遵行耶和華嘅旨意會帶嚟祝福

1923年，我喺英國約克郡嘅一個小鎮赫姆斯沃思出世。我有個哥哥，佢叫鮑勃。我九歲嗰時，爸爸唔鍾意偽善嘅宗教，佢得到一啲揭露錯誤宗教嘅書，嗰啲書令佢留低深刻嘅印象。幾年之後，鮑勃·阿特金森嚟拜訪我哋，同埋用留聲機播放一個盧述福弟兄嘅演講俾我哋聽。我哋發覺呢個演講同嗰啲書係嚟自同一個組織嘅！於是，爸爸媽媽邀請阿特金森弟兄每晚都留低食飯，解答我哋好多嘅聖經問題。之後，我哋受邀請去一個弟兄屋企參加聚會，嗰度離我哋屋企幾英里。我哋好快就接受真理，一群好細嘅會衆亦都喺赫姆斯沃思成立。冇幾耐我哋有機會接待周遊監督（而家叫分區監督），仲邀請附近嘅先驅一齊食飯。同佢哋一齊交往真係令我受到好大嘅鼓勵。

嗰陣我哋一家人開始做生意，但係爸爸同哥哥講：“如果你想做先驅，我哋就要放棄呢啲嘢嘞。”鮑勃覺得爸爸講得好啱，所以佢21歲就離開屋企做先驅。兩年之後，我16歲嗰時都被委派做先驅。我除咗週末同其他人傳道之外，平時都係一個人用見證卡同留聲機傳道。但係耶和華祝福我，幫我揾到一個進步得好快嘅聖經學生，而且佢好多家人後來都接受真理。跟住第二年，我同瑪麗·亨歇爾被派到柴郡做特别先驅，嗰度係一個未分配俾任何會衆嘅地區。

到咗第二次世界大戰中期，婦女都要參加支持戰爭嘅活動。我哋作為特别先驅，做全時傳道員，以為可以同其他宗教嘅傳教士一樣得到豁免權。但係法庭唔同意，我被判坐監31日。第二年，我19歲嗰陣登記自己因良心緣故拒絶參加支持戰爭嘅活動。後來我兩次被控告要上法庭，但係我嘅案件竟然被撤銷咗，無罪釋放。呢啲經歷幫助我睇出耶和華通過聖靈幫助我，佢嘅手一直扶持我，使我堅定剛强。（以賽亞書41:10,13）

一個新同伴

1946年我認識阿瑟·馬修斯。佢因良心緣故拒服兵役而被判入獄三個月，佢一坐完監，就搬去赫姆斯沃思，同佢弟弟丹尼斯一齊，佢弟弟係個特别先驅。阿瑟嘅爸爸自細就教佢哋認識耶和華，佢哋十幾歲就受咗浸。好快丹尼斯被委派去愛爾蘭，所以阿瑟冇同伴。阿瑟係個年輕又熱心嘅先驅，我嘅父母對佢印象好好，就邀請阿瑟同佢哋一齊住。我去探父母嗰陣，食完飯之後都會同阿瑟幫手洗碗。後來我哋開始通過寫信保持聯繫。1948年期間，阿瑟再次被判監三個月。我哋1949年1月結婚，大家都有同樣嘅目標，就係想一直留喺全時服務嘅崗位上。所以我哋做好計劃，利用假期去農場工作賺啲錢，同埋有耶和華嘅祝福，我哋就可以繼續做先驅。

一年之後，我哋被派去北愛爾蘭。首先去阿馬，之後去紐利，呢啲主要係天主教嘅城鎮。當地嘅宗教偏見好强烈，所以我哋要好小心噉向人傳道。我哋喺一對見證人夫婦屋企舉行聚會，大概有八個人參加，嗰度離我哋屋企16公里（10英里）。有時我哋會留喺佢哋屋企過夜，我哋會打地鋪同埋第二日會享受豐富嘅早餐。今日，我哋真係好開心見到嗰度嘅地區有好多耶和華見證人。

“我哋去！”

我哥哥同佢太太洛蒂喺北愛爾蘭做特别先驅，1952年，我哋四個人一齊參加喺貝爾法斯特嘅區域大會。當時有個弟兄好慷慨噉提供地方俾我哋同普賴斯·休斯一齊住，佢係英國嘅分部僕人。有一晚，我哋討論啱啱發行嘅册子《上帝嘅道就係愛》（英語），呢本册子專門係為咗愛爾蘭人出版嘅。普賴斯弟兄話俾我哋知，愛爾蘭共和國嘅天主教徒好難接受真理。嗰度好多弟兄俾人趕走，冇地方住，而且當地嘅神父仲煽動群衆用暴力對待佢哋。普賴斯弟兄話：“為咗參加一個好特别嘅活動，我哋需要有車嘅夫婦，將呢本册子分發到全國各地。”a我哋即刻話：“我哋去！”就係故事開頭講嘅嗰句話嘞。

去都柏林嘅先驅，通常都可以住喺親切嘅拉特蘭姊妹屋企，佢係一個忠貞事奉耶和華多年嘅姊妹。我哋喺佢屋企逗留咗一段時間，跟住賣咗啲私人物品，之後四個人逼上鮑勃嗰架有邊車嘅三輪摩托車，打算去揾一架汽車。我哋終於揾到一架好適合嘅二手車，由於我哋冇人識得揸車，所以問賣主可唔可以揸過嚟。當日阿瑟成晚都坐喺張床度，模仿點樣揸車換擋嘅動作。第二日朝早佢試吓將架車從車庫揸出嚟嗰陣，特派傳道員米爾德麗·威利特（佢之後同約翰·巴爾結婚）就嚟到。原來米爾德麗識得揸車！阿瑟跟佢學咗少少之後，而家我哋可以出發嘞！

下一步我哋需要揾一個住宿嘅地方。弟兄提醒我哋唔好住喺活動房屋車，因為反對我哋嘅人可能會放火燒車，所以我哋要揾一間屋，不過揾唔到。嗰晚我哋四個人就瞓喺架車入面。第二日，我哋淨係揾到一架簡陋嘅活動房屋車，入面得張好細嘅碌架床。嗰度就成為我哋嘅屋企嘞。傳道探訪嗰陣，有啲比較友善嘅農民容許我哋將架車停喺佢哋度，真係冇諗到，我哋一次都冇遇到襲擊。我哋傳道嘅地區有16至24公里（10至15英里）咁大。之後我哋去到下一個地區傳道，都會返去探訪嗰啲曾經俾我哋停車嘅住户。

我哋探訪晒愛爾蘭共和國東南部嘅所有住户，基本上冇咩大問題發生。我哋分發咗超過兩萬本册子，同埋將感興趣人士嘅資料交俾英國分部辦事處。而家嗰度已經有數以百計嘅見證人，真係好大嘅祝福啊！

返到英國，之後去蘇格蘭

後來，我哋派咗去倫敦南部。過咗幾個星期之後，英國分部辦事處打電話俾阿瑟，叫佢第二日就開始做探訪工作！參加完一個星期嘅培訓之後，我哋就派去蘇格蘭探訪會衆。雖然阿瑟冇咩時間準備演講，但係佢好積極接受新委派，真係好鼓勵我。我哋真係好鍾意探訪工作。我哋曾經喺一啲未分配俾任何會衆嘅地區服務咗幾年，而家可以經常見到咁多弟兄姊妹，真係一個好大嘅福分。

1962年，阿瑟受到邀請參加基列學校為期10個月嘅課程，由於我唔可以同佢一齊去，所以我哋要做一個重要嘅決定。雖然我哋難免要分開一段日子，我哋都認為阿瑟接受呢個特别嘅邀請係啱嘅。因為我冇咗傳道同伴，所以就被派返去赫姆斯沃思做特别先驅。一年之後阿瑟返嚟，我哋就受委派去做區域探訪嘅工作，地區包括蘇格蘭、英國北部同愛爾蘭北部。

愛爾蘭嘅一個新委派

1964年，阿瑟收到一個新委派，成為愛爾蘭共和國嘅分部僕人。一開始我好擔心接受呢個新改變，因為我哋好鍾意從事探訪工作。而家諗翻轉頭，我真係好開心有機會喺伯特利服務。如果一個委派係你唔鍾意嘅，但係你都願意接受嘅話，我相信耶和華都會祝福你。我喺伯特利嘅委派包括辦公室文職、打包書刊、廚師同埋清潔。有一段時間，我哋亦都做探訪工作，有機會認識全國各地嘅弟兄姊妹，同埋見到聖經學生成為我哋嘅弟兄姊妹，使愛爾蘭成為一個團結嘅屬靈大家庭，真係一個好大嘅祝福啊！

愛爾蘭屬靈嘅里程碑

1965年，第一個愛爾蘭嘅國際大會喺都柏林舉行。b即使受到各方面嘅反對，呢個大會依然順利舉行。一共有3948人參加，65人受浸。有份提供住宿俾3500位國際代表嘅人都收到一封嚟自愛爾蘭分部辦事處嘅感謝信，而呢啲提供住宿嘅人對國際代表嘅好行為都好讚賞。對愛爾蘭嚟講，呢次大會的確係一個屬靈嘅里程碑。

1966年，南愛爾蘭同北愛爾蘭都一同屬於都柏林分部辦事處督導。呢種團結同當地分裂嘅政治同宗教形成强烈對比。能够見到咁多天主教徒接受真理，同曾經係基督新教徒嘅弟兄一齊並肩事奉上帝，我哋真係好感動啊！

委派完全改變

2011年，當英國分部同愛爾蘭分部合併嗰陣，我哋嘅生活完全改變。我哋被派去倫敦伯特利，收到呢個消息嘅同時，阿瑟被確診患有柏金遜症，我好擔心佢嘅健康。2015年5月20日，我66年嘅同伴離世。

最近呢幾年，我感到心碎、灰心同痛苦。過去咁多年來阿瑟都喺我身邊，我真係好掛住佢啊！但係經歷過呢啲事，會使你更加親近耶和華。我發覺好多人都好愛阿瑟，令我得到好大嘅安慰。我收到愛爾蘭、英國，甚至美國朋友嘅來信。除咗呢啲信之外，阿瑟嘅弟弟丹尼斯，仲有佢嘅太太梅維斯，同埋我兩個姪女露絲同朱迪，佢哋嘅幫助真係難以用言語嚟表達。

以賽亞書30:18嘅經文真係好鼓勵我，經文話：“耶和華必然等候，要恩待你哋，佢要起嚟向你哋發慈悲。因為耶和華係主持公正嘅上帝。等候佢嘅人都係有福嘅。”我覺得最大嘅安慰，就係知道耶和華都喺度耐心等候，佢會喺新世界解決我哋所有嘅難題，同埋會俾我哋振奮人心嘅委派。

回顧我哋嘅一生，我睇到耶和華點樣指引同祝福愛爾蘭嘅傳道工作。我好榮幸可以喺當地屬靈發展出一分力。毫無疑問，如果我哋遵行耶和華嘅旨意就一定會得到祝福！