耶和華凡事都可能

從天光做到天黑

1937年，我喺吉爾吉斯斯坦托克馬克鎮附近嘅一個集體農莊出世。我嘅家族都係吉爾吉斯人，我哋都講吉爾吉斯語。我父母都係農莊嘅工人，佢哋喺集體農莊由朝到晚都要工作。農莊會定期分配食物俾工人，不過一年就只發一次工資。媽媽除咗工作仲要照顧我同妹妹，真係非常唔容易。我只係讀咗5年書，之後都要全日喺農莊工作。

我住嘅地方非常貧窮，要好辛苦工作先可以維持生活。我年輕嗰時，冇點諗過人生有乜嘢意義或者未來會點樣。我從來都冇諗過耶和華上帝同佢美好嘅旨意會改變我嘅一生。聖經嘅好消息點樣傳到吉爾吉斯斯坦？後來又點樣喺本地傳講開去？呢個係一個振奮人心嘅故事，而一切都係從我家鄉吉爾吉斯斯坦嘅北部開始嘅。

曾經被放逐嘅人將真理帶到吉爾吉斯斯坦

20世紀50年代，關於耶和華上帝嘅真理開始喺吉爾吉斯斯坦扎根。但係如果要將真理傳開去，首先要幫人消除一種根深蒂固嘅思想。點解？嗰時嘅吉爾吉斯斯坦係蘇聯嘅一個成員國，而全蘇聯嘅耶和華見證人喺政治上都保持中立。（約翰福音18:36）所以，佢哋被視為共産主義嘅敵人而遭受迫害。但係，任何思想觀念都唔能够阻止上帝嘅話語打動誠心正意嘅人嘅心。冇錯，喺我漫長嘅一生當中，我學到最有價值嘅一課就係，耶和華“凡事都可能”。（馬可福音10:27）

耶和華見證人受到嘅迫害，反而使好消息喺吉爾吉斯斯坦得以擴展。點解會噉？被視為國家敵人嘅人會被放逐到蘇聯嘅西伯利亞。呢啲人被釋放之後，好多都會嚟吉爾吉斯斯坦，當中有啲人認識聖經真理。其中一個就係埃米爾·揚岑，1919年佢喺吉爾吉斯斯坦出世。後來，埃米爾被韞喺勞動營，喺嗰度認識見證人。佢接受咗真理，喺1956年返翻自己家鄉。埃米爾喺索庫盧克附近住落嚟，呢個地方就喺我家鄉附近。1958年，吉爾吉斯斯坦第一個會衆就喺索庫盧克成立。

大約一年之後，維克托·温特爾搬到索庫盧克。呢位忠心嘅弟兄遭受咗一次又一次嘅迫害。佢因為嚴守中立，兩次被判監三年，然後又坐多十年監，之後再被流放五年。不過，迫害並冇阻止正確崇拜嘅擴展。

真理傳到家鄉

1963年，吉爾吉斯斯坦大約有160個見證人。佢哋大多數都嚟自德國、烏克蘭同俄羅斯。其中一位叫做愛德華·瓦爾特，佢1924年喺德國受浸。20世紀40年代，納粹黨將佢關喺集中營。幾年之後，蘇聯政府又將佢放逐。1961年，呢個忠心嘅弟兄搬咗去離我家鄉好近嘅坎特鎮。

伊利莎白·福特呢個忠心嘅姊妹都住喺坎特。佢靠同人做衫嚟維持生活。由於佢手工精細，連醫生、教師呢啲專業人士都揾佢做衫。伊利莎白有個客人叫阿克薩邁·蘇丹阿利耶娃，佢先生係檢察院嘅一個官員。有一日阿克薩邁嚟揾伊利莎白做衫，傾開計嘅時候，佢問咗伊利莎白好多問題，關於人生意義同人死後嘅情況。伊利莎白用聖經回答咗佢所有問題。後來，阿克薩邁亦都熱心向人傳講聖經嘅好消息。

大約喺呢個時候，嚟自摩爾多瓦嘅尼古拉·坎波耶什被委派做分區監督，一做就做咗差唔多30年。尼古拉除咗探訪會衆之外，仲要安排書刊嘅印製同分派工作。結果，當局開始留意佢。所以，愛德華·瓦爾特就鼓勵尼古拉話：“如果國安會嘅人審問你，你就望實佢，直接話俾佢哋知，我哋嘅刊物係布魯克林總部提供嘅。你唔使驚佢哋㗎。”（馬太福音10:19）

之後冇幾耐，國安會真係傳召尼古拉去佢哋喺坎特嘅總部。佢描述跟住落嚟發生嘅事，話：“國安會嘅人問我，啲書刊係點嚟嘅。我話俾佢知，係從布魯克林嚟嘅。佢見我咁坦白，都唔知點回應好。佢只係叫我離開，之後就再冇傳召過我。”呢啲勇敢無畏嘅見證人，喺我家鄉吉爾吉斯斯坦嘅北部繼續小心謹慎噉將好消息傳講開去。喺20世紀80年代，我嘅家人終於有機會聽到耶和華寶貴嘅真理，第一個聽到嘅就係我太太米琳卜布。

太太好快就睇出呢個係真理

米琳卜布係吉爾吉斯斯坦嘅納倫州人。1974年8月，有一日，佢去探我妹妹。喺妹妹屋企，我哋第一次見面。我對米琳卜布一見鍾情，就喺當日同佢結咗婚。

1981年1月，米琳卜布坐巴士去當地市場嗰時，無意中聽到文章開頭嘅嗰句話。我太太想知多啲，就問嗰個女子叫咩名同住喺邊。佢話自己叫亞普，不過就冇講自己住邊度。喺20世紀80年代，見證人仲係受到禁制，所以佢要小心謹慎。於是，佢問我太太住喺邊。我太太返到屋企嗰時好興奮。

米琳卜布話：“我聽到一啲好奇妙嘅事。一個女子話俾我知，人好快就唔使再面對死亡，連野獸都會變得好温馴。”對我嚟講，呢番話聽起嚟就好似天方夜譚噉。不過，我同太太講：“不如佢過嚟嗰時，我哋再聽吓佢點講。”

三個月之後，亞普嚟探訪我哋。喺之後嘅幾次探訪當中，我哋有機會認識一啲吉爾吉斯族早期嘅見證人。呢啲姊妹幫助我哋認識耶和華同埋佢對人類嘅旨意。佢哋又向我哋讀出《從樂園嘅失落到樂園嘅復得》呢本書嘅内容。a不過，由於呢本書喺托克馬克鎮只得一本，於是我哋就為自己手抄咗一個副本。

我哋首先學到嘅就係創世記3:15嘅預言。上帝嘅彌賽亞君王耶穌會實現呢個預言。人人都需要聽見呢個重要信息，所以我哋真係應該要熱心宣揚聖經嘅好消息！（馬太福音24:14）聖經真理好快就改變咗我哋嘅人生。

喺禁制下聚會同受浸

托克馬克嘅一個弟兄邀請我哋去參加一場婚禮。我同太太好快就發現見證人嘅行為同其他人好唔一樣。婚禮整個過程都好有秩序，宴席上冇提供酒，同我哋參加過嘅其他婚禮真係好唔同。喺嗰啲婚禮，客人經常飲醉酒，又鬧事，仲講粗口。

我哋又參加咗托克馬克會衆嘅基督徒聚會。天氣好嘅時候，聚會會喺樹林裏面舉行。由於弟兄姊妹知道警察會監視我哋，所以弟兄會安排人負責把風。到咗冬天，我哋就會喺室内舉行聚會。有幾次，警察嚟到聚會嘅地方查問我哋喺度做乜嘢。所以，當1982年7月我同太太米琳卜布一齊喺楚河受浸嗰時，大家都要好小心。（馬太福音10:16）弟兄幾個幾個噉分批到達樹林，聚集之後，大家就一齊唱王國詩歌，聽浸禮演講。

把握機會擴大服務

1987年，有個弟兄叫我去巴雷克奇鎮探訪一位對聖經感興趣嘅人。從我住嘅地方出發，要坐四個鐘頭火車先可以去到嗰度。之後我哋又去咗幾次巴雷克奇做傳道，發現嗰度有好多人對真理感興趣。我哋睇出，呢個係擴大服務嘅好機會。

我同米琳卜布經常去巴雷克奇。通常，我哋週末都會留喺嗰度做傳道同埋舉行基督徒聚會。越來越多當地人想睇我哋嘅書刊，於是出版物嘅需求量激增。我哋將書刊放入用嚟裝薯仔嘅麻包袋，從托克馬克帶過去。每個月帶兩大袋書刊過去都滿足唔到佢哋嘅需求。喺坐火車去巴雷克奇同埋返屋企嘅路上，我哋都可以同其他乘客作見證。

我哋探訪巴雷克奇8年之後，1995年，當地成立咗第一個會衆。咁多年來，喺托克馬克同巴雷克奇走嚟走去，我哋用咗唔少錢。我哋經濟能力有限，點會有咁多錢呢？其實，有個弟兄經常資助我哋，彌補我哋嘅不足。耶和華睇見我哋想擴大傳道工作，於是佢為我哋“打開天上嘅水閘”。（瑪拉基書3:10）冇錯，耶和華的確凡事都可能！

忙於照顧家人同傳道工作

1992年，我受到委任，成為國内第一個吉爾吉斯族嘅長老。喺我家鄉托克馬克會衆，有一道新嘅傳道大門打開咗。我哋向當地學校嘅吉爾吉斯族學生作見證，結果好多年輕人都跟我哋學習聖經。其中一個聖經學生而家做咗分部委員會成員，另外仲有兩個而家係特别先驅。同時，我哋都盡力幫助參加聚會嘅人。喺20世紀90年代初，我哋只有俄羅斯語嘅出版物，聚會都係用俄羅斯語舉行嘅。不過，母語係吉爾吉斯語嘅會衆成員越來越多。所以，我就喺聚會做傳譯，幫助大家更容易明白聖經真理。

我哋嘅仔女越來越多，所以我同米琳卜布都要忙於照顧家人，帶佢哋去傳道同埋參加聚會。啲仔女都鍾意熟記經文。我哋嘅女古爾薩拉12歲就好鍾意做街頭見證，向路人傳講聖經嘅信息。由於自細就養成呢啲好習慣，所以而家，我哋嘅仔女同埋孫仔孫女都積極參與會衆活動。而家我仲有9個仔女同11個孫仔孫女在生，其中16個有啲已經事奉耶和華，有啲就跟緊父母參加聚會。

驚人嘅增長

20世紀50年代，有啲弟兄姊妹嚟到我哋嘅地區開展傳道工作。如果佢哋見到呢度嘅改變一定會好驚訝。例如，自從20世紀90年代以來，我哋喺宣揚好消息，以及舉行聚會同大會方面享有更多自由。

1991年，我同太太去哈薩克斯坦嘅阿拉木圖，第一次參加區域大會。1993年，吉爾吉斯斯坦嘅弟兄喺比什凱克嘅斯巴達克運動場舉行第一次區域大會。大會之前，傳道員用咗一個星期嚟做清潔。運動場嘅負責人深受感動，於是將場地免費提供俾我哋使用。

1994年，本地嘅屬靈發展達到一個新嘅里程碑——我哋嘅刊物首次以吉爾吉斯語嚟發行。而家比什凱克分部有一個翻譯小組將刊物翻譯成吉爾吉斯語。1998年，吉爾吉斯斯坦嘅耶和華見證人獲得法律認可，成為合法嘅宗教團體。我哋嘅傳道員不斷增多，而家人數已經超過5000。今日，我哋總共有83群會衆，仲有25個分别係漢語、英語、吉爾吉斯語、俄羅斯語、俄羅斯手語、土耳其語、維吾爾語同烏兹别克語嘅小組。呢啲親愛嘅弟兄姊妹雖然背景唔同，但係都團結一致事奉耶和華。呢啲驚人嘅增長都係耶和華成就嘅，佢的確凡事都可能。

耶和華亦都改變咗我嘅一生。我喺一個卑微嘅農村家庭長大，只係讀過5年書。不過，耶和華俾我有機會做長老，又可以教導嗰啲讀書比我多嘅人聖經真理。無論幾咁不可思議嘅事，耶和華都可以成就。的確，耶和華“凡事都可能”。我所經歷嘅一切，推動我繼續忠貞噉為佢作見證。（馬太福音19:26）