你知唔知道？

司提反遭受迫害嗰陣點解可以咁平靜？

司提反面對一班對佢充滿敵意嘅人。猶太公議會係以色列嘅最高法庭。公議會嘅71個成員係猶太人當中最有權勢嘅人。幾個月之前，大祭司該亞法召集公議會成員，審判並處死咗耶穌。（馬太福音26:57,59；使徒行傳6:8-12）嗰啲充滿敵意嘅人亦都將司提反押到公議會。正當佢哋陸續帶嚟嘅假見證人誣告司提反嘅時候，佢哋留意到“司提反嘅面貌好似天使嘅面貌”，就覺得非常驚訝。（使徒行傳6:13-15）

喺當時嘅情況下，司提反遭受咁多威迫、恐嚇，點解仲可以保持沉着冷靜呢？俾人拉去公議會受審之前，司提反喺聖靈嘅推動下，熱心執行自己嘅委派。（使徒行傳6:3-7）審訊期間，同一股聖靈喺佢身上發揮作用，使佢得到安慰，記起學過嘅知識。（約翰福音14:16）使徒行傳第7章記載咗司提反點樣為自己辯護。經文描述，聖靈幫助司提反記起二十幾段希伯來語經文。（約翰福音14:26）司提反亦都喺異象入面見到耶穌企喺上帝嘅右邊，信心更加受到强化。（使徒行傳7:54-56,59,60）

有朝一日我哋都可能會面對恐嚇同迫害。（約翰福音15:20）我哋經常閲讀上帝嘅話語並熱心參與傳道，聖靈就可以作用喺我哋身上。噉樣，我哋亦都可以同司提反一樣，有力量抵受反對，同時保持内心平靜安寧。（彼得前書4:12-14）