“願人讚賞你明白事理”

呢句話係古代以色列人大衛講嘅，當時佢稱讚緊一個女子。嗰個女子叫做亞比該。大衛點解稱讚佢？我哋又可以從亞比該身上學到乜嘢呢？

大衛喺逃避掃羅王嘅追捕嗰時遇到亞比該。當時，亞比該已經係拿八嘅妻子。拿八係一個有錢人，佢將所有嘅牲畜都放養喺猶大南部嘅山區。大衛同佢嘅手下“好似圍牆一樣”保護拿八嘅羊群同僕人。後來，大衛派人見拿八，求佢“手頭有乜嘢多出嚟嘅”就俾佢哋做食物。（撒母耳記上25:8,15,16，英語《聖經新世界譯本》）大衛同佢嘅手下咁用心保護拿八嘅財物，噉嘅要求一啲都唔過分。

拿八嘅名，意思係“無知”或者“蠢才”，佢真係人如其名。拿八粗暴無禮噉拒絶大衛嘅請求。佢毫不講理，令大衛覺得受到冒犯，所以大衛準備去對付佢。拿八同佢嘅屋企人會因為佢嘅愚蠢而付出代價。（撒母耳記上25:2-13,21,22）

亞比該睇出，拿八行事魯莽會帶嚟好嚴重嘅後果，所以佢果斷採取行動。亞比該恭敬噉懇求大衛考慮佢自己同上帝嘅關係。然後，亞比該為呢位以色列嘅下一任君王大衛同佢手下提供充足嘅食物。另一方面，大衛睇出耶和華通過亞比該嚟阻止自己，免得自己做出一啲得罪上帝嘅事。大衛同亞比該講：“願人讚賞你明白事理，又願你蒙福，因為你今日阻止我流血害命”。（撒母耳記上25:18,19,23-35）

拿八對大衛一啲感激之心都冇，我哋肯定唔想好似佢噉樣對待嗰啲幫助過我哋嘅人。再加上，如果我哋知道有啲唔好嘅事即將會發生，我哋就應該盡己所能去化解。的確，我哋同詩篇執筆者有同感，佢同上帝講：“求你教我行善明理，求取知識”。（詩篇119:66）

如果其他人通過我哋嘅行為，睇出我哋明白事理、有智慧，無論佢哋有冇講出嚟，佢哋嘅感受都可能會同大衛一樣：“願人讚賞你明白事理”！