約翰福音

1 最初就有一位叫做「話語*」，「話語」同上帝喺一齊，「話語」係一個神*。 2 佢最初就同上帝喺一齊。 3 所有嘢都係通過佢而有㗎，如果唔係通過佢，就冇任何一樣嘢存在。

4 生命係通過佢而有㗎，佢嘅生命係人類嘅光。 5 光喺黑暗入面照耀，但係黑暗唔能夠戰勝光。

6 有一個人叫做約翰，佢奉派嚟代表上帝。 7 佢嚟係要為光作見證，令各種各樣嘅人都因為佢嘅見證而相信。 8 佢唔係光，而係為光作見證嘅。

9 當時，照亮各種各樣嘅人嘅真光，就快嚟到世人當中嘞。 10 世人係通過佢而有嘅，不過佢喺世上嘅時候，世人唔承認*佢。 11 佢嚟到自己嘅地方，自己人竟然唔接納佢。 12 但係，所有接納佢嘅人，因為信從佢，佢都令佢哋有權成為上帝嘅兒女。 13 佢哋係從上帝而生，唔係從人*而生嘅，唔係因為父母*嘅意思而生，亦唔係因為任何人嘅意思而生嘅。

14 「話語」成為咗肉身，住喺我哋當中，我哋都見過佢嘅榮耀，呢種榮耀係從爸爸嗰度嚟嘅獨生子嘅榮耀。佢充滿上帝嘅恩典*同埋真理。 15 （約翰為佢作見證，甚至大聲話：「佢就係我講嘅嗰個人，我講過：『喺我後面嚟嘅，超越咗我，去到我前面，因為喺我存在之前，佢就存在嘞。』」） 16 因為佢充滿恩典，我哋人人都從佢嗰度領受咗分外恩典，而且係源源不絕嘅。 17 法典係通過摩西賜下嘅，而分外恩典同真理就係通過耶穌基督而嚟嘅。 18 從來冇人見過上帝，只有喺天父身邊*獨生嘅神，先至清楚說明咗佢係點樣嘅。

19 以下係約翰作嘅見證。當時猶太人由耶路撒冷派祭司同利未族人嚟見佢，問佢：「你到底係邊個？」 20 佢冇迴避問題，反而坦白噉話：「我唔係基督。」 21 佢哋問約翰：「噉你究竟係邊個？係咪以利亞？」佢話：「我唔係。」「你係咪嗰個先知呀？」佢答：「唔係！」 22 佢哋繼續問：「你到底係邊個？講啦，噉我哋就可以匯報俾派我哋嚟嘅人聽。你話你自己係邊個吖？」 23 佢話：「先知以賽亞講過，喺曠野有人大聲話：『要喺耶和華*前面為佢開路。』我就係嗰個人。」 24 呢啲人係法利賽派嘅人派嚟嘅。 25 佢哋問約翰：「既然你唔係基督，唔係以利亞，亦都唔係嗰位先知，噉點解你幫人施浸呀？」 26 約翰回答佢哋：「我係用水為人施浸嘅。但係有一個人喺你哋當中，係你哋唔認識㗎， 27 佢係喺我後面嚟嘅，我連幫佢解開鞋帶都唔配。」 28 呢啲事喺約旦河對岸嘅伯大尼發生，約翰就係喺嗰度為人施浸嘅。

29 第二日，約翰見到耶穌向佢行過嚟，就話：「睇吓，係上帝嘅綿羊羔呀，係除去世人嘅罪㗎！ 30 佢就係我講嘅嗰位，我講過：『有一個人喺我後面嚟，佢超越咗我，去到我前面，因為喺我存在之前，佢就存在嘞。』 31 我以前唔認識佢，但係我嚟用水為人施浸，就係要令以色列知道佢係邊個。」 32 約翰又作見證話：「我見到神聖力量好似隻鴿噉從天而降，留喺佢身上。 33 我以前唔認識佢，但係派我嚟用水施浸嘅嗰位同我講：『你見到神聖力量降下，留喺邊個身上，邊個就係用神聖力量為人施浸㗎嘞。』 34 我已經見到，又作咗見證，呢位就係上帝嘅仔。」

35 之後嗰日，約翰再企喺嗰度，同兩個門徒一齊， 36 佢見到耶穌經過，就話：「睇吓，係上帝嘅綿羊羔呀！」 37 兩個門徒聽到佢噉樣講，就跟喺耶穌後面。 38 耶穌擰轉身見到佢哋跟喺後面，就問佢哋：「有咩事呢？」佢哋話：「拉比（翻譯出嚟，意思就係『老師』），你住喺邊呀？」 39 耶穌話：「嚟吖，一齊去睇吓！」於是佢哋去睇耶穌住嘅地方，當日就留喺佢嗰度。嗰陣大約係下晝4點*。 40 聽到約翰嘅說話而跟隨耶穌嘅嗰兩個人，其中一個係西門·彼得嘅兄弟安得烈。 41 安得烈首先去搵自己兄弟西門，同佢講：「我哋搵到彌賽亞喇。」（「彌賽亞」翻譯出嚟就係「基督*」。） 42 安得烈帶佢去見耶穌。耶穌望住佢話：「你係約翰嘅仔西門，你要叫做磯法。」（「磯法」翻譯成希臘語就係「彼得」。）

43 之後嗰日，耶穌想去加利利。耶穌見到腓力，同佢講：「嚟做我嘅門徒吖。」 44 腓力嚟自伯賽大城，嗰度係安得烈同彼得嘅家鄉。 45 腓力搵到拿但業，同佢講：「我哋搵到摩西法典同埋先知書提到嘅嗰位嘞，就係約瑟嘅仔，拿撒勒人耶穌。」 46 不過拿但業同腓力講：「拿撒勒出到啲咩好嘢呀？」腓力同佢講：「嚟睇吓啦。」 47 耶穌見拿但業向住佢行過嚟，就話：「睇吓，呢個係真正嘅以色列人，心入面冇詭詐。」 48 拿但業同耶穌講：「你點會識我嘅？」耶穌回答話：「當你喺無花果樹下面，腓力都仲未叫你嚟，我已經見到你嘞。」 49 拿但業就話：「老師*，你係上帝嘅仔，你係以色列嘅王。」 50 耶穌就話：「係咪因為我話，我見到你喺無花果樹下面，你就信呢？你會見到更奇妙嘅事。」 51 耶穌又同佢講：「我可以好肯定噉同你哋講，你哋會見到天打開，上帝嘅天使升上降下，嚟到人子*呢度。」

2 第三日，喺加利利嘅迦拿有人舉行婚宴，耶穌嘅媽媽喺嗰度。 2 耶穌同門徒都受到邀請去參加婚宴。

3 後嚟啲酒唔夠，耶穌嘅媽媽同佢講：「佢哋冇晒酒嘞。」 4 耶穌就話：「呢件事同我哋有乜嘢關係呢？*我嘅時候仲未到。」 5 佢嘅媽媽就同僕人講：「佢叫你哋做咩就照做啦。」 6 嗰度有六個石造嘅水缸，係按照猶太人對潔淨嘅規定擺喺嗰度嘅，每個可以裝兩三桶水*。 7 耶穌同僕人講：「將啲水缸裝滿水吖。」佢哋就裝滿啲水缸，滿到缸口。 8 之後，耶穌同佢哋講：「而家𢳂一啲上嚟，拎去俾宴席主管吖。」佢哋就攞去嘞。 9 宴席主管試一試用水變成嘅酒，不過佢唔知道啲酒係喺邊度嚟嘅，而𢳂水上嚟嘅僕人當然知道。宴席主管就去搵新郎， 10 同佢講：「人人都係拎啲靚嘅酒出嚟先，到大家醉醉哋嘞，先至拎啲冇咁靚嘅酒出嚟。但係你就反而將啲靚酒留到而家。」 11 耶穌喺加利利嘅迦拿做嘅呢件事，係佢施行嘅第一個神跡，顯示咗佢嘅力量*。佢嘅門徒就信從咗佢。

12 呢件事之後，耶穌同佢嘅媽媽、細佬，仲有門徒，落到去迦百農，但係佢哋喺嗰度唔係住咗好耐。

13 猶太人嘅逾越節就到嘞，耶穌就上耶路撒冷。 14 佢發現聖殿入面有啲人喺度賣牛羊同埋鴿，仲有啲換錢商人坐喺度。 15 佢就拎繩索做鞭，將牛羊同嗰啲販賣牛羊嘅人由聖殿趕出去，仲令兌錢商啲錢幣散落一地，又推冧佢哋啲枱。 16 佢對賣鴿嘅人話：「將呢啲嘢攞走！唔好再將我爸爸嘅聖殿當成做買賣嘅地方*！」 17 佢啲門徒就諗起聖經講過：「我為你嘅殿宇大發熱心，好似內心有火燃燒。」

18 於是猶太人同佢講：「你可以顯咩神跡俾我哋睇，證明你有權做呢啲事呀？」 19 耶穌答佢哋：「你哋拆毀呢座聖殿，我會喺三日之內起返佢。」 20 猶太人就話：「呢座聖殿用咗46年先起好，你三日之內就可以起返佢咩？」 21 佢講嘅聖殿，其實係指佢嘅身體。 22 耶穌死而復生之後，佢嘅門徒諗起佢曾經噉樣講過，就相信聖經同埋耶穌講嘅說話。

23 耶穌喺耶路撒冷過逾越節嗰陣，好多人睇見佢施行嘅神跡，就開始相信佢*。 24 但係耶穌冇完全信任佢哋，因為佢了解佢哋所有人， 25 亦都因為佢唔需要任何人話俾佢知其他人嘅諗法。佢本來就洞悉人心。

3 有一個人叫尼哥德慕，屬於法利賽派，係猶太人嘅一個首領。 2 呢個人夜晚嚟見耶穌，同佢講：「老師*，我哋知道你係上帝派嚟嘅導師，因為人冇上帝嘅幫助*，就唔能夠施行你嗰啲神跡。」 3 耶穌就話：「我可以好肯定噉同你講，邊個唔再次出生*，就唔能夠見到上帝嘅王國。」 4 尼哥德慕同佢講：「一個人長大成人嘞*，點可能再次出世呢？唔通佢可以返去媽媽個肚度再出世咩？」 5 耶穌就話：「我好肯定噉同你講，邊個唔係從水同神聖力量而生，就唔能夠進入上帝嘅王國。 6 由人*所生嘅就係人嘅仔女*，從神聖力量*而生嘅就係上帝嘅仔女*。 7 唔好因為我同你講『你哋一定要再次出生』，就覺得驚訝。 8 風想吹去邊，就去邊。你聽到風嘅聲音，不過就唔知道風喺邊度嚟，會去邊度。所有從神聖力量而生嘅，都係噉樣。」

9 尼哥德慕問：「點可能有噉樣嘅事呢？」 10 耶穌就話：「你係以色列人嘅導師，點解唔知道呢啲事呢？ 11 我好肯定噉同你講：我哋所講嘅，係我哋知道嘅；我哋作見證嘅，係我哋睇到嘅。但係你哋就唔接受我哋嘅見證。 12 如果我同你哋講地上嘅事，你哋都唔信，噉我同你哋講天上嘅事，你哋又點會信呢？ 13 除咗從天而降嘅人子，冇人升過天。 14 正如摩西喺曠野將蛇舉起，同樣人子都一定會被舉起*， 15 等所有相信佢嘅人都有永遠嘅生命。

16 「上帝好愛世上嘅人，甚至將自己嘅獨生子賜俾人，等所有信從*佢嘅人都唔會滅亡，反而得到永遠嘅生命*。 17 因為上帝派自己個仔嚟到世人當中，唔係要佢審判世人，而係要世人通過佢得救。 18 信從佢嘅，就唔會被定罪。唔信從嘅，就已經被定罪，因為佢唔信從上帝嘅獨生子*。 19 光嚟到世人當中，但係人因為自己做嘅事邪惡，就愛黑暗而唔愛光，呢個就係佢哋被審判嘅理由。 20 作惡嘅人憎恨光，唔嚟光呢度，因為佢哋怕自己做嘅事被揭露出嚟*， 21 而實踐真理嘅，就會嚟光呢度，噉就表明佢係按照上帝嘅旨意去做。」

22 之後，耶穌同門徒去咗猶地亞嘅鄉村地區。喺嗰度，佢花咗啲時間同門徒一齊，亦都為人施浸*。 23 約翰都喺撒琳附近嘅艾嫩為人施浸，因為嗰度水量充足。民眾都去佢嗰度受浸。 24 當時約翰仲未俾人韞入監。

25 約翰嘅門徒同一個猶太人爭論點樣做先算係潔淨。 26 於是，佢哋嚟同約翰講：「老師*，以前同你一齊喺約旦河對岸嗰個人，即係你為佢作見證嗰個，你睇，而家佢都施浸，所有人都去晒佢嗰度喇。」 27 約翰就話：「如果唔係天上賜下嘅，人就咩都得唔到。 28 你哋可以作證，我講過：『我唔係基督，不過上帝派我喺佢之前嚟到。』 29 娶新娘嘅係新郎。但係新郎嘅朋友企喺旁邊，聽到新郎講嘅嘢，就好開心。所以，我已經開心到不得了*。 30 佢一定會越嚟越昌盛，而我就越嚟越衰微。」

31 嗰位從上面嚟嘅，喺所有人之上。從地上嚟嘅，只不過係從地上嚟嘅，講嘅都只係地上嘅事。嗰位從天上嚟嘅，喺所有人之上。 32 佢為睇到聽到嘅事作見證，只係冇人相信佢嘅見證。 33 相信佢見證嘅人，就好似扱咗印*去確認上帝講嘅都係真理。 34 上帝派嚟嘅嗰位講嘅係上帝嘅說話，因為上帝毫無保留噉賜下神聖力量。 35 天父愛呢個仔，已經將一切都交喺佢嘅手。 36 信從上帝嘅仔，就有永遠嘅生命；唔服從上帝嘅仔，就唔會得到生命，上帝嘅憤怒會一直喺佢身上。

4 主知道法利賽派聽到佢*嘅門徒比約翰多，亦都為更多人施浸。 2 （其實唔係耶穌親自施浸，而係佢嘅門徒施浸。） 3 主知道呢件事，就離開猶地亞，再次去加利利。 4 不過佢一定要經過撒馬利亞， 5 於是嚟到撒馬利亞嘅一座城。呢座城叫敘加，近住雅各俾佢個仔約瑟嘅嗰塊地， 6 雅各井*就喺嗰度。耶穌因為旅途而好攰，就坐喺個井側邊。當時大約係中午12點*。

7 有一個撒馬利亞女人嚟打水。耶穌同佢講：「請俾啲水我飲吖。」 8 （佢嘅門徒入咗城買嘢食。） 9 撒馬利亞女人同耶穌講：「你係猶太人，做咩問我呢個撒馬利亞女人攞水飲呢？」（原來猶太人同撒馬利亞人之間冇來往。） 10 耶穌答佢：「如果你知道上帝俾人嘅恩賜*係乜嘢，又知道同你講『請俾啲水我飲』嘅係邊個，你就會求佢，佢都會俾活水你。」 11 個女人話：「你連打水嘅桶都冇*，個井又深，你喺邊度攞到呢種活水呀？ 12 呢口井係我哋嘅祖先雅各留俾我哋嘅，佢自己同啲仔、家畜都飲呢口井嘅水，唔通你仲大過佢咩？」 13 耶穌回答話：「飲呢啲水嘅人，之後仲係會口渴嘅。 14 但係邊個飲咗我俾嘅水，就永遠都唔會口渴。我俾嘅水會喺人裡面成為泉源，不斷有水湧出嚟，令人得到永遠嘅生命。」 15 嗰個女人話：「請你俾呢種水我*，噉我就唔會再口渴，亦都唔使成日嚟呢度打水喇。」

16 耶穌同佢講：「去搵你嘅老公，帶埋佢嚟呢度吖。」 17 佢就話：「我冇老公㗎。」耶穌話：「你話你冇老公，講得啱。 18 因為你同過五個男人結婚，而家同你一齊住嘅人唔係你嘅老公。所以你頭先講嘅係真嘅。」 19 佢話：「我睇出你係個先知*。 20 我哋嘅祖先喺呢座山上面崇拜上帝，但係你哋就話，崇拜嘅地方應該喺耶路撒冷。」 21 耶穌同佢講：「相信我*，時候就快到嘞，你哋崇拜天父，唔會喺呢座山，亦都唔會喺耶路撒冷。 22 你哋崇拜嘅，你哋唔認識；我哋崇拜嘅，我哋認識，因為拯救係從猶太人開始嘅*。 23 不過，時候就快到嘞，其實而家就係，真正崇拜天父嘅人會喺神聖力量嘅引導下*，按照真理崇拜佢，因為天父搵緊噉樣嘅人崇拜佢。 24 上帝係個靈體*，崇拜佢嘅人必須喺神聖力量嘅引導下*，按照真理崇拜佢。」 25 佢話：「我知道彌賽亞就快嚟到，佢又叫做基督。佢嚟到，就會同我哋講解一切。」 26 耶穌同佢講：「我就係嗰個人，而家同你講緊嘢。」

27 呢個時候門徒返嚟，見到耶穌同一個女人講嘢，就好驚訝。當然，冇人問：「點解你同個女人講嘢嘅？」或者問：「你想要啲乜嘢？」 28 嗰個女人留低裝水嘅容器，返入城同人講： 29 「你哋去睇吓，有個人講得出我做過嘅所有嘢呀。佢會唔會就係基督呢？」 30 嗰啲人就出城去見耶穌。

31 嗰時，門徒勸耶穌：「老師*，食啲嘢吖。」 32 但係耶穌就話：「我有食物，係你哋唔知道嘅。」 33 於是啲門徒話：「唔通有人俾咗啲嘢佢食？」 34 耶穌同佢哋講：「我嘅食物就係執行派我嚟嗰位嘅旨意，完成佢嘅工作。 35 你哋唔係話，仲有四個月先至到收割嘅時候咩？我話俾你哋知，抬頭望吓田地啦，已經成熟*，可以收割嘞。 36 收割嘅人而家已經得到報酬，亦都收集緊得到永生嘅農作物*，噉撒種嘅同收割嘅都可以一齊歡樂。 37 有句說話講得啱：『一個人撒種，另一個人收割。』 38 我派你哋去收割嘅，係你哋冇栽種過嘅*。其他人栽種，你哋得到佢哋勞動嘅成果。」

39 由嗰座城出嚟嘅撒馬利亞人，有好多都因為嗰個女人講嘅嘢而信從咗耶穌，因為佢作見證話：「佢講得出我做過嘅所有嘢。」 40 撒馬利亞人嚟見耶穌，求佢留低。佢就喺嗰度留咗兩日。 41 由於聽到耶穌嘅教導，結果就有更加多人相信。 42 佢哋同嗰個女人講：「我哋唔再只係因為你所講嘅而相信嘞，仲因為我哋親耳聽到佢講嘅嘢，知道呢個人真係救世主呀。」

43 兩日之後，耶穌離開嗰度，去加利利。 44 （耶穌自己曾經作見證話，先知喺自己嘅家鄉係唔受尊重嘅。) 45 佢去到加利利嘅時候，加利利人都歡迎佢，因為佢哋之前都有去耶路撒冷過節，見過佢喺節期做嘅一切。

46 耶穌又去到加利利嘅迦拿，即係佢將水變成酒嘅地方。有一個人係王嘅官員，佢住喺迦百農，佢個仔病咗。 47 佢聽講耶穌喺猶地亞嚟到加利利，就去見耶穌，求耶穌落去迦百農醫好佢個仔，因為佢個仔就快死嘞。 48 不過耶穌同佢講：「除非你哋見到神跡奇事，如果唔係，就絕對唔會相信。」 49 呢個官員話：「主啊，求你同我一齊落去啦，噉我個仔就唔使死嘞。」 50 耶穌同佢講：「返去啦，你個仔好返嘞。」呢個人相信耶穌同佢講嘅嘢，就離開嗰度。 51 喺佢返去途中，佢啲奴隸嚟同佢講，佢個仔已經好返。 52 佢就問嗰啲奴隸，佢個仔嘅病係幾點開始好轉嘅。佢哋就同佢講：「琴日下晝1點*，佢就退咗燒嘞。」 53 嗰個爸爸睇出，就係喺嗰個時候，耶穌同佢講：「你個仔好返嘞」。於是佢同全家都成為咗信徒。 54 呢個係耶穌喺猶地亞返到加利利之後，施行嘅第二個神跡。

5 後嚟，猶太人嘅一個節期到嘞，耶穌就上耶路撒冷。 2 喺耶路撒冷嘅羊門附近有一個池，希伯來語叫畢士特，嗰度有五個柱廊。 3 有好多病人，仲有好多盲嘅、跛嘅同埋肢體萎縮*嘅人瞓咗喺柱廊度。 4 －－－ * 5 嗰度有一個人已經病咗38年。 6 耶穌見到呢個人瞓喺度，而且知道佢病咗好耐，就同佢講：「你想唔想好返呀？」 7 個病人話：「先生，池水郁嘅時候，冇人放我落個池度。到我準備落去嘞，人哋又快過我。」 8 耶穌同佢講：「起身！拎起你張墊*，行吓。」 9 嗰個人就即刻好返，拎起張墊，開始行路。

嗰一日係安息日。 10 於是猶太人就同嗰個被醫好嘅人講：「今日係安息日，你搬張墊係唔合法㗎。」 11 但係佢話：「醫好我嗰個人同我講：『拎起你張墊，行吓。』」 12 佢哋問：「係邊個叫你拎起張墊行㗎？」 13 不過佢唔知道係邊個醫好佢，因為耶穌已經走咗，去到人群當中。

14 後嚟耶穌喺聖殿見到佢，就同佢講：「而家你好返嘞。唔好再犯罪，以免遭遇更加唔好嘅事。」 15 嗰個人走咗之後，就去同猶太人講，係耶穌醫好佢。 16 於是，猶太人迫害耶穌，因為佢喺安息日幫人醫病。 17 耶穌回應佢哋話：「我爸爸不斷工作直到而家，所以我都不斷工作。」 18 猶太人聽到就更加想殺死佢，因為佢哋覺得耶穌唔單止違反咗安息日嘅規定，仲話上帝係自己嘅爸爸，自命同上帝平等。

19 耶穌就同佢哋講：「我好肯定噉話俾你哋聽，阿仔*做任何事都唔可以自作主張，佢見到爸爸*做乜嘢，先至會做。無論爸爸做乜嘢，佢都用同樣嘅方式去做。 20 爸爸對阿仔嘅感情好深，向佢展示自己所做嘅一切，而且仲要向佢展示比呢啲更偉大嘅事，令你哋驚訝。 21 正如爸爸復活死人，令佢哋有返生命，同樣，阿仔想邊個復活，就復活邊個。 22 爸爸唔審判任何人，反而將審判嘅事全部交俾阿仔， 23 令人人都尊重佢，就好似尊重爸爸噉。邊個唔尊重阿仔，就係唔尊重派佢嚟嘅爸爸。 24 我可以好肯定噉同你哋講，邊個聽到我嘅說話，又相信派我嚟嘅嗰位，邊個就有永遠嘅生命，唔會被定罪，反而已經脫離死亡，歸入生命嘞。

25 「我好肯定噉同你哋講，時候就快到嘞，其實而家就係，死人會聽到上帝個仔嘅聲音，聽從嘅人就會有返生命。 26 爸爸自己裡面有生命，佢亦都令阿仔裡面有生命*。 27 爸爸已經賜咗審判權俾佢，因為佢係人子。 28 唔好為呢件事驚訝，因為時候會到，所有喺墳墓裡面嘅人*都會聽到佢嘅聲音， 29 就出嚟。行善嘅，復活得到生命；作惡嘅，復活接受審判。 30 我做任何事都唔可以自作主張，我會根據爸爸同我講嘅去審判人。我嘅審判係公正嘅*，因為我唔係要按照自己嘅意思去做，而係要執行派我嚟嗰位嘅旨意。

31 「如果只有我為自己作見證，我嘅見證就冇效*。 32 有另一位*為我作見證，我知道佢為我作嘅見證係有效嘅。 33 你哋曾經派人去見約翰，佢為真理作咗見證。 34 其實我唔需要*嚟自人嘅見證，我係為咗令你哋得救先至講呢啲說話。 35 呢個人係一盞點著咗嘅明燈。你哋曾經願意開開心心噉接受佢嘅光照，不過嗰段時間好短。 36 約翰曾經話俾人聽我係爸爸派嚟嘅，而我可以提出更有力嘅證據證明呢一點，就係我做緊爸爸派我成就嘅事。 37 派我嚟嘅爸爸都親自為我作見證。你哋從來冇聽過佢嘅聲音，亦都冇見過佢嘅形貌。 38 佢嘅話語唔喺你哋嘅心入面，因為你哋唔相信佢派嚟嘅嗰位。

39 「你哋睇聖經，因為你哋認為通過聖經就可以有永遠嘅生命。其實為我作見證嘅，就係聖經。 40 但係你哋唔想跟從我而得到生命。 41 我唔接受人俾我嘅榮耀*。 42 至於你哋，我清楚知道，你哋冇愛上帝嘅心。 43 我奉我爸爸嘅名而嚟，但係你哋唔接待我；如果其他人奉自己嘅名而嚟，你哋反而會接待佢。 44 你哋互相接受榮耀*，唔尋求獨一嘅上帝所賜嘅榮耀*，又點會相信我呢？ 45 唔好以為我會向爸爸指控你哋。有一位自然會指控你哋，就係你哋信賴嘅摩西。 46 其實，如果你哋相信摩西，就會相信我，因為摩西嘅書寫低咗我會做嘅事。 47 如果你哋唔相信摩西寫嘅嘢，又點會相信我講嘅嘢呢？」

6 後嚟，耶穌坐船過加利利海，即係提比里亞海。 2 有一大班人一直跟住佢，因為佢哋見到佢幫人醫病嘅神跡。 3 耶穌上咗山，同門徒坐喺嗰度。 4 當時猶太人嘅一個節日逾越節就快到嘞。 5 耶穌抬頭見到一大班人向佢行過嚟，就同腓力講：「我哋去邊度買餅俾呢啲人食呢？」 6 佢噉講係想了解腓力點諗，其實佢知道要點做。 7 腓力就話：「就算攞200銀元*去買餅，都唔夠佢哋每人食少少啦。」 8 有一個門徒，就係西門·彼得嘅兄弟安得烈，同耶穌講： 9 「呢度有個男仔，佢有五個大麥餅同埋兩條魚仔，但係點夠分俾咁多人呢？」

10 耶穌話：「你哋叫大家坐低先。」大家就坐喺草地。嗰度大約有5000個男人。 11 耶穌拎起餅，感謝上帝，分俾坐喺度嘅人。佢亦都噉樣將魚仔分俾佢哋。大家想食幾多，就俾幾多佢哋。 12 佢哋食飽之後，耶穌同門徒講：「將食淨嘅收集埋一齊吖，噉就唔會浪費嘞。」 13 門徒將啲人食淨嘅餅收集起，呢啲餅係由嗰五個大麥餅分出嚟嘅，足足裝滿12個籃。

14 大家見到耶穌施行嘅神跡，就話：「佢真係預言提到，會嚟到世上嘅嗰位先知呀！」 15 耶穌知道佢哋想嚟逼佢做王，就再次離開佢哋，自己上山。

16 到咗夜晚，耶穌嘅門徒行落去海邊， 17 上咗隻船，出發過去迦百農。當時已經天黑，耶穌仲未返到佢哋嗰度。 18 由於狂風大作，海上就波濤洶湧。 19 佢哋撐咗大約五六公里*，見到耶穌喺海上面行，越嚟越近隻船，就覺得好驚。 20 耶穌同佢哋講：「係我，唔使驚！」 21 門徒就俾佢上船，過咗冇幾耐，隻船就去到佢哋想去嘅地方。

22 第二日，一直留喺海嘅東岸嘅民眾，發現原本喺嗰度嘅船仔唔見咗。因為門徒上咗嗰隻船走咗，不過耶穌冇同佢哋一齊。 23 後嚟，有啲嚟自提比里亞嘅船嚟到，停咗喺之前主感謝上帝之後，分餅俾民眾食嘅地方附近。 24 民眾喺嗰度見唔到耶穌同佢嘅門徒，就上咗呢啲船，去迦百農搵耶穌。

25 民眾喺對岸搵到耶穌，就同佢講：「老師*，你幾時嚟到呢度㗎？」 26 耶穌答佢哋：「我好肯定噉話俾你哋知，你哋嚟搵我，係因為之前我俾餅你哋食，食飽咗，而唔係因為見到神跡。 27 你哋唔好為咗會腐壞嘅食物工作，反而要為唔會腐壞，能夠帶嚟永遠生命嘅食物工作。呢種食物係人子會賜俾你哋㗎。天父已經喺佢身上扱印，表明認可佢嘞。」

28 民眾同耶穌講：「做上帝嘅工作，即係要做啲咩呀？」 29 耶穌答佢哋：「你哋相信同埋服從上帝派嚟嘅嗰位，就係做上帝嘅工作嘞。」 30 佢哋同耶穌講：「你會俾咩神跡我哋睇，等我哋相信你呢？你會做啲乜嘢呢？ 31 我哋嘅祖先喺曠野食過嗎哪，聖經都話：『佢將天上嚟嘅食物賜俾佢哋。』」 32 耶穌就同佢哋講：「我可以好肯定噉話俾你哋知，摩西冇將天上嚟嘅食物賜俾你哋，我爸爸先至有將天上嚟嘅真食物賜俾你哋。 33 上帝賜俾人嘅食物就係從天上面嚟嘅嗰位，佢會俾生命人。」 34 佢哋同耶穌講：「主啊，求你一直賜呢種食物俾我哋吖。」

35 耶穌同佢哋講：「我就係令人得到生命嘅食物。邊個跟隨我，就唔會再肚餓；邊個信從我，就永遠唔會口渴。 36 不過，就好似我講過嘅噉，你哋已經見到我，但係就唔相信。 37 天父賜俾我嘅人，全部都會跟隨我。跟隨我嘅人，我絕對唔會趕走。 38 我由天上嚟到地上，唔係為咗做自己想做嘅嘢，而係要執行派我嚟嗰位嘅旨意。 39 派我嚟嗰位賜俾我嘅人，我一個都唔會失去，反而會喺最後嘅日子復活佢哋，呢個就係佢嘅旨意。 40 承認阿仔同埋信從阿仔嘅人會有永遠嘅生命，我都會喺最後嘅日子復活佢，呢個就係我爸爸嘅旨意。」

41 猶太人因為耶穌話「我係從天而降嘅食物」，就細細聲喺度議論。 42 佢哋話：「佢唔係約瑟嘅仔耶穌咩？我哋都識佢爸爸媽媽㗎。點解佢話自己係天上嚟嘅呢？」 43 耶穌就同佢哋講：「你哋唔使再議論嘞。 44 如果唔係派我嚟嘅天父吸引人，就冇人能夠跟隨我。跟隨我嘅人，我會喺最後嘅日子復活佢。 45 先知書都話：『佢哋全部都會受耶和華*教導。』所有聽到天父嘅說話又學習嘅，就會跟隨我。 46 噉唔係話有人見過天父，只有從上帝嗰度嚟嘅嗰位，先至見過佢。 47 我可以好肯定噉同你哋講，相信嘅人會有永遠嘅生命。

48 「我就係令人得到生命嘅食物。 49 你哋嘅祖先喺曠野食過嗎哪，最後都死咗。 50 但係邊個食咗喺天上嚟嘅呢種食物，就唔會死。 51 我就係喺天上嚟、令人得到生命嘅食物。邊個食咗呢種食物，就會得到永遠嘅生命。呢種食物就係我嘅肉，我賜俾人係為咗令人得到生命。」

52 之後啲猶太人就喺度爭拗，話：「呢個人點可能俾自己啲肉我哋食呀？」 53 耶穌就話：「我好肯定噉同你哋講，如果你哋唔食人子嘅肉，唔飲佢嘅血，就唔會有生命。 54 邊個食我嘅肉，飲我嘅血，就會有永遠嘅生命。我亦都會喺最後嘅日子復活佢。 55 我嘅肉係真正嘅食物，我嘅血係真正嘅飲品。 56 邊個食我嘅肉，飲我嘅血，邊個就一直同我聯合埋一齊，我亦都一直同佢聯合。 57 永活嘅爸爸派我嚟，所以我有生命；同樣，邊個食我嘅肉，就會有生命。 58 呢種食物係喺天上嚟嘅，同你哋祖先食嘅唔同。佢哋嗰時食完，後嚟都死咗。但係邊個食我呢種食物，就會得到永遠嘅生命。」 59 呢啲說話係耶穌喺迦百農嘅會堂*教導人嗰陣講嘅。

60 佢哋聽到之後，好多門徒就話：「佢講嘅嘢咁得人驚，邊個聽得入耳呀？」 61 耶穌知道啲門徒細細聲喺度議論，就同佢哋講：「我講嘅嘢係咪令你哋反感*呀？ 62 如果你哋見到人子升返去佢原本嘅地方，又會點呢？ 63 神聖力量先至能夠俾生命人，而血肉之軀就唔可以。我同你哋講嘅說話係受神聖力量指引嘅，能夠令人得到生命。 64 但係你哋有啲人唔相信。」耶穌一開始就知道邊啲人唔相信，同埋邊個會出賣佢。 65 佢又話：「所以我同你哋講過，如果唔係天父恩准，冇人能夠跟隨我。」

66 由於耶穌嘅說話，好多門徒就返去做自己原本做嘅嘢，唔再跟隨耶穌。 67 耶穌同十二使徒*講：「你哋係咪都想走呀？」 68 西門·彼得就話：「主啊，我哋仲可以跟隨邊個呀？你講嘅說話能夠帶俾人永生喎！ 69 我哋相信，亦都知道你係上帝嘅聖者呀。」 70 耶穌同佢哋講：「我唔係揀咗你哋12個人咩？但係你哋當中有一個人好似魔鬼一樣*。」 71 其實佢講緊加略人西門嘅仔猶大。猶大雖然係十二使徒之一，但係後嚟出賣咗耶穌。

7 後嚟，耶穌喺加利利繼續佢嘅活動。佢唔想去猶地亞一帶，因為猶太人*想殺佢。 2 當時猶太人嘅住棚節就到嘞。 3 耶穌啲細佬就同佢講：「唔好留喺度，去猶地亞，噉你嘅門徒咪睇到你做嘅嘢囉。 4 一個人想出名，冇理由收收埋埋嘅。既然你都做緊呢啲嘢，就應該俾所有人*睇到你。」 5 佢啲細佬當時仲未信從佢。 6 耶穌就同佢哋講：「我嘅時候仲未到，但係你哋就幾時去都得。 7 人冇理由憎你哋，反而係憎我，因為我指證人所做嘅事係邪惡㗎。 8 你哋上去過節啦。我就唔上去住嘞，因為我嘅時候仲未到。」 9 耶穌同細佬講完呢啲嘢之後，繼續留喺加利利。

10 不過，佢啲細佬上去過節之後，佢亦都暗中上去。 11 過節嗰陣，猶太人四圍搵佢，佢哋問：「嗰個人喺邊呀？」 12 民眾就細細聲喺度討論，有啲話：「佢係個好人。」有啲話：「唔係，佢誤導民眾㗎。」 13 當然，冇人夠膽公開噉講佢，因為大家都驚猶太人。

14 節期過咗一半，耶穌先至上聖殿教導人。 15 猶太人覺得好驚訝，話：「呢個人冇去過學府*讀書，點解會咁熟聖經嘅？」 16 耶穌就答佢哋：「我教嘅唔係我自己嘅道理，而係嚟自派我嚟嘅嗰位。 17 邊個想按照上帝嘅旨意去做，就會知道我教嘅道理到底係嚟自上帝，定係嚟自我自己。 18 邊個照住自己嘅意思講說話，就係想榮耀自己；邊個想榮耀派佢嚟嘅嗰一位，佢講嘅就係真話，佢嘅心冇虛假*。 19 摩西唔係將法典傳咗俾你哋咩？但係你哋冇一個人遵守喎。點解你哋想殺我呢？」 20 民眾就話：「你被邪靈附身呀。邊有人想殺你呀？」 21 耶穌答佢哋：「我只係喺安息日施行咗一個奇跡，你哋就咁驚訝。 22 你哋諗吓，摩西吩咐你哋行割禮*，其實割禮唔係嚟自摩西，而係祖先傳落嚟嘅，而你哋喺安息日都為人施行割禮。 23 你哋喺安息日幫人施行割禮，係因為唔想違反摩西法典。噉點解我喺安息日醫好一個人，令佢好返晒，你哋又咁嬲呢？ 24 唔好再根據表面去判斷人，反而要根據正義嘅標準去判斷。」

25 有啲住喺耶路撒冷嘅人就話：「呢個唔係佢哋想殺嗰個人咩？ 26 你睇！而家佢公開講說話，佢哋都冇同佢講啲乜嘢。唔通連嗰啲首領都真係覺得呢個人係基督？ 27 我哋好清楚知道呢個人喺邊度嚟，但係基督嚟嘅時候，唔會有人知道佢喺邊度嚟㗎喎。」 28 當時耶穌喺聖殿教導人，佢大聲話：「你哋識得我，亦都知道我喺邊度嚟。我唔係自作主張要嚟㗎，而係有一位派我嚟，佢係真實嘅，但係你哋唔認識佢。 29 我認識佢，因為我係佢嘅代表，係佢派我嚟嘅。」 30 佢哋就想捉耶穌，不過冇人落手，因為佢嘅時候仲未到。 31 但係，民眾當中有好多人都信從耶穌，佢哋話：「基督嚟嘅時候，會施行好多神跡，呢個人咪就係噉做囉？」

32 法利賽派聽到民眾細細聲討論耶穌嘅事，祭司長同法利賽派就派差役去拘捕耶穌。 33 耶穌話：「我會喺你哋呢度留多一陣，然後就會返番去派我嚟嗰位嗰度嘞。 34 你哋會搵我；但係唔會搵到，我要去嘅地方，你哋係去唔到㗎。」 35 猶太人就討論：「呢個人諗住去邊度，等我哋搵唔到佢呢？唔通佢諗住去散居喺希臘人當中嘅猶太人嗰度，教埋希臘人？ 36 佢話：『你哋會搵我；但係唔會搵到，我要去嘅地方，你哋係去唔到㗎。』佢噉講係咩意思呢？」

37 最後一日，亦即係呢個節期嘅大日子，耶穌企起身，大聲話：「邊個口渴，就應該嚟我呢度飲水。 38 信從我嘅人，就好似聖經話：『佢內心嘅深處會有活水嘅江河流出嚟。』」 39 耶穌講嘅呢番說話同神聖力量有關，係信從佢嘅人將會領受嘅。當時佢哋仲未得到神聖力量，因為耶穌仲未得到榮耀。 40 民眾聽到佢噉講，就有人話：「佢真係嗰個先知呀。」 41 仲有人話：「佢係基督呀。」另一啲就話：「基督點會嚟自加利利呀？ 42 聖經唔係話基督係大衛嘅子孫，而且嚟自大衛家鄉嗰條村伯利恆咩？」 43 民眾就因為耶穌而分裂。 44 有啲人想捉耶穌，但係冇人落手。

45 差役返去見祭司長同法利賽派嘅人。佢哋同差役講：「點解你哋冇帶到佢返嚟？」 46 差役話：「從來冇人好似佢噉講嘢㗎。」 47 法利賽派嘅人就話：「你哋唔係都俾佢誤導咗呀？ 48 我哋嘅首領同法利賽派嘅人，邊有人信佢㗎？ 49 至於嗰啲連法典都唔識嘅民眾，佢哋係被咀咒㗎。」 50 佢哋當中有一個人，就係之前嚟見過耶穌嘅尼哥德慕，同佢哋講： 51 「根據我哋嘅法典，未聽過一個人點講，冇查明佢做過嘅事，就唔可以定佢有罪，唔係咩？」 52 佢哋話：「唔通你都係嚟自加利利嘅咩？你去查吓，就知道唔會有先知嚟自加利利㗎。」*

8 12 耶穌又同佢哋講：「我係世界嘅光。邊個跟隨我，就絕對唔會喺黑暗之中行走，反而會擁有生命嘅光。」 13 法利賽派嘅人就同佢講：「你為自己作見證，你嘅見證係冇效嘅*。」 14 耶穌就答佢哋：「就算我為自己作見證，我嘅見證都係有效嘅*，因為我知道我喺邊度嚟，會去邊度，而你哋就唔知道我喺邊度嚟，會去邊度。 15 你哋根據人嘅標準定人有罪，但係我就唔會定任何人嘅罪。 16 就算我定人有罪，我嘅判決都係公正嘅，因為我唔係自己一個人噉樣做，派我嚟嘅爸爸都一齊。 17 你哋自己嘅法典都話：『兩個人嘅見證先至有效*。』 18 我為自己作見證，派我嚟嘅爸爸亦都為我作見證。」 19 佢哋問耶穌：「你爸爸喺邊度呀？」耶穌就話：「你哋唔認識我，亦都唔認識我爸爸。如果你哋真係認識我，就會認識我爸爸。」 20 呢啲說話係耶穌喺聖殿教導人嗰陣，喺寶庫嘅錢箱附近講嘅。當時冇人拘捕佢，因為佢嘅時候仲未到。

21 佢又同佢哋講：「我要走嘞，你哋會搵我，但係你哋會死喺自己嘅罪裡面。我要去嘅地方，你哋係去唔到嘅。」 22 猶太人話：「佢話：『我要去嘅地方，你哋係去唔到嘅。』佢唔係諗住自殺呀嘛？」 23 耶穌同佢哋講：「你哋嚟自地上*，我嚟自天上*。你哋嚟自呢個世界，我唔係嚟自呢個世界。 24 所以我先至話，你哋會死喺自己嘅罪裡面。如果你哋唔相信我就係嗰一位，就會死喺自己嘅罪裡面。」 25 佢哋就問：「你到底係邊個？」耶穌話：「我點解仲要同你哋講嘢呢？ 26 我有好多關於你哋嘅事要講，亦都有好多事要審判。派我嚟嘅嗰位講嘅都係真理，我喺佢嗰度聽到嘅，就喺世人當中講出嚟。」 27 佢哋唔明耶穌講緊嘅係天父。 28 於是耶穌話：「你哋舉起人子*之後，就會知道我就係嗰一位，知道我做乜嘢都唔係自作主張嘅。我講嘅同爸爸教我嘅一致。 29 派我嚟嘅嗰位同我一齊。佢冇揼低我一個，因為我時時都做佢鍾意嘅嘢。」 30 耶穌講呢啲說話嘅時候，好多人就開始相信佢。

31 耶穌同相信佢嘅猶太人講：「如果你哋時時刻刻都按照我嘅說話去做，就真係我嘅門徒嘞， 32 你哋會認識真理，真理會令你哋自由。」 33 有啲人話：「我哋係亞伯拉罕嘅子孫，從來冇做過任何人嘅奴隸。點解你話我哋會自由呀？」 34 耶穌答佢哋：「我好肯定噉同你哋講，所有犯罪嘅人，都係罪嘅奴隸。 35 奴隸唔能夠永遠留喺主人嘅屋企，而主人嘅仔就可以永遠留喺度。 36 所以，如果上帝嘅仔令你哋自由，你哋就真係自由嘞。 37 我知道你哋係亞伯拉罕嘅子孫。不過，你哋想殺我，因為你哋唔接受我嘅教導。 38 我喺我爸爸嗰度見到乜嘢，就講出嚟；你哋喺你哋嘅爸爸嗰度聽到乜嘢，就做出嚟。」 39 佢哋就同耶穌講：「我哋嘅祖先*係亞伯拉罕。」耶穌同佢哋講：「如果你哋真係亞伯拉罕嘅子孫，就會效法亞伯拉罕。 40 我將喺上帝嗰度聽到嘅真理話俾你哋知，但係而家你哋竟然想殺我。亞伯拉罕冇做過噉嘅事。 41 你哋做緊嘅，就係你哋爸爸所做嘅。」佢哋同耶穌講：「我哋只係得一個爸爸，就係上帝。我哋唔係私生子*呀。」

42 耶穌同佢哋講：「如果上帝係你哋嘅爸爸，你哋就會愛我，因為我係喺上帝嗰度嚟嘅。我唔係自作主張要嚟呢度，而係佢派我嚟嘅。 43 點解你哋唔明白我講嘅嘢呢？因為我講嘅說話你哋聽唔入耳*。 44 你哋係喺你哋嘅爸爸魔鬼嗰度嚟嘅，想按照你哋爸爸嘅慾望去做。佢一開始*就係殺人凶手，冇堅持真理，因為佢心裡面冇真理。佢講大話，係出於自己嘅性情，因為佢係說謊者，亦都係謊話之父。 45 另一方面，由於我將真理話俾你哋知，你哋就唔信我。 46 你哋邊個能夠證明我有罪呢？既然我講嘅係真理，點解你哋唔信我呢？ 47 喺上帝嗰度嚟嘅，就會聽上帝嘅說話。你哋唔聽，係因為你哋唔係由上帝嗰度嚟嘅。」

48 猶太人就同耶穌講：「都話咗你係撒馬利亞人，仲俾邪靈附身㗎啦。我哋有講錯咩？」 49 耶穌答佢哋：「我冇俾邪靈附身。我尊重我爸爸，但係你哋就侮辱我。 50 不過，我唔係榮耀緊自己。有一位想我得到榮耀，佢先至係審判者。 51 我好肯定噉同你哋講，邊個按照我講嘅說話去做，就永遠唔會死。」 52 猶太人同佢講：「你實係俾邪靈附身呀。亞伯拉罕死咗，啲先知亦都死咗嘞，你竟然話，邊個按照你講嘅說話去做，就永遠唔會死。 53 唔通你仲大過我哋嘅祖先*亞伯拉罕？佢已經死咗，啲先知亦都死咗嘞。你以為自己係邊個呀？」 54 耶穌答佢哋：「如果我榮耀自己，我嘅榮耀就一啲價值都冇。榮耀我嘅，係我爸爸，亦即係你哋話係你哋上帝嘅嗰一位。 55 不過，你哋唔認識佢，而我就認識佢。如果我話唔識佢，就同你哋一樣，係講大話嘞。我唔單止認識佢，亦都按照佢嘅說話去做。 56 你哋嘅祖先*亞伯拉罕開開心心噉期待睇見我嘅日子，佢睇到*嘞，就好開心。」 57 猶太人就同佢講：「你50歲都未夠，點會見過亞伯拉罕呀？」 58 耶穌話：「我好肯定噉同你哋講，未有亞伯拉罕之前，就有我嘞。」 59 於是佢哋拎起石頭想掟佢。但係耶穌就匿埋，離開咗聖殿。

9 耶穌喺路上，見到一個天生就失明嘅男人。 2 門徒就問：「老師*，呢個人一出世就睇唔到嘢，係邊個犯咗罪呀？係呢個人，定係佢父母呀？」 3 耶穌話：「唔係呢個人，亦都唔係佢父母犯咗罪，而係要令人睇出，上帝可以喺佢身上成就嘅事。 4 趁住日頭，我哋就要做派我嚟嗰位嘅工作；夜晚一到，就冇人可以工作嘞。 5 只要我仲喺世上，我就係世界嘅光。」 6 佢講完之後，就吐口水喺地下，撈埋啲泥，將泥搽喺嗰個人對眼上面， 7 然後同佢講：「去西羅亞池洗吓對眼啦。」（西羅亞翻譯出嚟就係「奉派出去」。）佢洗完之後，返嚟已經睇到嘢嘞。

8 啲鄰居同嗰啲見過佢乞食嘅人就話：「呢個人咪係平時坐喺度乞食嗰個人？」 9 有啲人話：「係吖。」另一啲人話：「唔係，不過都有啲似。」個男人就不停話：「係我嚟㗎。」 10 佢哋就問：「你係點睇得返嘢㗎？」 11 佢話：「嗰個叫耶穌嘅人撈咗啲泥，搽喺我對眼上面，同我講：『去西羅亞池洗吓對眼吖。』我去洗完，就睇到嘢嘞。」 12 佢哋問：「嗰個人喺邊呀？」佢話：「我唔知喎。」

13 佢哋將呢個曾經失明嘅人帶去法利賽派嘅人嗰度。 14 耶穌撈咗啲泥，搽喺佢對眼嘅嗰一日，咁啱係安息日。 15 於是法利賽派就問佢係點樣睇得返嘢嘅。個男人同佢哋講：「佢將啲泥搽喺我對眼度，我洗完就睇到嘢喇。」 16 法利賽派有啲人話：「呢個人唔係上帝派嚟嘅，因為佢都唔守安息日。」另一啲人就話：「如果呢個人係有罪嘅，佢點會施行到呢啲神跡呢？」佢哋之間就出現咗分裂。 17 佢哋又問嗰個盲人：「既然係佢令你睇得返嘢嘅，噉你覺得佢係咩人吖？」個盲人話：「佢係個先知。」

18 猶太人本身唔信呢個人曾經係盲嘅，而家睇到嘢，於是佢哋叫呢個人嘅父母過嚟， 19 問佢哋：「呢個係咪你哋個仔呀？佢係咪天生盲㗎？點解佢而家又睇到嘢呢？」 20 佢父母就話：「冇錯，佢係我哋個仔，佢天生就係盲嘅。 21 至於點解佢而家睇到嘢，我哋就唔知嘞。邊個令佢睇到嘢，我哋都唔知。你哋問佢啦。佢係成年人，應該自己答返。」 22 佢父母噉講，係因為怕咗啲猶太人*。原來猶太人傾好咗，邊個承認耶穌係基督，就會俾會堂開除*。 23 所以佢父母先至話：「佢係成年人，你哋問佢啦。」

24 於是佢哋又叫返嗰個曾經失明嘅人嚟，同佢講：「你要喺上帝面前講真話*。我哋知道嗰個人係罪人。」 25 佢話：「佢係咪罪人，我就唔知嘞。但係有樣嘢我好肯定，就係我以前睇唔到嘢，而家睇到。」 26 佢哋就問：「佢做咗啲咩？點令你睇到嘢㗎？」 27 個男人答：「我已經講咗啦，你哋又唔聽。點解而家又要我講多次呢？唔通你哋都想做佢嘅門徒？」 28 佢哋就用輕蔑嘅口吻同佢講：「你先係嗰個人嘅門徒呀，我哋係摩西嘅門徒。 29 我哋知道上帝將佢嘅誡命話俾摩西聽。至於呢個人，我哋就唔知佢喺邊度嚟嘞。」 30 嗰個男人就話：「噉就奇怪嘞，佢令我睇到嘢，但係你哋竟然唔知道佢喺邊度嚟呀。 31 我哋知道上帝唔會聽罪人嘅祈求。邊個敬畏上帝，按照佢嘅旨意去做，上帝先會聽。 32 從來冇聽人講過，有人可以令天生盲嘅人睇到嘢。 33 如果呢個人唔係上帝派嚟嘅，根本乜都做唔到。」 34 佢哋話：「你一出世就充滿罪，居然想教訓我哋？」佢哋就將個男人趕咗出去*。

35 耶穌聽到佢哋將個男人趕走咗。後嚟耶穌見到佢，就話：「你對人子有冇信心呀？」 36 佢就話：「先生，邊個係人子呀？請你話俾我知，噉我就可以對佢有信心嘞。」 37 耶穌話：「你已經見到佢，其實而家同你講緊嘢嘅就係佢。」 38 嗰個男人話：「主啊，我信從你。」於是佢向耶穌下拜。 39 耶穌話：「我嚟到世人當中，就係為咗令佢哋受到審判，令睇唔到嘅睇得到，而睇得到嘅就失明。」 40 當時有啲法利賽派嘅人同耶穌一齊，佢哋聽到，就同耶穌講：「唔通我哋都係盲嘅咩？」 41 耶穌同佢哋講：「如果你哋係盲嘅，就冇罪嘞。但係而家你哋話，你哋睇到嘢，所以你哋仍然有罪。」

10 「我好肯定噉同你哋講，邊個唔經門口入去羊圈，反而喺其他地方爬入去，邊個就係賊，係強盜。 2 喺門口入去嘅，先至係綿羊嘅牧人。 3 看門嘅人開門俾牧人，綿羊會聽牧人嘅聲音，佢會嗌自己啲綿羊嘅名，帶領佢哋出嚟。 4 佢將自己啲綿羊全部帶晒出嚟之後，就行喺前面，啲綿羊都跟住佢，因為認得佢把聲。 5 綿羊絕對唔會跟住陌生人，反而會即刻走開，因為唔認得陌生人嘅聲音。」 6 耶穌同佢哋講咗呢個比喻，但係佢哋唔知係乜嘢意思。

7 於是耶穌又話：「我可以好肯定噉同你哋講，我就係綿羊嘅門。 8 以前冒充我嚟嘅，全部都係賊，都係強盜。綿羊唔會聽佢哋話。 9 我就係門。邊個經我呢度入去，邊個就會得救，可以出入，亦都可以搵到牧場。 10 賊嚟到，無非係想偷竊、殺害、毀滅。我嚟到，係要令綿羊得到生命，而且係豐盛嘅生命。 11 我係好牧人，好牧人願意為綿羊犧牲生命。 12 請返嚟看羊嘅唔係牧人，啲綿羊都唔係佢嘅。當佢見到狼嚟嘅時候，就會揼低綿羊，走咗去。狼就捉走綿羊，令羊群四散。 13 嗰個看羊嘅人唔關心綿羊，因為佢係請返嚟嘅。 14 我係好牧人，我認識我嘅綿羊，我嘅綿羊都認識我， 15 就好似我爸爸認識我，我都認識爸爸噉。我為綿羊犧牲生命。

16 「我仲有另外嘅綿羊，唔喺呢個羊圈裡面，我一定要將佢哋帶嚟。綿羊會聽我嘅聲音，而且合為一群，跟隨同一個牧人。 17 爸爸愛我，因為我犧牲生命，為咗再有返生命。 18 我嘅生命唔係俾人奪去嘅，而係我自願犧牲嘅。我有權犧牲生命，亦都有權再次得到生命。呢個係爸爸俾我嘅命令。」

19 因為呢番說話，猶太人之間又出現咗分裂。 20 好多人都話：「佢俾邪靈附身，癲咗呀。點解你哋仲聽佢講嘢呀？」 21 另一啲人就話：「俾邪靈附身嘅人唔會講呢啲嘢。邪靈都唔可以令盲人睇到嘢㗎。」

22 嗰時係耶路撒冷慶祝獻殿節嘅時候。當時係冬天， 23 耶穌喺聖殿裡面嘅所羅門柱廊行緊。 24 猶太人圍住佢，同佢講：「你要令我哋困惑到幾時呀？如果你係基督，就直接講出嚟啦。」 25 耶穌話：「我已經話咗俾你哋知，但係你哋唔信。我奉我爸爸嘅名做嘅事，就表明我係邊個。 26 不過你哋唔信，因為你哋唔係我嘅綿羊。 27 我嘅綿羊聽我嘅聲音，我認識佢哋，佢哋都跟隨我。 28 我將永遠嘅生命賜俾佢哋，佢哋永遠唔會滅亡，冇人可以喺我手上搶走佢哋。 29 我爸爸賜俾我嘅綿羊，比任何嘢更加珍貴，冇人可以喺我爸爸手上搶走佢哋。 30 我同爸爸係合一嘅*。」

31 猶太人又拎起石頭，想掟佢。 32 耶穌就話：「爸爸吩咐我做嘅好多好事，我都做咗，而你哋都睇到嘞。你哋係為咗邊一件事而要拎石頭掟我呢？」 33 猶太人答：「我哋拎石頭掟你，唔係因為你做咗好事，而係因為你講咗褻瀆嘅說話。你只不過係人，竟然話自己係神。」 34 耶穌就話：「你哋嘅法典唔係寫住，『我講過，「你哋係神*」』咩？ 35 聖經係唔能夠作廢嘅。既然上帝嘅話語指責嘅人，上帝都叫佢哋做『神』， 36 噉何況係我呢！爸爸令我成聖*，派我嚟到世人當中，我話我係上帝嘅仔，但係你哋竟然話，我講褻瀆嘅說話？ 37 如果我唔做我爸爸吩咐嘅事，你哋就唔好信我。 38 不過，既然我做爸爸吩咐嘅事，你哋就算唔相信我，都應該相信呢啲事，噉樣你哋就會知道，而且更加清楚明白，爸爸同我聯合，我都同爸爸聯合。」 39 於是佢哋又想捉耶穌，不過佢走甩咗，冇落入佢哋嘅手。

40 耶穌又去約旦河對岸，到咗約翰最初施浸嘅地方，住喺嗰度。 41 有好多人去到耶穌嗰度，佢哋話：「約翰一個神跡都冇施行過，但係約翰提到同呢個人有關嘅說話，句句都係真㗎。」 42 嗰度就有好多人信從咗耶穌。

11 有個叫拉撒路嘅人病咗，佢住喺伯大尼，馬利亞同佢家姐*馬大都住喺嗰條村。 2 呢個馬利亞就係將馨香油倒喺主身上，然後用自己嘅頭髮抹乾主對腳嘅嗰個人，而病咗嘅拉撒路係佢嘅兄弟。 3 佢兩個姊妹派人去通知耶穌：「主啊，你所愛嘅朋友病咗。」 4 耶穌聽到就話：「呢個病最終唔係要帶嚟死亡，而係要榮耀上帝，而上帝嘅仔都可以通過呢件事得到榮耀。」

5 耶穌愛馬大同佢妹妹，亦都愛拉撒路。 6 不過佢聽到拉撒路病咗之後，仲喺原來嘅地方留多兩日， 7 先至同門徒講：「我哋再去猶地亞啦。」 8 門徒同佢講：「老師*，冇幾耐之前，猶地亞人先想用石頭掟你，你仲要返去嗰度呀？」 9 耶穌答：「日頭唔係有12個鐘咩？人喺日頭行路，唔會棘親，因為見到呢個世界嘅光。 10 人喺夜晚行路，就會棘親，因為佢冇光。」

11 耶穌講完呢啲說話，就同佢哋講：「我哋嘅朋友拉撒路瞓著咗，而家我要去叫醒佢。」 12 門徒就同耶穌講：「主啊，如果佢係瞓緊覺，佢個病就會好返喇。」 13 其實耶穌嘅意思係拉撒路已經死咗，但係佢哋以為耶穌講嘅係佢真係瞓緊覺。 14 耶穌就坦白同佢哋講：「拉撒路死咗。 15 我之前唔喺嗰度對你哋嚟講係好嘅，因為我將會做嘅事會加強你哋嘅信心。而家我哋去佢嗰度啦。」 16 叫做「雙胞胎」嘅多馬，就同其他門徒講：「我哋都要去，同耶穌一齊死。」

17 耶穌去到嗰陣，拉撒路已經喺墳墓四日嘞。 18 伯大尼就喺耶路撒冷附近大約3公里*嘅地方。 19 有好多猶太人都嚟安慰馬大同馬利亞，因為佢哋嘅兄弟死咗。 20 馬大聽到耶穌就快嚟到，就出去迎接佢，而馬利亞就留喺屋企。 21 馬大同耶穌講：「主啊，如果你當時喺度，我嘅兄弟就唔會死嘞。 22 不過，我仍然相信，無論你向上帝求乜嘢，佢都會賜俾你。」 23 耶穌同佢講：「你嘅兄弟一定會復活。」 24 馬大同佢講：「我知道喺最後嘅日子復活嘅時候，佢一定會復活。」 25 耶穌同佢講：「我就係復活，就係生命。信從我嘅人就算死咗，都會有返生命。 26 活著嘅人信從我，就永遠唔會死。你相唔相信呢件事呢？」 27 佢同耶穌講：「主啊，我信。我信你係基督，係上帝嘅仔，即係要嚟到世人當中嘅嗰位。」 28 佢講完呢句話，就返去叫妹妹馬利亞，私下同佢講：「老師到咗，佢搵你呀。」 29 馬利亞一聽到，就即刻去搵耶穌。

30 當時耶穌仍然喺馬大迎接佢嘅地方，仲未入村。 31 嗰啲喺馬利亞屋企安慰佢嘅猶太人，見到佢好匆忙噉出咗去，就跟住佢，以為佢要去墓穴嗰度喊。 32 馬利亞去到耶穌嗰度，一見到佢，就跪喺佢腳前話：「主啊，如果你當時喺呢度，我嘅兄弟就唔會死嘞。」 33 耶穌見到佢喊，又見到同佢一齊嚟嘅猶太人都喊，就心中悲嘆，非常難過， 34 話：「你哋將佢放喺邊度呀？」佢哋話：「主啊，你嚟睇吓吖。」 35 耶穌忍唔住流眼淚。 36 於是有啲猶太人話：「睇吓，佢幾咁愛呢個人！」 37 仲有啲人話：「既然佢可以令盲人睇到嘢，噉唔係都有能力令呢個人唔死咩？」

38 耶穌再次心中悲嘆。之後，佢去到墳墓，呢個墓係個洞穴，有一塊石頭擋住。 39 耶穌話：「將嚿石頭移開。」死者嘅姐姐馬大同佢講：「主啊，佢已經死咗四日，而家一定發臭嘞。」 40 耶穌同佢講：「我唔係講過，只要你相信，就會見到上帝嘅榮耀咩？」 41 啲人就將石頭移開。耶穌抬頭望向天空，話：「爸爸，多謝你聽我嘅禱告。 42 我知道你時刻聽我講嘅說話；不過為咗企喺周圍嘅民眾，我先講呢啲說話，噉樣佢哋就會相信係你派我嚟嘅。」 43 佢講完呢番說話，就大聲話：「拉撒路，出嚟！」 44 嗰個死咗嘅人就出嚟，佢嘅手腳俾布包住，塊面都俾一塊布包住。耶穌同民眾講：「解開佢，俾佢行吖。」

45 好多嚟探馬利亞嘅猶太人，見到耶穌做嘅事，就信從咗耶穌。 46 不過有啲人去見法利賽派嘅人，將耶穌做嘅事話俾佢哋知。 47 於是祭司長同法利賽派召開公議會，話：「呢個人施行咗咁多神跡，我哋點做好呢？ 48 如果由得佢繼續噉樣，個個都會信從佢，羅馬人就會嚟搶走我哋嘅聖地*同民族嘅控制權嘞。」 49 佢哋當中有個人叫該亞法，係當年嘅大祭司，同佢哋講：「你哋乜嘢都唔識， 50 亦都唔諗吓，一個人為眾人而死，噉樣成個民族都唔使滅亡，呢個對你哋有好處。」 51 佢噉樣講，其實唔係佢自己嘅意思，而係因為佢係當年嘅大祭司，所以預言耶穌會為呢個民族而死。 52 但係耶穌唔單止為呢個民族而死，仲要將上帝四散嘅兒女聚集起嚟，合成一群。 53 由嗰一日起，佢哋就密謀殺死耶穌。

54 所以，耶穌冇再公開噉喺猶太人當中活動。佢離開嗰度，去曠野附近嘅地方，到咗一座叫以法蓮嘅城，同門徒一齊住喺嗰度。 55 猶太人嘅逾越節就快到嘞，逾越節之前有好多人從鄉郊地區上去耶路撒冷，要喺嗰度按照法典規定令自己潔淨。 56 佢哋都喺度搵緊耶穌。企喺聖殿唔同地方嘅人討論話：「你哋點睇呀？佢唔嚟過節咩？」 57 當時祭司長同法利賽派落咗命令，任何人如果知道耶穌喺邊，都要報告，噉佢哋就可以拘捕佢。

12 逾越節前六日，耶穌去到伯大尼，亦即係拉撒路住嘅地方。耶穌曾經喺嗰度復活拉撒路。 2 有人喺嗰度請耶穌食晚餐。馬大幫手招呼大家，而拉撒路同其他人就同耶穌一齊食飯*。 3 呢個時候，馬利亞拎住一樽*馨香油，係純正嘅甘松油，非常之貴重。佢將油倒落耶穌對腳，仲用自己嘅頭髮抹乾佢對腳。屋入面充滿馨香油嘅香味。 4 耶穌有個門徒叫加略人猶大，就係將會出賣佢嗰個，佢話： 5 「呢樽馨香油值300銀元*㗎喎，點解唔拎去賣，將啲錢分俾窮人呀？」 6 佢噉講唔係因為關心窮人，而係因為佢係個賊，又負責管錢盒，成日偷入面啲錢。 7 於是耶穌話：「由佢啦，佢而家做嘅，就係為我安葬嘅日子做準備。 8 你哋身邊幾時都有窮人，但係我就唔會一直喺你哋身邊。」

9 一大班猶太人知道耶穌喺嗰度，就嚟到，唔單止想見到佢，亦都想見吓俾耶穌復活嘅拉撒路。 10 啲祭司長就密謀殺死埋拉撒路， 11 因為有好多猶太人去咗伯大尼，見到發生喺拉撒路身上嘅事，就信從咗耶穌。

12 第二日，一大班嚟過節嘅人聽講耶穌就快到耶路撒冷， 13 就拎住棕櫚樹嘅樹枝出去迎接佢。佢哋大聲話：「上帝啊，求你施行拯救！奉耶和華*嘅名而嚟嘅以色列王係有福嘅！」 14 耶穌搵到一隻驢仔，就騎上去，好似聖經講嘅噉。聖經話： 15 「錫安城啊，唔使驚。睇吓！你嘅王嚟咗，佢騎喺一隻驢仔上面。」 16 門徒起初唔明白呢啲說話，直到後嚟耶穌得到榮耀，先至諗起呢啲說話同耶穌有關，而民眾真係向佢做咗呢啲事。

17 耶穌復活咗拉撒路，叫佢喺墓穴出嚟，當日在場嘅人後嚟不斷為呢件事作見證。 18 所以民眾都出嚟迎接耶穌，因為聽講佢施行咗呢個神跡。 19 於是法利賽派嘅人就話：「你哋睇，我哋做嘅都白費心機。個個都跟隨佢嘞。」

20 喺節期嚟崇拜嘅人當中，有啲係希臘人。 21 佢哋去搵嚟自加利利嘅伯賽大人腓力，提出一個請求，話：「先生，我哋想見耶穌呀。」 22 於是，腓力去話俾安得烈知。安得烈同腓力就去話俾耶穌知。

23 耶穌就同佢哋講：「人子得到榮耀嘅時候到嘞。 24 我好肯定噉同你哋講：一粒小麥如果唔係跌落土地死咗，都只係一粒啫；但係如果死咗，就會長出好多麥穗嘞。 25 邊個愛惜自己嘅生命*，就會喪失生命；邊個喺呢個世界願意犧牲*自己嘅生命，就會保全生命，得到永生。 26 邊個為我服務，就應該跟隨我。我喺邊度，為我服務嘅人就喺邊度。邊個為我服務，我爸爸就會尊重佢。 27 而家我好痛苦，我講乜嘢好呢？爸爸啊，求你救我脫離呢個痛苦嘅時候。不過，我就係為咗呢個時候嚟㗎。 28 爸爸，願你榮耀你嘅名。」於是天上有聲音話：「我已經榮耀咗我嘅名嘞，而且會再噉樣做。」

29 企喺嗰度嘅民眾聽到，就話係行雷。另一啲人話：「有天使同佢講嘢呀。」 30 耶穌話：「呢個聲音唔係為我發出嘅，而係為你哋發出嘅。 31 呢個世界而家要受審判。統治全世界嘅王會被趕出去。 32 如果我喺地上被舉起*，就會吸引各種各樣嘅人嚟到我呢度。」 33 佢講呢句說話，其實係想講自己會點樣死。 34 民眾就同佢講：「我哋聽過法典話，基督係永遠長存嘅。你點解話，人子一定會被舉起呢？呢個人子係邊個呀？」 35 耶穌同佢哋講：「光仲會有少少時間留喺你哋當中。你哋要趁仲有光嘅時候行路，噉就唔會俾黑暗戰勝你哋。喺黑暗之中行嘅，唔知道自己要去邊度。 36 你哋要趁仲有光，就信從光，噉你哋就會成為光明之子。」

耶穌講完呢番話，就離開佢哋，匿埋咗。 37 雖然耶穌喺佢哋面前施行過咁多神跡，佢哋仲係唔肯信從佢。 38 先知以賽亞嘅說話就係噉樣應驗咗嘞。佢話：「耶和華*啊，啲人聽到我哋傳講嘅信息，但係有邊個信從呢？耶和華*嘅臂膀向邊個顯露過呢？」 39 以賽亞又指出點解佢哋唔信，佢話： 40 「佢容許佢哋眼盲心硬，噉佢哋就唔會因為對眼睇到，心入面明白，回頭改過，就俾我醫返好。」 41 以賽亞噉講，係因為佢見到基督嘅榮耀，所以談論關於佢嘅事。 42 雖然係噉，好多民間首領都信從咗耶穌，不過由於佢哋驚法利賽派，就唔敢公開承認，怕俾會堂開除*； 43 因為佢哋鍾意得到人嘅榮耀，多過得到嚟自上帝嘅榮耀*。

44 耶穌大聲話：「信從我嘅，唔單止信從我，亦都信從派我嚟嗰位。 45 見到我嘅，亦都見到派我嚟嗰位。 46 我係光，我嚟到世人當中，令信從我嘅人都唔再留喺黑暗裡面。 47 邊個聽到我嘅說話但係唔遵守，我唔會定佢嘅罪，因為我嚟唔係要定世人嘅罪，而係要拯救世人。 48 漠視我、唔接受我說話嘅人，自然有定佢罪嘅。喺最後嘅日子，我講嘅說話會定佢嘅罪。 49 我冇照自己嘅意思講說話，而係派我嚟嘅爸爸親自俾命令我，叫我講乜嘢，教乜嘢。 50 我亦都知道，佢嘅命令能夠令人得到永遠嘅生命。所以，我講嘅，其實就係爸爸叫我講嘅。」

13 逾越節之前，耶穌知道自己嘅時候到嘞，佢要離開呢個世界，去爸爸嗰度。佢既然愛世上屬於佢嘅人，就愛佢哋到底。 2 到咗晚餐嘅時候，魔鬼已經將出賣耶穌嘅諗法，放咗喺西門嘅仔加略人猶大心裡面。 3 由於耶穌知道爸爸已經將一切交喺自己手上，亦都知道自己係喺上帝嗰度嚟嘅，要去上帝嗰度， 4 佢就離開餐枱，將外衣擺埋一邊，拎條毛巾綁喺腰度。 5 之後，佢將水倒落個盆度，開始幫門徒洗腳，然後用綁喺條腰嘅毛巾抹返乾。 6 佢嚟到西門·彼得面前。彼得同佢講：「主啊，你要幫我洗腳呀？」 7 耶穌話：「我做緊嘅嘢，你而家唔明白，但係你之後就會明白。」 8 彼得話：「你絕對唔可以幫我洗腳㗎。」耶穌話：「我唔洗你對腳，你就同我冇關係嘞。」 9 西門·彼得同佢講：「主啊，噉就唔好淨係洗我對腳，連手同頭都洗埋啦。」 10 耶穌同佢講：「人沖完涼就完全潔淨嘞，佢淨係需要洗腳。你哋係潔淨嘅，不過你哋唔係個個都潔淨。」 11 其實耶穌知道邊個要出賣佢。所以佢先話：「你哋唔係個個都潔淨。」

12 耶穌幫佢哋洗完腳之後，著返外衣，返到枱前*，同佢哋講：「你哋知唔知點解我幫你哋洗腳呀？ 13 你哋稱呼我做『老師』，稱呼我做『主』，你哋講得啱，我本來就係。 14 我身為主，身為老師，都幫你哋洗腳，你哋都應該互相洗腳。 15 我為你哋樹立典範，我對你哋點做，你哋都應該照住做。 16 我可以好肯定噉同你哋講，奴隸唔會大過主人，被派嘅都唔會大過派佢去嘅。 17 你哋既然知道呢啲事，如果照住去做，就有福嘞*。 18 我講緊嘅唔係你哋所有人。我認識我揀選嘅人。不過，噉係要應驗聖經嘅說話：『一向同我一齊食飯*嘅人，而家竟然用腳踢我*。』 19 由而家開始，我將未來會發生嘅事話俾你哋知，噉當事情發生嗰陣，你哋就可以相信聖經講嘅就係我。 20 我好肯定噉同你哋講，邊個接待我派嚟嘅人，就即係接待我。邊個接待我，就即係接待派我嚟嘅嗰位。」

21 耶穌講完呢啲說話，就非常難過，明確噉同佢哋講：「我好肯定噉話俾你哋知，你哋當中有一個人會出賣我。」 22 門徒你眼望我眼，完全唔知佢講緊邊個。 23 耶穌所愛嘅一個門徒，當時坐喺最接近耶穌嘅座位*。 24 於是西門·彼得向呢個門徒點一點頭，問佢：「佢講緊邊個呀？」 25 嗰個門徒就向後挨喺耶穌胸前，同佢講：「主啊，係邊個呀？」 26 耶穌答：「我蘸塊餅俾邊個，就係邊個。」耶穌就蘸咗一塊餅，遞俾加略人西門嘅仔猶大。 27 猶大接過塊餅之後，撒但入咗佢嘅心。於是耶穌同佢講：「你要做嘅事，快啲去做啦。」 28 在場冇人知道*點解耶穌噉樣同佢講。 29 由於猶大負責管錢盒，有啲人以為耶穌係叫佢去買過節要用嘅嘢，或者叫佢送啲嘢俾窮人。 30 猶大接過塊餅，就即刻出去嘞。當時已經天黑。

31 佢出去之後，耶穌就話：「而家人子得到榮耀，上帝都因為佢而得到榮耀。 32 上帝會親自令佢得到榮耀，而且好快就會噉樣做。 33 仔啊*，我喺你哋呢度嘅時間唔多嘞。你哋會搵我，但係好似我同猶太人講過嘅噉，『我去嘅地方，你哋係去唔到㗎』，而家我都噉樣同你哋講。 34 我俾一條新誡命你哋，就係你哋要彼此相愛。我點樣愛你哋，你哋都要點樣彼此相愛。 35 如果你哋彼此相愛，所有人就會知道你哋係我嘅門徒嘞。」

36 西門·彼得同佢講：「主啊，你要去邊度呢？」耶穌答：「我去嘅地方，你而家唔可以跟我去，將來先可以。」 37 彼得同佢講：「主啊，點解我而家唔可以跟你去呢？為咗你，我願意犧牲生命呀。」 38 耶穌答：「你真係願意為我犧牲生命？我好肯定噉話俾你知，雞叫之前，你會三次唔認我。」

14 「你哋唔好憂慮不安。要對上帝有信心，亦都要對我有信心。 2 我爸爸嘅家有好多住嘅地方，如果唔係，我就唔會噉講嘞。而家我要去為你哋準備地方。 3 既然我去為你哋準備地方，就會返嚟，接你哋去我嘅家，噉樣我喺邊度，你哋都會喺邊度。 4 你哋知道邊條路可以去到我去嘅地方。」

5 多馬同佢講：「主啊，我哋都唔知道你要去邊，又點知道係邊條路呢？」

6 耶穌話：「我就係道路、真理、生命。如果唔係通過我，冇人可以去到爸爸嗰度。 7 如果你哋認識我，都會認識我嘅爸爸。由而家開始，你哋認識佢，亦都見到佢嘞。」

8 腓力同佢講：「主啊，求你俾我哋見吓天父吖，噉我哋就滿足㗎嘞。」

9 耶穌話：「腓力，我同你哋一齊咁耐嘞，你仲唔認識我咩？邊個見到我，就係見到爸爸。點解你話，『求你俾我哋見吓天父』呢？ 10 你唔相信我同爸爸聯合，而爸爸亦都同我聯合咩？我冇按照自己嘅意思同你哋講說話，時刻同我聯合嘅爸爸就係通過我去達成佢嘅旨意。 11 你哋要相信我，我同爸爸聯合，爸爸亦都同我聯合。就算你哋唔相信我講嘅，都應該因為我按照爸爸嘅旨意所做嘅嘢而相信。 12 我可以好肯定噉同你哋講，我做嘅工作，信從我嘅人將來都會做，而且會做得更大，因為而家我要去爸爸嗰度嘞。 13 你哋奉我嘅名，無論求乜嘢，我都一定會成全，噉我爸爸就會因為佢嘅仔而得到榮耀。 14 無論你哋奉我嘅名求乜嘢，我都一定會成全。

15 「你哋愛我，就會遵守我嘅誡命。 16 我請求爸爸，佢就會賜另一個幫助者*俾你哋，永遠同你哋同在。 17 幫助者就係顯示真理嘅神聖力量，係世人唔能夠領受嘅，因為世人見唔到佢，亦都唔認識佢。你哋認識佢，因為佢時刻同你哋同在，亦都喺你哋裡面。 18 我唔會揼低你哋，令你哋好似孤兒噉。我會返嚟你哋呢度。 19 冇幾耐之後，世人就唔會見到我嘞，但係你哋會見到我，因為我活著，你哋亦都會活著。 20 到咗嗰日你哋就會知道，我同我爸爸聯合，你哋同我聯合，我都同你哋聯合。 21 接受我嘅誡命又遵守嘅人，就係愛我嘞。愛我嘅，我爸爸就愛佢，我都愛佢，而且我會令佢清楚認識我。」

22 另一個猶大，唔係加略人猶大，佢問耶穌：「主啊，點解你想淨係俾我哋清楚認識你，而世人又唔得呢？」

23 耶穌答佢：「邊個愛我，就會照我嘅說話去做，我爸爸都會愛佢，而且我同爸爸會去到佢嗰度，同佢一齊住。 24 唔愛我嘅，就唔會照我嘅說話去做。你哋聽到嘅說話，唔係嚟自我，而係嚟自派我嚟嘅爸爸。

25 「我仲同你哋一齊嘅時候，就已經將呢啲事話俾你哋知嘞。 26 不過幫助者*，即係爸爸因為我嘅名而派嚟嘅神聖力量，佢會將一切都教導你哋，令你哋記起我同你哋講過嘅所有嘢。 27 我留低安寧俾你哋；我將我嘅安寧賜俾你哋。我賜俾你哋嘅呢種安寧，同世界俾人嘅唔同。你哋唔使憂慮不安，亦都唔好退縮。 28 我同你哋講過：『我會離開，亦都會返嚟你哋呢度。』如果你哋愛我，就會因為我要去爸爸嗰度而開心，因為爸爸係比我大嘅。 29 而家我就事先話俾你哋知，噉當事情發生嗰陣，你哋就可以相信。 30 以後我唔會再同你哋講咁多說話，統治全世界嘅王就快嚟到。不過佢對我係無能為力嘅。 31 但係，為咗令世人知道我愛爸爸，我而家照住爸爸俾我嘅命令去做。行喇，我哋離開呢度啦。」

15 「我係真葡萄樹，我爸爸係培植嘅人。 2 喺我呢棵樹上面，所有唔結果實嘅樹枝，佢都會清除；所有結果實嘅，佢都會修剪乾淨*，噉就結到更多果實。 3 你哋已經潔淨嘞，因為你哋聽從我嘅說話。 4 你哋要時刻同我聯合，我都時刻同你哋聯合。正如樹枝離開咗葡萄樹，就唔能夠自己結果實。同樣，你哋唔時刻同我聯合，都結唔到果實。 5 我係葡萄樹，你哋係樹枝。時刻同我聯合嘅，我都時刻同佢聯合，佢就會多結果實。如果離開咗我，你哋就乜嘢都做唔到。 6 邊個冇時刻同我聯合，就會好似揼咗喺外面嘅樹枝，變得枯乾。啲人會收集呢啲樹枝，揼入火裡面燒。 7 如果你哋時刻同我聯合，我嘅說話又時刻喺你哋心入面，噉你哋想要嘅，就即管去求啦，都會實現。 8 你哋不斷多結果實，表明自己係我嘅門徒，我嘅爸爸就會因為噉而得到榮耀。 9 正如爸爸愛我，我都愛你哋；你哋要時刻留喺我嘅愛裡面。 10 如果你哋遵守我嘅誡命，就會時刻留喺我嘅愛裡面，就好似我遵守爸爸嘅誡命，就時刻留喺佢嘅愛裡面一樣。

11 「我將呢啲事講俾你哋知，係想你哋心裡面有我嘅喜樂，而且可以完全感受到呢份喜樂。 12 我俾你哋嘅誡命就係：要彼此相愛，就好似我愛你哋一樣。 13 人為朋友犧牲生命，冇任何愛比呢種愛更加大。 14 如果你哋照我嘅吩咐去做，就係我嘅朋友嘞。 15 我唔再將你哋叫做奴隸，因為奴隸唔清楚主人做嘅事。我將你哋叫做朋友，因為我喺爸爸嗰度聽到嘅，都話晒俾你哋知。 16 唔係你哋揀咗我，而係我揀咗你哋，委派你哋去不斷結出果實，等你哋嘅果實可以永遠長存。噉樣，你哋奉我嘅名，無論向爸爸求乜嘢，佢都會賜俾你哋。

17 「我俾呢啲吩咐你哋，係想你哋彼此相愛。 18 如果世人憎恨你哋，要記得，世人憎恨你哋之前已經憎恨我嘞。 19 如果你哋屬於世界，世人自然會鍾意你哋*。但係由於你哋唔屬於世界，而係我喺世界當中揀你哋出嚟，所以世人就憎恨你哋。 20 要記得我同你哋講過，奴隸唔會大過主人。如果佢哋迫害我，都會迫害你哋；如果佢哋按照我嘅說話去做，都會按照你哋嘅說話去做。 21 但係，佢哋會因為你哋係我嘅門徒而噉樣對付你哋*，因為佢哋唔認識派我嚟嗰位。 22 如果我冇嚟，冇同佢哋講過嘢，佢哋就冇罪嘞。不過而家佢哋嘅罪係冇辦法開脫嘅。 23 邊個憎恨我，即係憎恨我嘅爸爸。 24 我喺佢哋當中，如果冇施行過其他人從未做過嘅奇跡，佢哋就冇罪嘞。不過，而家佢哋見到我*，都仲係憎恨我，亦都憎恨我嘅爸爸。 25 噉係要應驗寫喺佢哋法典嘅說話：『佢哋無緣無故憎恨我。』 26 我會將爸爸所賜嘅幫助者*派去你哋嗰度，幫助者即係顯示真理嘅神聖力量，佢係由爸爸嗰度嚟嘅，佢到咗就會為我作見證。 27 你哋都要作見證，因為由我一開始傳道，你哋就同我一齊。」

16 「我將呢啲事話俾你哋知，係唔想你哋失去信心*。 2 你哋會被會堂開除*。其實，時候要到，有人會殺害你哋，而佢哋都以為噉樣做係敬奉緊上帝。 3 佢哋做呢啲事，係因為從來唔認識我爸爸，亦都唔認識我。 4 不過，我事先將呢啲事話俾你哋知，噉到事情發生嗰陣，你哋就會記返起。

「但係，我起初冇講呢啲事俾你哋知，因為嗰時我同你哋一齊。 5 而家我要去派我嚟嗰位嗰度，你哋竟然冇一個問我：『你要去邊度？』 6 反而因為我將呢啲事話俾你哋知，就非常憂愁。 7 不過，相信我，我係為你哋好先至離開。我唔離開，幫助者*就唔會嚟你哋呢度；我離開咗，就會派佢嚟你哋呢度。 8 佢嚟到，就會向世人提出確鑿嘅證據，令人清楚睇出邊個有罪，邊個正義，邊個受審判： 9 首先佢會令人清楚睇出世人嘅罪，因為佢哋唔信從我； 10 其次佢會令人清楚睇出我做嘅事係正義嘅，因為我就嚟要去爸爸嗰度，你哋唔會再見到我； 11 然後佢會令人清楚睇出邊個受上帝審判，因為統治全世界嘅王已經受到審判嘞。

12 「我仲有好多事要講俾你哋知，但係你哋而家承受唔到。 13 不過，等顯示真理嘅神聖力量嚟到，佢*就會引導你哋明白所有真理，因為佢唔係按照自己嘅意思講說話，而係將聽到嘅講出嚟，向你哋宣講將來嘅事。 14 佢會令我得到榮耀，因為佢聽到嘅係嚟自我嘅，而且會向你哋宣講出嚟。 15 爸爸將知道嘅一切都話俾我知。所以我話，幫助者聽到嘅係嚟自我嘅，而且會向你哋宣講出嚟。 16 你哋好快就唔會再見到我，但係冇幾耐之後，你哋又會見返我。」

17 耶穌有啲門徒就喺度討論：「佢同我哋講，『你哋好快就唔會再見到我，但係冇幾耐之後，你哋又會見返我』；又話，『我就嚟要去爸爸嗰度』。即係咩意思呀？」 18 門徒繼續話：「佢話『好快』即係點呀？我哋都唔知佢講緊乜。」 19 耶穌知道佢哋有嘢想問，就同佢哋講：「係咪因為我頭先話，『你哋好快就唔會再見到我，但係冇幾耐之後，你哋又會見返我』，你哋就討論呢句說話嘅意思呢？ 20 我可以好肯定噉同你哋講，你哋會悲傷痛哭，而世人反而會開心。你哋會憂愁，但係你哋嘅憂愁會化為喜樂。 21 女人生仔嘅時候到咗，佢就會因為好痛而憂愁。不過，到佢生咗嘞，就會因為有個小朋友出世而開心，唔再記得佢嘅痛苦。 22 同樣，而家你哋憂愁，但係將來你哋見返我嘅時候，都會好開心，冇人可以攞走你哋嘅喜樂。 23 到時，你哋唔會再問我啲乜嘢。我好肯定噉同你哋講，無論你哋向我爸爸求乜嘢，佢都會因為我嘅名賜俾你哋。 24 你哋從來冇奉我嘅名求過乜嘢。而家你哋即管求，就會得到，噉你哋就會滿心喜樂嘞。

25 「我一直用比喻將呢啲事話俾你哋知。不過時候會到，我唔會再用比喻同你哋講說話，而係會明明白白噉將爸爸嘅事講俾你哋知。 26 到時，你哋會奉我嘅名向爸爸祈求。我噉樣講，意思唔係話，你哋需要我去為你哋祈求。 27 爸爸對你哋有好深嘅感情，因為你哋一直對我有好深嘅感情，亦都相信我係上帝派嚟嘅。 28 我代表爸爸嚟到世人當中。而家我就快離開世人，返去爸爸嗰度嘞。」

29 門徒話：「而家你唔用比喻，將呢啲事講得好白。 30 我哋終於知道，你唔需要人哋主動問你，就已經知道佢諗緊乜嘢。憑住呢一點，我哋相信你係由上帝嗰度嚟㗎。」 31 耶穌回應佢哋：「你哋而家係咪真係相信呀？ 32 我話俾你哋知，時候會到，而且好快就到，你哋會被分散，各自返屋企，留低我一個人。其實我唔係一個人，因為有爸爸同我一齊。 33 我講呢啲事俾你哋知，係想你哋因為我而得到安寧。你哋喺世上會經歷患難，但係要鼓起勇氣！我已經戰勝世界。」

17 耶穌講完呢啲說話，就抬頭望天，話：「爸爸啊，時候到嘞。求你榮耀你嘅仔，噉你嘅仔都可以榮耀你。 2 你已經將統管全人類嘅權力賜俾佢，噉樣，佢就可以令所有你賜俾佢嘅人得到永遠嘅生命。 3 佢哋要不斷認識*你呢位獨一嘅真神，同埋你派嚟嘅耶穌基督，先至能夠得到永遠嘅生命*。 4 我已經喺地上令你得到榮耀嘞，完成咗你交俾我做嘅事。 5 爸爸啊，喺未有世人之前，我喺你身邊享有榮耀。而家，求你都俾我喺你身邊得到榮耀。

6 「你喺世人當中賜俾我嘅人，我已經令佢哋清楚認識你嘅名。佢哋本來係你嘅，你將佢哋賜咗俾我，佢哋都遵守你嘅話語。 7 而家佢哋知道，你賜俾我嘅一切都嚟自你， 8 因為你同我講嘅嘢*，我已經講咗俾佢哋知，佢哋亦都接受咗，而且確實知道我代表你嚟，又相信係你派我嚟嘅。 9 我唔為世人祈求，而係為佢哋祈求。我為你賜俾我嘅人祈求，因為佢哋係你嘅。 10 我嘅一切都係你嘅，你嘅都係我嘅，我喺佢哋當中都得到榮耀。

11 「而家我要去你嗰度，唔再留喺世人當中，而佢哋就仍然喺世人當中。你已經將你嘅名賜咗俾我嘞。聖潔嘅爸爸啊，為咗你嘅名，求你照顧佢哋，令佢哋合一*，就好似我哋合一噉樣。 12 為咗你嘅名，即係你賜俾我嘅名，我同佢哋一齊嗰陣，一直照顧佢哋，保護佢哋。除咗嗰個滅亡之子，佢哋冇一個滅亡，噉就應驗咗聖經嘅說話。 13 而家我要去你嗰度，我仲喺世上嘅時候講呢啲說話，係想令佢哋完全感受到我嘅喜樂。 14 我將你嘅說話講咗俾佢哋知，不過世人憎恨佢哋，因為佢哋唔屬於世界，就好似我唔屬於世界一樣。

15 「我唔係求你喺世人當中帶走佢哋，而係求你保護佢哋，唔好俾撒但*得逞。 16 佢哋唔屬於世界，就好似我唔屬於世界一樣。 17 求你用真理令佢哋成聖*，你嘅話語就係真理。 18 你派我去世人當中，我亦都派佢哋去世人當中。 19 我為咗佢哋而保持聖潔，噉樣佢哋都可以通過真理成聖。

20 「我唔單止為呢啲人祈求，亦都為嗰啲因為佢哋嘅教導而信從我嘅人祈求， 21 令佢哋全部合一，就好似爸爸你同我聯合，我同你聯合，佢哋都同我哋聯合一樣，噉就可以令世人相信係你派我嚟嘅。 22 我已經將你賜俾我嘅榮耀賜俾佢哋，噉佢哋就可以合一，好似我哋合一噉樣。 23 我同佢哋聯合，你同我聯合，噉佢哋就可以有完美嘅合一*，世人亦都知道係你派我嚟嘅，知道你愛佢哋，就好似你愛我一樣。 24 爸爸啊，我好希望我喺邊度，你賜俾我嘅人都同我一齊，噉樣佢哋就可以見到你賜俾我嘅榮耀，因為喺世界奠基之前，你已經愛我嘞。 25 正義嘅爸爸，世人仲未認識你，我就認識你，呢啲人都知道係你派我嚟嘅。 26 我已經令佢哋認識你嘅名，而且會繼續令佢哋認識，噉佢哋就會愛其他人，好似你愛我噉樣*，我亦都同佢哋聯合。」

18 耶穌講完呢啲說話，就同門徒一齊過咗汲淪谷，入咗去一個園子。 2 出賣佢嘅猶大都知道呢個地方，因為耶穌同門徒經常去嗰度。 3 猶大就帶住一隊士兵，仲有祭司長同埋法利賽派嘅差役去到嗰度。佢哋拎住火把、燈同埋武器。 4 耶穌知道將會發生喺自己身上嘅所有事，就上前問佢哋：「你哋搵邊個呀？」 5 佢哋話：「拿撒勒人耶穌。」耶穌同佢哋講：「我就係。」出賣耶穌嘅猶大都企喺佢哋當中。

6 耶穌一講「我就係」，佢哋就褪後，跌低咗。 7 於是佢又問：「你哋搵邊個？」佢哋話：「拿撒勒人耶穌。」 8 耶穌答：「我已經同你哋講過，我就係。如果你哋搵嘅係我，就放呢啲人走啦。」 9 呢個應驗咗佢嘅說話。佢講過：「你賜俾我嘅人，我一個都冇失去。」

10 當時西門·彼得帶住一把劍。彼得掹把劍出嚟，斬向大祭司嘅奴隸，削咗佢隻右耳落嚟。呢個奴隸叫做馬勒古。 11 但係耶穌同彼得講：「將把劍收返入鞘。爸爸賜俾我嘅杯*，我唔係應該飲咩？」

12 士兵、將軍同猶太人嘅差役就逮捕耶穌，綁住佢對手。 13 佢哋首先押佢去見亞那。亞那係嗰一年嘅大祭司該亞法嘅外父。 14 呢個該亞法曾經同猶太人講，一個人為眾人死，對佢哋有好處。

15 西門·彼得同另一個門徒跟住耶穌。嗰個門徒係大祭司識得嘅，佢同耶穌一齊入咗去大祭司嘅庭院， 16 而彼得就企咗喺門外面。於是另外嗰個門徒，即係大祭司識嘅嗰個人，出嚟同守門人講一聲，就帶彼得入去嘞。 17 守門嘅女僕同彼得講：「你都係嗰個人嘅門徒嚟㗎喎。」佢話：「我唔係。」 18 奴隸同差役因為天氣好凍，就用木炭起咗堆火，企喺周圍取暖。彼得都同佢哋一齊企喺度取暖。

19 有個祭司長審問耶穌，查問有關佢門徒嘅事，同埋佢教嘅道理。 20 耶穌答佢：「我一向都係公開向人講說話。我經常喺會堂同埋聖殿，即係所有猶太人聚集嘅地方教導人。我冇暗中講過啲乜嘢。 21 點解你要問我呢？去問吓嗰啲聽過我講說話嘅人啦。佢哋知我講過啲咩㗎。」 22 耶穌講完，有個企喺隔籬嘅差役摑咗佢一巴，仲話：「你竟然噉樣同祭司長講嘢？」 23 耶穌答佢：「如果我講錯咗，即管話我知我講錯咗啲咩；如果我講得啱，你點解打我呢？」 24 亞那就將耶穌押去大祭司該亞法嗰度，當時耶穌雙手仲係被綁住。

25 西門·彼得企喺火堆隔籬取暖。其他人同佢講：「你都係嗰個人嘅門徒嚟㗎喎。」彼得否認，佢話：「我唔係。」 26 大祭司有個奴隸，就係俾彼得削咗隻耳仔嗰個人嘅親戚，佢話：「我明明見到你同佢一齊喺園子入面㗎喎。」 27 彼得又否認，呢個時候，雞就叫嘞。

28 後嚟，猶太人將耶穌由該亞法嗰度押去總督府。當時已經係清晨。由於佢哋唔想受到玷污而唔可以食逾越節晚餐，所以自己冇入去總督府。 29 於是彼拉多出嚟見佢哋，佢話：「你哋用咩罪名指控呢個人呀？」 30 佢哋話：「如果呢個人冇犯罪，我哋就唔會將佢交俾你處置啦。」 31 彼拉多同佢哋講：「你哋帶走佢，跟返你哋嘅法律審判佢啦。」猶太人同佢講：「我哋冇權殺人㗎。」 32 呢個應驗咗耶穌嘅說話。佢曾經講過自己會點樣死。

33 彼拉多返入去總督府，召見耶穌，問佢：「你係咪猶太人嘅王呀？」 34 耶穌答佢：「你噉樣問，係自己想知，定係聽咗人哋講關於我嘅事呢？」 35 彼拉多就話：「我又唔係猶太人。係你啲同胞同祭司長將你交俾我處置嘅。你到底做咗啲咩呀？」 36 耶穌話：「我嘅王國唔屬於呢個世界。如果我嘅王國屬於呢個世界，我嘅人民就會為我作戰，等我唔會落入猶太人嘅手。不過，我嘅王國唔係源自呢個世界㗎！」 37 彼拉多就同佢講：「噉你係唔係王呀？」耶穌答佢：「冇錯*，我係王。我要為真理作見證，我係為呢件事而生，為呢件事嚟到世上嘅。所有企喺真理呢邊嘅人，都會聽我嘅聲音。」 38 彼拉多就話：「乜嘢係真理呀？」

彼拉多講完呢句說話，又出去同猶太人講：「我搵唔到佢有乜嘢罪喎。 39 你哋有個慣例，要我喺逾越節釋放一個人。噉你哋想唔想我釋放你哋嘅王呀？」 40 佢哋大嗌：「唔好放呢個人，放巴拉巴！」巴拉巴係個強盜。

19 彼拉多就叫人押耶穌去鞭打。 2 士兵用荊棘整咗個王冠，戴喺佢個頭度，仲披咗件紫色嘅袍喺佢身上。 3 啲士兵嚟到佢面前話：「你好呀，猶太人嘅王*！」佢哋仲不斷掌摑佢。 4 彼拉多再出去，同佢哋講：「你哋睇！我帶佢出嚟見你哋，係想你哋知道，我查唔出佢有乜嘢罪。」 5 跟住，耶穌就出嚟。佢戴住荊棘王冠，著住紫色袍。彼拉多同佢哋講：「你哋睇吓呢個人！」 6 祭司長同差役見到佢，就大嗌：「處死佢！喺木柱度處死佢！」彼拉多同佢哋講：「你哋自己將佢押去處死*啦。我查唔出佢有乜嘢罪。」 7 猶太人話：「我哋有自己嘅法律，根據我哋嘅法律佢犯咗死罪，因為佢話自己係上帝嘅仔。」

8 彼拉多聽到佢哋噉樣講，就更加驚。 9 佢返入去總督府同耶穌講：「你究竟係喺邊度嚟㗎？」不過耶穌冇答佢。 10 彼拉多就同佢講：「你唔答我？你唔知我有權釋放你，亦都有權處死*你咩？」 11 耶穌答佢：「如果唔係上面准你處置我，你根本冇權噉做。所以，將我交俾你嘅人，罪就更加大嘞。」

12 就係因為噉，彼拉多一直諗辦法釋放佢。但係猶太人就大嗌：「如果你釋放呢個人，就唔係凱撒嘅朋友。邊個話自己係王，就係反叛凱撒。」 13 彼拉多聽到佢哋噉樣講，就將耶穌帶出去，自己坐喺審判座。嗰個地方叫鋪石地，希伯來語叫迦巴大。 14 當日係逾越節期間嘅預備日，嗰時大約係中午12點*。彼拉多同猶太人講：「睇吓！你哋嘅王！」 15 不過佢哋大嗌話：「殺咗佢！殺咗佢！喺木柱度處死佢！」彼拉多同佢哋講：「我係咪可以處死你哋嘅王呀？」嗰啲祭司長就話：「除咗凱撒，我哋冇王。」 16 彼拉多就叫人押走耶穌，喺木柱上面處決佢。

於是耶穌俾人押走。 17 耶穌自己孭住苦刑柱*出去，到咗一個叫「骷髏頭」嘅地方，希伯來語叫各各他。 18 佢哋喺嗰度將耶穌釘喺木柱，側邊仲有兩個人，一個喺左邊，一個喺右邊，耶穌喺中間。 19 彼拉多仲寫咗個罪名喺塊牌度，安喺苦刑柱上面。上面寫住：「拿撒勒人耶穌，猶太人嘅王。」 20 好多猶太人都見到牌上寫嘅罪名，因為耶穌被釘喺木柱嘅地方距離座城好近，而罪名係用希伯來語、拉丁語同希臘語寫嘅。 21 猶太人嘅祭司長就同彼拉多講：「唔好寫『猶太人嘅王』，要寫『佢話：我係猶太人嘅王』。」 22 彼拉多話：「我寫咗乜嘢，就係乜嘢。」

23 士兵將耶穌釘喺木柱之後，就攞咗佢件外衣，分成四份，每個士兵一份。佢哋又攞咗佢嘅內袍。不過呢件袍冇接縫，係由上到下成件織出嚟嘅。 24 於是佢哋喺度討論：「我哋唔好撕爛佢，抽籤決定俾邊個啦。」呢個係要應驗聖經所講嘅：「佢哋分咗我嘅外衣，又為我嘅內袍抽籤。」士兵果然噉樣做。

25 耶穌嘅媽媽，佢媽媽嘅妹妹，仲有克羅巴嘅太太馬利亞同埋末大拉人馬利亞，企咗喺苦刑柱附近。 26 耶穌見到媽媽同埋佢所愛嘅嗰個門徒企喺附近，就同媽媽講：「睇吓，而家佢係你個仔嘞！*」 27 然後佢同嗰個門徒講：「睇吓，而家佢係你媽媽嘞！」就喺嗰一日，嗰個門徒接耶穌嘅媽媽去自己屋企住。

28 之後，耶穌知道佢爸爸叫佢做嘅一切都完成嘞。佢為咗應驗聖經所講嘅，就話：「我好口渴。」 29 嗰度有個容器，裝滿酸酒。於是佢哋拎海綿浸滿酸酒，綁喺牛膝草*嘅稈上面，遞去佢嘴邊。 30 耶穌試一試啲酸酒，就話：「完成嘞！」然後垂低頭，斷咗氣*。

31 由於嗰日係預備日，而且嗰個安息日係大安息日，為咗避免屍體到咗安息日仲留喺苦刑柱上面，猶太人就請彼拉多派人打斷犯人嘅腳，將屍體攞走。 32 於是士兵嚟到，將第一個同耶穌一齊掛喺木柱嘅人嘅雙腳打斷，又將第二個人嘅雙腳打斷。 33 當佢哋去到耶穌嗰度，見佢已經死咗，就冇打斷佢對腳。 34 但係有一個士兵用矛插入去佢嘅肋骨旁邊，即刻有血同水流出嚟。 35 有個門徒*見到，就為呢件事作見證。呢個人嘅見證係真嘅，佢知道自己講嘅係真話，噉你哋就可以相信嘞。 36 發生呢啲事，其實係要應驗聖經所講嘅：「佢嘅骨連一條都唔會斷。」 37 聖經仲有一句說話噉樣講：「佢哋會注視佢哋用矛插嘅嗰位。」

38 呢啲事之後，亞利馬太嘅約瑟請求彼拉多俾佢領取耶穌嘅遺體。約瑟係耶穌嘅門徒，不過佢好怕啲猶太人*，所以係暗中做門徒嘅。彼拉多批准佢嘅請求，佢就去領取耶穌嘅遺體。 39 尼哥德慕都帶咗一大袋*用沒藥同沉香混合嘅香料嚟，呢個人第一次去見耶穌嗰陣係夜晚。 40 佢哋領取咗耶穌嘅遺體之後，按照猶太人安葬死者嘅習俗，用細麻布加上香料將遺體包好。 41 耶穌被處死*嘅地方附近有塊園地，入面有一個新嘅墓穴，從來冇安葬過死人。 42 由於嗰日係猶太人嘅預備日，墓穴又喺附近，佢哋就將耶穌安葬喺嗰度。

20 跟住嗰個星期嘅第一日，一朝早，天仲未光，末大拉人馬利亞就去到墓穴，見到墓穴入口嘅石頭移開咗。 2 於是佢跑去見西門·彼得同另一個門徒，即係耶穌對佢感情特別深嘅嗰個門徒。馬利亞同佢哋講：「主唔喺墓穴裡面呀。有人將佢移走咗，我哋唔知佢俾人放咗喺邊度。」

3 彼得同嗰個門徒就去墓穴。 4 佢哋兩個一齊跑，不過嗰個門徒跑得快過彼得，到咗墓穴先。 5 佢烏低身望入去，見到有啲細麻布喺度，不過佢冇入去。 6 跟住，西門·彼得都到咗，佢入咗墓穴，見到有啲細麻布喺嗰度。 7 原本包住耶穌個頭嘅布冇同其他布放埋一齊，而係捲埋放喺一邊。 8 到咗墓穴先嘅嗰個門徒都入埋去，佢見到，就相信之前聽到嘅消息。 9 但係佢哋當時仲未明聖經嘅意思，就係耶穌一定會死而復生。 10 之後兩個門徒就各自返屋企。

11 不過，馬利亞一直企喺墓穴外面喊。佢一邊喊，一邊烏低身望入墓穴， 12 就見到兩個著住白色衫嘅天使，坐喺本來安放耶穌遺體嘅地方，一個喺頭嗰邊，一個喺腳嗰邊。 13 佢哋同馬利亞講：「你點解喊呀*？」馬利亞同佢哋講：「有人將我嘅主移走咗，我唔知佢俾人放咗喺邊度呀。」 14 佢講完，擰轉身，見到耶穌企喺度，但係就認唔出呢個人係耶穌。 15 耶穌同佢講：「你點解喊呀？*你搵緊邊個呢？」馬利亞以為佢係園丁，就同佢講：「先生，如果係你移走咗佢，請話我知，你將佢放咗喺邊吖，我就領佢嘅遺體返去。」 16 耶穌同佢講：「馬利亞！」佢擰轉身，用希伯來語同耶穌講：「拉波尼！」（意思就係「老師！」） 17 耶穌同佢講：「唔好捉住我。我升上去見爸爸嘅時候仲未到呀！你去搵我嘅弟兄，同佢哋講：『我要升上去見我嘅爸爸，亦即係你哋嘅爸爸，見我嘅上帝，亦即係你哋嘅上帝。』」 18 末大拉人馬利亞就去將呢個消息同門徒講，佢話：「我見到主呀！」佢亦都話俾門徒知，主同佢講咗啲乜嘢。

19 嗰日係嗰個星期嘅第一日。呢一日就快結束嘅時候，門徒聚集埋一齊。佢哋好驚猶太人*，所以就鎖埋門。呢個時候，耶穌喺佢哋當中出現，同佢哋講：「願你哋平安。」 20 佢講完呢句說話，就俾佢哋睇佢雙手同肋骨旁邊嘅傷痕。門徒見到主，就好開心。 21 耶穌再同佢哋講：「願你哋平安。爸爸點樣派我嚟，而家我都點樣派你哋去。」 22 佢講完呢句說話，就向佢哋吹氣，同佢哋講：「領受神聖力量啦。 23 你哋寬恕邊個嘅罪，佢就係已經得到寬恕嘅；你哋唔寬恕邊個嘅罪，佢就係冇得到寬恕嘅。」

24 多馬又叫做「雙胞胎」，佢係十二使徒之一。耶穌出現嘅時候，多馬冇同佢哋一齊。 25 其他門徒就同佢講：「我哋見到主呀！」但係多馬就話：「除非我見到佢雙手嘅釘痕，用手指掂吓，又用手掂吓佢肋骨旁邊嘅傷痕，如果唔係，我絕對唔會信。」

26 八日之後，耶穌嘅門徒又聚集喺一間屋入面，多馬都同佢哋一齊。雖然啲門係鎖住嘅，但係耶穌喺佢哋當中出現，佢話：「願你哋平安。」 27 然後佢同多馬講：「擺隻手指喺度吖，睇吓我雙手嘅釘痕。伸手掂吓我肋骨旁邊嘅傷痕。唔好再懷疑嘞，要相信！」 28 多馬就同佢講：「我嘅主，我嘅神！*」 29 耶穌同佢講：「你係咪因為見到我先至相信呢？嗰啲冇見過就相信嘅人幾咁有福*。」

30 其實，耶穌喺門徒面前仲施行咗好多神跡，但係冇寫喺呢卷書上面， 31 而寫低落嚟嘅事，係想令你哋相信耶穌係基督，係上帝嘅仔，你哋亦都因為呢種信心，可以通過佢嘅名得到生命。

21 後嚟，耶穌喺提比里亞海*再次喺門徒面前出現。事情嘅經過係噉嘅： 2 當時西門·彼得、叫做「雙胞胎」嘅多馬、加利利嘅迦拿人拿但業、西庇太嘅兩個仔，仲有兩個門徒都喺嗰度。 3 西門·彼得同佢哋講：「我去打魚呀。」佢哋話：「我哋都同你一齊去。」佢哋就上船出海，不過嗰一晚乜嘢都捉唔到。

4 啱啱天光嘅時候，耶穌企喺海灘，但係門徒認唔出佢係耶穌。 5 耶穌就同佢哋講：「仔呀，你哋係咪冇嘢食呀？*」佢哋答：「冇呀！」 6 耶穌同佢哋講：「喺船嘅右邊撒網，就會捉到魚嘞。」於是佢哋撒網，真係捉到好多魚，拉唔到個網上嚟。 7 耶穌所愛嘅嗰個門徒就同彼得講：「係主啊！」當時西門·彼得冇著衫*，一聽到係主，就著返件外衣*，跳落海。 8 其他門徒留喺船上面，將嗰個裝滿魚嘅漁網拉過嚟。當時佢哋距離岸邊唔係好遠，大約只係90米*。

9 佢哋上岸之後，見到一堆炭火，上面有魚有餅。 10 耶穌同佢哋講：「攞幾條你哋頭先捉到嘅魚過嚟吖。」 11 於是西門·彼得上船，將漁網拖上岸，網入面嘅都係大魚，一共有153條。雖然有咁多魚，但係漁網冇爛到。 12 耶穌同佢哋講：「過嚟食早餐吖。」冇一個門徒敢問佢係邊個，因為佢哋都知道呢個人就係主。 13 耶穌行過去，遞啲餅俾佢哋，亦都將魚遞俾佢哋。 14 呢個係耶穌死而復生之後，第三次喺一班門徒面前出現。

15 食完早餐之後，耶穌就同西門·彼得講：「約翰嘅仔西門，你係咪愛我多過愛呢啲嘢呀？」佢同耶穌講：「主啊，係呀，你知我對你嘅感情好深㗎。」耶穌同佢講：「你要餵養我嘅羊仔。」 16 第二次耶穌又同佢講：「約翰嘅仔西門，你愛唔愛我呀？」佢同耶穌講：「主啊，愛呀，你知我對你嘅感情好深㗎。」耶穌同佢講：「你要牧養我嘅小綿羊。」 17 耶穌第三次同佢講：「約翰嘅仔西門，你對我嘅感情深唔深呀？」彼得就好憂愁，因為耶穌第三次問佢：「你對我嘅感情深唔深呀？」於是佢同耶穌講：「主啊，你咩都知，你知我對你嘅感情好深㗎。」耶穌同佢講：「你要餵養我嘅小綿羊。 18 我可以好肯定噉同你講，你年輕嘅時候，自己著衫，想去邊就去邊。但係到你老嘞，你會伸對手出嚟，有人會同你著衫，帶你去你唔願意去嘅地方。」 19 佢噉樣講，係表示彼得將會點樣死，令上帝得到榮耀。佢講完呢番話，就同彼得講：「繼續跟隨我啦。」

20 彼得擰轉身，見到耶穌所愛嘅嗰個門徒，喺後面跟住佢哋。嗰個門徒就係喺晚餐嘅時候向後挨喺耶穌胸前，問「主啊，係邊個出賣你？」嘅嗰個人。 21 彼得一見到佢，就同耶穌講：「主啊，呢個人將來會點呀？」 22 耶穌答彼得：「如果我嘅意願係要佢生存到我嚟嘅時候，又同你有乜嘢關係呢？你繼續跟隨我啦。」 23 結果，呢句說話喺弟兄之間傳開，話嗰個門徒唔會死。其實，耶穌冇話嗰個門徒唔會死，而係話：「如果我嘅意願係要佢生存到我嚟嘅時候，又同你有乜嘢關係呢？」

24 為呢啲事作見證，又寫低落嚟嘅，就係呢個門徒。我哋知道佢作嘅見證係真嘅。

25 其實，耶穌仲做咗好多嘢，如果將所有細節寫低，我諗成個世界都唔會有足夠嘅空間容納呢啲書卷。