路加福音

16 耶穌同門徒講：「有一個富翁，佢有個管家，有人指控呢個管家浪費富翁嘅財物。 2 富翁叫管家嚟，同佢講：『我聽人講，你做咗啲唔好嘅事，將你做管家負責嘅帳目交出嚟。你唔使再管理呢個家嘞。』 3 管家心諗：『主人唔俾我做管家嘞，點算呢？鋤地又唔夠力，乞食又怕尷尬。 4 吖！我知可以點做嘞，噉就算我俾人炒咗，冇得做管家，都有人接待我去佢哋屋企。』 5 管家就逐一叫欠佢主人債嘅人過嚟，同第一個講：『你爭我主人幾多呀？』 6 佢話：『100桶*橄欖油。』管家話：『拎返你嘅借據，坐低，快啲改成50桶。』 7 管家又同另一個講：『你呢？你爭咗幾多呀？』佢話：『100袋*小麥。』管家話：『拎返你嘅借據，改成80袋。』 8 主人就稱讚管家，話佢雖然唔正義，但係有實用嘅智慧*。呢個世界嘅人*喺處理世俗事務方面，比崇拜上帝嘅人*更有實用嘅智慧。

9 「我話俾你哋聽，要用呢個不義世界嘅錢財結交朋友。噉樣，到錢財冇用嘅時候，佢哋就可以接你哋去永恆嘅居所。 10 人喺最細微嘅事上忠心，喺好多事上都忠心；人喺最細微嘅事上不義，喺好多事上都不義。 11 如果你哋用不義世界嘅錢財嗰陣唔忠心，邊個會將真正嘅財富託付俾你哋呢？ 12 如果你哋喺用其他人嘅嘢嗰陣唔忠心，邊個仲會將本來要俾你哋嘅嘢交俾你哋呢？ 13 一個僕人唔能夠做兩個主人嘅奴隸，佢唔係憎恨*呢個，鍾意另一個，就係對呢個忠心，睇唔起另一個。你哋唔能夠又做上帝嘅奴隸，又做財富嘅奴隸。」

14 法利賽派一向都好貪錢。佢哋聽到耶穌噉講，就嘲笑耶穌。 15 耶穌同佢哋講：「你哋做嘅嘢係想人覺得你哋好正義，但係上帝知道你哋嘅內心係點。其實受世人尊崇嘅，反而係上帝厭惡嘅*。

16 「法典同先知書一直受到宣揚，直到約翰傳道嘅日子。由嗰陣時開始，上帝王國嘅好消息就受到宣揚，各種各樣嘅人都向住上帝嘅王國奮力前進。 17 其實，就算天地消逝，法典上嘅一筆一畫*都唔會消失，全部都會實現。

18 「邊個同太太離婚*，娶另一個女人，就係通姦；邊個娶咗同丈夫離婚*嘅女人，亦都係通姦。

19 「有一個富翁，著嘅係紫色衫*同用細麻做嘅衫，佢日日享樂，生活奢侈。 20 有個乞衣叫拉撒路，佢全身皮肉潰爛，經常俾人帶去富翁門口。 21 為咗充飢，佢好想食富翁張枱上面跌落嚟嘅碎屑。甚至有啲狗會嚟舔佢潰爛嘅皮肉。 22 後嚟個乞衣死咗，天使就帶佢去亞伯拉罕身邊*。

「富翁亦都死咗，俾人埋葬咗。 23 喺墳墓*入面，佢好痛苦，佢岳高頭，離遠見到亞伯拉罕同亞伯拉罕身邊*嘅拉撒路， 24 就大聲話：『我嘅祖先*亞伯拉罕啊，可憐吓我啦！我喺熊熊烈火入面好痛苦呀。求你派拉撒路用指尖點啲水，滴落我條脷，等條脷涼啲啦。』 25 亞伯拉罕話：『仔啊，唔好忘記你一生享福，而拉撒路就受咗唔少苦。佢而家喺呢度得到安慰，而你就好痛苦。 26 再加上喺你我之間隔咗個鴻溝，要由呢度過去你哋嗰度係唔可能嘅，要喺你哋嗰度過嚟呢度都係唔可能嘅。』 27 富翁話：『既然係噉，我嘅祖先啊，求你派拉撒路去我爸爸屋企。 28 因為我有五個兄弟，佢可以向佢哋徹底作見證，噉佢哋就唔使嚟到呢個痛苦嘅地方。』 29 亞伯拉罕話：『佢哋有摩西同先知寫嘅說話可以聽從吖。』 30 富翁話：『我嘅祖先亞伯拉罕啊，佢哋唔會聽㗎。但係如果有死人復活，去到佢哋嗰度，佢哋就會悔改嘞。』 31 亞伯拉罕同佢講：『如果佢哋唔聽從摩西同埋先知寫嘅說話，就算有死人復活，都說服唔到佢哋㗎。』」