“慷慨嘅人必然蒙福”

獻祭一直係正確崇拜重要嘅一環。以色列人用動物獻祭，而基督徒就“以讚美為祭”，呢個係衆所周知嘅。但係，仲有其他獻祭嘅方式係上帝好鍾意嘅。（希伯來書13:15,16）呢啲獻祭嘅方式會帶嚟喜樂同獎賞。請睇吓以下嘅例子。

古代有一個忠僕叫哈拿，佢好想有個仔，不過一直懷唔到孕。佢向耶和華禱告，話如果佢可以生一個仔，就會“將佢一生獻俾耶和華”。（撒母耳記上1:10,11）哈拿後來有咗，生咗個仔起名叫撒母耳。等撒母耳斷奶之後，哈拿就按照誓願將佢送去聖殿。由於哈拿嘅自我犧牲精神，耶和華獎賞佢。後來哈拿生咗五個仔女，而撒母耳成為咗先知同聖經執筆者。（撒母耳記上2:21）

今日嘅基督徒都好似哈拿同撒母耳一樣，有殊榮可以獻出自己嘅一生事奉造物主。耶穌保證，我哋為咗事奉耶和華所作出嘅任何犧牲，都會為我哋帶嚟豐盛嘅獎賞。（馬可福音10:28-30）

公元一世紀，有個基督徒婦女叫多加，佢為人“樂善好施”，有犧牲精神。但係，可惜“佢患病死咗”，成個會衆都因為呢件事好傷心。當門徒聽到彼得喺附近，就去懇求佢，希望佢可以即刻過嚟。請想像一下，當彼得嚟到復活多加嗰時，佢哋幾咁開心！呢次係聖經第一次提到使徒復活死人。（使徒行傳9:36-41）通過多加嘅例子我哋可以睇出，上帝冇忘記多加所作出嘅犧牲。（希伯來書6:10）仲將佢嘅慷慨行為記載喺聖經裏面，作為我哋效法嘅榜樣。

使徒保羅係另一個慷慨嘅榜樣，佢好樂意為弟兄姊妹付出時間同精力。佢寫信俾哥林多會衆話：“就我而言，我為咗你哋嘅性命，絶對樂意犧牲，甚至犧牲一切。”（哥林多後書12:15）保羅通過自己嘅個人經歷學到，獻出自己為其他人服務，唔單止令自己有滿足感，更重要嘅係可以得到耶和華嘅悦納同獎賞。（使徒行傳20:24,35）

通過呢啲例子我哋可以知道，耶和華睇到我哋用自己嘅時間同精力嚟促進王國嘅工作以及幫助信徒同工，佢一定好開心。噉我哋有冇其他方法可以支持王國嘅傳道工作呢？當然有！除咗傳道之外，我哋仲可以通過自願捐款嚟榮耀上帝。呢啲捐款會用嚟推廣全球傳道工作，包括支持特派傳道員同特别全時僕人，仲會用嚟製作同翻譯書刊以及影片，賑災，建造王國聚會所。呢一切都係通過自願捐款嚟支持嘅。我哋可以肯定，“慷慨嘅人必然蒙福”。而且，我哋將自己最好嘅獻俾耶和華，就會為佢帶嚟榮耀。（箴言3:9；22:9）