喺語言繁多嘅地區傳道，要互相合作

當人聽到用自己母語傳達嘅王國信息，往往會有較好嘅反應。好可能因為呢個原因，喺公元33年五旬節，即使當時嘅猶太人以希伯來語或者希臘語作為通用語言，但係耶和華特意安排“天下各國虔誠嘅猶太人”，可以用佢哋“生來所用嘅語言”聽見好消息。（徒2:5,8）今日，有啲地方住咗好多講唔同語言嘅人，所以喺同一個社區可能有唔同語言嘅會衆，噉呢啲會衆可以點樣互相合作，向地區嘅所有人作見證，而同時又避免重複探訪，以至令住户反感呢？

• 

  商量（箴15:22）：各會衆嘅傳道監督應該一齊商量，制定一個大家都接受嘅方案，以有系統嘅方式作見證。如果一個外語會衆嘅傳道地區唔係好大，就可能唔想你嘅會衆探訪佢哋地區嘅住户。不過，如果情況相反，外語會衆嘅地區好大，住户亦分得好散，唔一定可以經常探訪所有住户。佢哋就可能想請你嘅會衆照常探訪所有住户，只係當揾到感興趣嘅外語人士嗰陣，就通知佢哋。（《組織》93頁37段）可能外語會衆亦會請你嘅會衆幫手揾出外語人士，然後將外語人士嘅地址轉交俾佢哋。（《月報》2012/7刊5頁附欄）要記住，住喺同一間屋嘅人，佢哋嘅母語亦有可能會唔同。另外，傳道安排亦應該要符合當地嘅個人資料私隱條例。

• 

  合作（弗4:16）：要仔細聽從傳道監督嘅任何指示。你有冇主持緊一啲聖經課程，而呢啲學生最熟悉嘅語言其實唔係你會衆嘅語言呢？如果你將學生轉交俾附近講嗰種語言嘅會衆或者小組，話唔定佢會進步得更加快。

• 

  準備（箴15:28；16:1）：如果你傳道嗰陣，咁啱遇到個講外語嘅住户，就要把握機會向佢作見證。你可以預先諗吓傳道嗰陣會遇到講乜嘢語言嘅人，然後做好準備，下載定嗰啲語言嘅聖經同影片。你亦可以運用JW Language應用程式學習用呢啲外語同人打招呼。