傳道嘅成果——田地“已經發白，可以收割莊稼嘞”

1,2． （甲）耶穌講咗啲乜嘢，門徒唔明白？（乙）耶穌講嘅係乜嘢收割工作？

耶穌同門徒講：“舉目睇吓啲田，已經發白，可以收割莊稼嘞。”門徒唔明呢句話，覺得好奇怪。佢哋望去耶穌指嘅方向，只係見到田裏面一片綠油油，全部都係啱啱發芽嘅大麥，邊度睇得到成熟嘅大麥呢？門徒可能心諗：“收割乜嘢呀？仲要等好幾個月先可以收割喎！”（約翰福音4:35）

² 不過，耶穌講嘅唔係實際嘅收割，而係屬靈嘅收割，要收嘅莊稼代表人。耶穌趁呢個機會教導門徒兩個同屬靈收割有關嘅重要道理。乜嘢道理呢？等我哋先嚟睇吓呢件事嘅背景。

投入工作，一定得到喜樂

3． （甲）點解耶穌對門徒講，田地“已經發白，可以收割莊稼嘞”？（見腳注）（乙）耶穌點樣幫門徒明白佢嘅意思？

³ 公元30年年底，喺撒馬利亞嘅叙加城附近，耶穌同門徒講咗上面呢番話。當時門徒入咗城，耶穌喺井邊遇到一個婦人，就主動同佢講屬靈嘅事。婦人覺得好奇妙，佢好快就睇出耶穌教嘅道理非常重要。門徒返到耶穌身邊嗰時，婦人就即刻趕返去叙加城，將自己學到嘅事話俾城裏面嘅人知。佢嘅話引起佢哋嘅好奇心，好多人跑去井邊見耶穌。可能就喺嗰陣，耶穌望去田地嗰邊，睇到遠處有一班撒馬利亞人過緊嚟，於是同門徒講：“睇吓啲田，已經發白，可以收割莊稼嘞。”a耶穌想門徒明白收割嘅莊稼係屬靈嘅而唔係實際嘅，佢跟住話：“收割嘅人……收聚得永生嘅穀實”。（約翰福音4:5-30,36）

4． （甲）關於屬靈嘅收割工作，耶穌教門徒邊兩個道理？（乙）我哋會討論乜嘢問題？

⁴ 關於屬靈嘅收割工作，耶穌教導門徒邊兩個重要道理呢？第一，收割工作係當務之急。佢話俾門徒知，田地“已經發白，可以收割莊稼嘞”，意思係叫佢哋馬上投入工作。為咗令門徒緊記收割工作有幾咁迫切，耶穌又話：“而家收割嘅人得到報酬”。冇錯，當時嘅屬靈收割工作而家已經開始咗，唔應該耽誤時間！第二，工人充滿喜樂噉收割莊稼。耶穌話，撒種嘅同收割嘅會“一同歡喜”。（約翰福音4:35下，36）耶穌見到好多撒馬利亞人都信從佢，一定覺得好欣慰。同樣，佢嘅門徒全心投入收割工作，亦都肯定充滿喜樂。（約翰福音4:39-42）聖經嘅呢個記載對我哋有特别嘅意義。今日，有史以來最偉大嘅屬靈收割工作正喺度進行緊。耶穌嘅話使我哋知道，呢段時期會有乜嘢事發生。現代嘅收割工作喺幾時開始呢？有邊啲人參與呢件工作呢？有乜嘢成果呢？

君王領導有史以來最偉大嘅收割工作

5． （甲）邊個領導全球嘅收割工作？（乙）約翰睇到嘅異象點樣表明，收割工作係當務之急？

⁵ 喺使徒約翰睇到嘅異象裏面，耶和華透露佢委派咗耶穌去領導全球嘅屬靈收割工作。（請讀啟示錄14:14-16）異象裏面嘅耶穌頭戴金冠，手攞鐮刀。耶穌“頭戴金冠”顯示佢係在位嘅君王；“手拎住鋒利嘅鐮刀”顯示佢係收割嘅人。為咗强調收割工作係當務之急，耶和華通過天使宣布地上嘅莊稼“熟透嘞”。冇錯，“收割嘅時刻到嘞”，唔可以拖延嘞！耶穌聽從上帝嘅吩咐，伸出鐮刀，地（指地上嘅人）就收割好嘞。呢個振奮人心嘅異象再次提醒我哋，田地“已經發白，可以收割莊稼嘞”。通過異象，我哋可唔可以睇出全球嘅收割工作喺幾時開始呢？可以！

6． （甲）收割時期幾時開始？（乙）“地上嘅莊稼”幾時開始被收割？請解釋。

⁶ 根據啟示錄14章嘅記載，約翰喺異象裏面睇到，負責收割嘅耶穌頭戴金冠（14節），顯然呢件事係耶穌喺1914年登基之後發生嘅。（但以理書7:13,14）過咗一段時間，耶穌奉命開始收割（15節）。事情嘅先後次序，同小麥嘅比喻裏面提到嘅次序吻合。耶穌解釋小麥嘅比喻嗰時，話：“收割莊稼嘅時候就係呢個制度嘅末期”。所以，收割時期同埋呢個制度嘅末期係同時開始嘅，就係1914年。（馬太福音13:30,39）回顧過去，今日我哋可以睇出，收割工作實際上係耶穌登基幾年之後先開始嘅。點解噉講呢？從1914年到1919年初，耶穌先潔淨佢嘅受膏門徒。（瑪拉基書3:1-3；彼得前書4:17）然後喺1919年，“地上嘅莊稼”開始被收割。於是，耶穌就任用佢新委派嘅忠信奴隸，幫助啲弟兄明白傳道工作係當務之急。等我哋嚟睇吓當時有咩事發生。

7． （甲）弟兄點樣睇出傳道工作係非常緊迫嘅？（乙）上帝嘅組織鼓勵弟兄姊妹點樣做？

⁷ 英語版《守望台》1920年7月刊話：“仔細查考聖經之後，我哋睇出上帝嘅子民得到一個好光榮嘅任務，就係傳講上帝嘅王國。”例如，從以賽亞嘅預言，弟兄睇出上帝王國嘅好消息一定會喺世界各地廣傳開去。（以賽亞書49:6；52:7；61:1-3）佢哋唔知道點樣完成呢個工作，但係深信耶和華一定會打開出路。（請讀以賽亞書59:1）上帝嘅組織更清楚噉睇出傳道工作非常緊迫，就鼓勵弟兄姊妹努力傳道。佢哋有咩反應呢？

8． 喺傳道工作方面，弟兄喺1921年已經領會到邊兩個要點？

⁸ 英語版《守望台》1921年12月刊話：“1921年係成果最好嘅一年。今年聽到聖經真理嘅人比以往任何一年都要多。”雜誌又話：“要做嘅工作仲有好多。……等我哋懷住喜樂嘅心去做。”請留意，關於傳道工作，弟兄領會嘅兩個要點，同耶穌要使徒謹記喺心裏面嘅一樣：傳道工作係當務之急；上帝嘅僕人充滿喜樂噉傳道。

9． （甲）關於收割工作，1954年有一期《守望台》點樣講？點解會有噉嘅成果？（乙）過去50年，各地傳道員嘅人數有乜嘢增長？（見附表“各地傳道員人數嘅增長”）

⁹ 喺上個世紀30年代，弟兄明白到會有一大群“另外嘅綿羊”接受上帝王國嘅信息，就進一步加緊傳道活動。（以賽亞書55:5；約翰福音10:16；啟示錄7:9）有咩成果呢？傳講上帝王國嘅人數大幅度上升。1934年，只有4萬1000人傳道；到1953年，傳道員嘅數目已經增加到50萬！英語版《守望台》1954年12月1日刊講得好啱：“全靠耶和華嘅靈同佢嘅話語所發揮嘅力量，全球嘅收割工作先可以有咁豐盛嘅成果。”b（撒迦利亞書4:6）

生動嘅比喻預示收割嘅成果

10,11． 關於種子嘅生長，芥籽嘅比喻强調咗乜嘢？

¹⁰ 耶穌講咗唔少同上帝王國有關嘅比喻，生動噉預告收割工作會有乜嘢成果。接落嚟，我哋會講吓芥籽嘅比喻同埋酵嘅比喻，集中睇吓呢兩個比喻點樣喺最後嘅日子應驗。

¹¹ 芥籽嘅比喻 有一個人將一粒芥籽種落田度，後來芥籽長成一棵樹，連雀仔都嚟樹上棲息。（請讀馬太福音13:31,32）關於芥籽嘅生長，呢個比喻强調乜嘢呢？（1）生長嘅速度快到令人難以想像。芥籽雖然“比地上嘅一切種子都細”，但係“生出大枝”，成為一棵大樹。（馬可福音4:31,32）（2）芥籽一定會生長。種子“撒下之後，長起嚟”。請留意，耶穌唔係話“可能會長大”，而係話“長起嚟”。乜嘢都唔能够阻止芥籽嘅生長。（3）呢棵生長緊嘅樹吸引咗好多雀仔嚟，為佢哋提供棲息嘅地方。“天上嘅飛鳥都嚟”，“喺佢蔭下棲息”。呢三點同現代嘅屬靈收割工作有乜嘢關係呢？

12． 芥籽嘅比喻同今日嘅收割工作有乜嘢關係？（另見附表“聖經課程嘅數目不斷增加”）

¹² （1）增長嘅速度：呢個比喻强調，上帝王國嘅信息不斷傳講開去，基督徒會衆嘅人數不斷增多。自從1919年以來，熱心嘅收割工人被召集到復興咗嘅基督徒會衆裏面。當時工人嘅數目雖然少，但增長得好快。從上世紀初到今日，增長嘅速度的確令人驚嘆。（以賽亞書60:22）（2）必然嘅結果：基督徒會衆嘅增長，邊個都阻止唔到。上帝嘅敵人蓄意迫害真基督徒，就好似將一層又一層嘅石頭壓喺細細粒嘅種子上面，存心要阻止種子嘅生長。即使係噉，種子都可以破土而出，繼續生長。（以賽亞書54:17）（3）棲息嘅地方：“天上嘅飛鳥”喺樹上棲息，象徵心地正直嘅人接受上帝王國嘅好消息，成為基督徒會衆嘅一分子。佢哋嚟自大約240個國家同地區，人數有好幾百萬。（以西結書17:23）喺基督徒會衆裏面，佢哋唔單止得到屬靈嘅食物，亦都得到安舒同保護。（以賽亞書32:1,2；54:13）

13． 關於增長過程，酵嘅比喻强調乜嘢？

¹³ 酵嘅比喻 有個女人將酵放喺麪粉裏面，結果成團麪都發咗起嚟。（請讀馬太福音13:33）關於增長嘅過程，呢個比喻强調乜嘢呢？我哋會討論吓兩點。（1）引起改變：酵使麪團發起嚟，“直到成團麪都發咗酵”。（2）遍布各處：將酵放落“二十升麪粉”裏面，使成團麪全部都發起嚟。呢兩點同屬靈嘅收割工作有乜嘢關係呢？

14． 酵嘅比喻同今日嘅收割工作有乜嘢關係？

¹⁴ （1）改變： 酵象徵上帝王國嘅信息，麪團象徵人類。酵加入麪粉裏面，使麪粉發生變化。同樣，人接受王國信息之後，内心情況就會發生改變。（羅馬書12:2）（2）遍布各處： 發酵過程象徵上帝王國信息嘅傳播。就好似酵會使成團麪發起嚟，王國信息亦都不斷傳播開去，“直到地極”。（使徒行傳1:8）就算有啲國家禁止我哋嘅工作，我哋仲係會喺當地傳講上帝王國嘅信息，只係大多數人發覺唔到。

15． 以賽亞書60:5,22嘅話點樣應驗？（另見附欄“耶和華使凡事都可能”；附欄“微弱嘅國要變為强盛”）

¹⁵ 喺耶穌講呢啲比喻之前大約800年，耶和華已經通過以賽亞生動噉預告，現代屬靈收割工作會有幾大嘅規模，所得嘅成果又會帶嚟幾大嘅喜樂。c耶和華指出，從遠方嚟嘅人紛紛加入佢嘅組織。以賽亞書記載咗耶和華對“婦人”所講嘅話。呢個“婦人”象徵今日仲喺地上嘅受膏基督徒。耶和華話：“你睇見，就必喜形於色，心裏又激動又興奮，因為大海嘅財富必運嚟俾你，列國嘅資財亦歸你所有。”（以賽亞書60:1,4,5,9）呢番話講得一啲都冇錯！今日，忠心事奉耶和華多年嘅基督徒，親眼睇到當地嘅傳道員由區區幾個增加到千倍萬倍，又點會唔喜形於色呢！

耶和華嘅僕人都應該開心快樂

16,17． “撒種嘅同收割嘅都一同歡喜”，其中一個原因係乜嘢？（另見附欄“兩張傳單打動咗兩個人嘅心”）

¹⁶ 上面提到，耶穌對使徒講：“收割嘅人……收聚得永生嘅穀實，使撒種嘅同收割嘅都一同歡喜。”（約翰福音4:36）喺全球嘅收割工作中，點解我哋應該“一同歡喜”呢？有好多理由，而家討論吓其中三個。

¹⁷ 第一，我哋好高興喺傳道工作方面有耶和華做同工。我哋向人傳講上帝嘅王國，就係撒播王國真理嘅種子。（馬太福音13:18,19）我哋幫助其他人成為基督徒，就有收成嘞。無論係撒種嘅抑或收割嘅，當我哋懷住敬畏之心去睇耶和華點樣使王國真理嘅種子“發芽長高”，就會深深感到喜樂。（馬可福音4:27,28）有時撒落嘅種子可能要等一段時間先會發芽生長，而收割嘅會係其他人。英國有個受浸咗六十年嘅姊妹叫瓊，就有噉嘅經歷。佢話：“經常有人同我講，好多年前我曾經向佢傳道，將真理種子撒喺佢心裏面。後來有其他耶和華見證人教佢聖經，幫佢成為耶和華嘅僕人。起初種落嘅種子終於有咗收成，我真係好開心。”（請讀哥林多前書3:6,7）你有冇類似嘅經歷呢？

18． 哥林多前書3:8提到，我哋開心快樂嘅另一個原因係乜嘢？

¹⁸ 第二，我哋謹記保羅嘅話，就可以繼續喜樂噉執行傳道工作。保羅話：“各人必照自己嘅勞苦得自己嘅獎賞。”（哥林多前書3:8）每個人唔係照自己嘅成績，而係照自己喺工作上所付出嘅努力得獎賞。保羅嘅話真係好鼓勵人，喺反應唔好嘅地區堅守崗位嘅傳道員就更加受到鼓勵嘞！喺上帝眼中，每個見證人只要全心投入撒種嘅工作，就可以“多結果實”。所以，每個耶和華見證人都應該開心快樂。（約翰福音15:8；馬太福音13:23）

19． （甲）馬太福音24:14嘅預言同我哋嘅喜樂有乜嘢關係？（乙）就算自己仲未幫到其他人成為基督徒，我哋應該謹記乜嘢？

¹⁹ 第三，我哋因為傳道工作應驗咗聖經嘅預言而覺得好開心。請睇吓耶穌點樣回答幾位使徒嘅問題。佢哋嚟問耶穌：“你嘅臨在同呢個制度嘅末期，有咩徵象呢？”耶穌話俾佢哋知，末世徵象嘅一個特點係全球性嘅傳道工作。耶穌指嘅係咪幫助人成為基督徒嘅工作呢？唔係。耶穌講：“呢個王國嘅好消息會傳遍普天下，對所有國族作見證”。（馬太福音24:3,14）所以，傳講上帝嘅王國，就係撒播王國真理嘅種子，係末世徵象嘅一個特點。我哋傳講王國嘅好消息嗰時，應該謹記，就算自己仲未幫到其他人成為基督徒，亦都已經同對方做咗見證嘞。d無論其他人有乜嘢反應，我哋有份應驗耶穌嘅預言，亦都有榮幸做“上帝嘅同工”，真係值得開心啊！（哥林多前書3:9）

“從日出之地到日落之處”

20,21． （甲）瑪拉基書1:11嘅話點樣應驗？（乙）喺屬靈嘅收割工作上，你決心點樣做？點解？

²⁰ 公元一世紀，耶穌幫助使徒睇出，收割工作係當務之急。從1919年開始，耶穌亦都幫助現代嘅基督徒明白呢一點。所以，上帝嘅子民加緊傳道活動。事實證明，無論邊個都阻止唔到屬靈嘅收割工作。正如瑪拉基先知預告，今日“從日出之地到日落之處”都會有上帝嘅僕人執行傳道工作。（瑪拉基書1:11）的確，由日出到日落，即係由東到西，無論喺邊度，撒種嘅同收割嘅都並肩工作，一同歡喜。由日出到日落，亦即係由朝到晚，任何時候我哋都急切噉去做屬靈嘅收割工作。

²¹ 諗翻過去百幾年嘅歷史，我哋睇到上帝嘅一小群僕人已經增長千倍，變為强盛，心裏“又激動又興奮”，真係開心到不得了。（以賽亞書60:5,22）希望我哋每個人心裏面一直都有呢種喜樂，對“莊稼嘅主人”耶和華嘅愛有增無減。噉樣，我哋自然就會竭盡全力，完成有史以來最偉大嘅屬靈收割工作！（路加福音10:2）