘅習慣，但係你嘅門徒就唔禁食呢？」 15 耶穌就同佢哋講：「當新郎仲同啲朋友一齊嘅時候，新郎嘅朋友冇理由哀悼吖，係咪？但係，時候會到，新郎會俾人帶走，離開佢哋，噉到時佢哋就會禁食嘞。 16 冇人會將新嘅布補喺舊嘅衫上面，因為新布一縮水，就會扯爛件衫，噉反而爛得更加犀利， 17 亦都冇人會將新酒裝落舊皮袋裡面，如果噉做，就會掙爆個皮袋，噉唔單止酒漏出嚟，連個皮袋都唔用得嘞。所以，啲人會將新酒裝落去新皮袋入面，噉兩樣都可以好好保存。」

18 耶穌仲同佢哋講緊嘢嘅時候，有個會堂主管嚟到，向耶穌下拜，話：「睇怕我個女而家已經死咗。但係，你嚟我屋企，將手放喺佢身上面，佢就會有返生命㗎喇。」

19 於是耶穌就起身跟佢走，門徒亦都跟住去。 20 有個患咗流血病症*12年嘅女人，行去耶穌背後，掂一掂佢外衣嘅穗邊。 21 嗰個女人一直喺度諗：「只要我掂吓佢嘅外衣，就可以好返㗎喇。」 22 耶穌擰轉身見到佢，就同佢講：「放心啦，阿女！你嘅信心令你好返。」嗰個時候，個女人就好返嘞。

23 耶穌去到會堂主管嘅屋企，見到有人吹奏緊哀悼嘅音樂*，又有一大班人喊得好大聲， 24 耶穌話：「你哋出去啦，個細路女冇死到，只係瞓著咗啫。」啲人聽到就笑佢。 25 大家出晒去之後，耶穌就入去，捉住個女仔隻手，個女仔就起身嘞。 26 於是，呢個消息傳遍嗰一帶。

27 耶穌離開嗰度，有兩個盲人跟住佢，大聲嗌：「大衛嘅子孫，可憐吓我哋吖！」 28 跟住，耶穌入咗一間屋，嗰兩個盲人行到佢面前，耶穌問佢哋：「你哋相唔相信我可以醫返好你哋呀？」佢哋答：「主啊，我哋信。」 29 於是耶穌摸一摸佢哋對眼，話：「你哋咁有信心，就成全你哋啦。」 30 佢哋就睇到嘢嘞。耶穌鄭重噉吩咐佢哋，話：「唔好話俾任何人知呢件事。」 31 但係佢哋出去之後，就將耶穌做嘅事喺嗰一帶傳開去。

32 佢哋準備走嘅時候，有人將一個啞嘅人帶去耶穌面前，呢個人俾邪靈操縱。 33 耶穌將邪靈由佢身上趕出嚟，嗰個人就講到嘢嘞。周圍啲人都好驚訝，話：「喺以色列從來都冇見過噉樣嘅事呀。」 34 不過，法利賽派嘅人就話：「佢靠住邪靈嘅首領，先至驅逐到邪靈啫。」

35 耶穌出發周遊各城各村，喺會堂入面教導人，傳講王國嘅好消息，醫好各種各樣嘅病症。 36 耶穌見到啲民眾，就好同情佢哋，因為佢哋俾人剝削，無依無靠，好似冇牧人嘅綿羊一樣*。 37 於是耶穌同啲門徒講：「要收割嘅農作物*真係好多，但係工人實在太少嘞。 38 所以，你哋要懇求農作物嘅主人，派工人出去收割佢嘅農作物。」