你知唔知道？

猶太人嘅乜嘢習慣導致耶穌譴責發誓？

根據摩西律法，猶太人有時都會發誓。不過，耶穌嗰個時代嘅人為咗證明自己講嘅話係真嘅，就喺日常生活中經常發誓，呢種做法毫無意義。所以，耶穌兩次譴責佢哋，而且教導佢哋話：“你哋嘅話，係就應該話‘係’，唔係就應該話‘唔係’。”（馬太福音5:33-37；23:16-22）

《新約神學詞典》（英語）話：“猶太人經常通過發誓去證明佢哋所講嘅話係真嘅”，通過《塔木德》可以睇出呢一點，因為呢本書非常仔細噉列出邊啲誓言可以生效，邊啲可以作廢。

唔係只有耶穌譴責人濫用發誓嘅行為。例如，猶太歷史學家約瑟夫斯提到一個猶太教派，話：“佢哋會避免發誓，因為佢哋覺得發誓比作假見證嘅罪更加嚴重，佢哋覺得如果一個人要用發誓嚟證明自己講嘅話係真嘅，噉佢就已經有罪嘞。”同樣，稱為“便西拉智訓”，或者“德訓篇”嘅猶太次經嘅23:11講：“一個人經常發誓嘅話，佢嘅内心已經犯罪。”如果我哋總係講真話，就唔使通過發誓嚟證明自己講嘅話係可信嘅。難怪耶穌譴責嗰啲濫用發誓嘅人。