賑災職務

1,2．（甲）猶地亞嘅基督徒面對乜嘢困境？（乙）為咗幫助猶地亞嘅基督徒，其他信徒點樣將愛心化作行動？

時間大約係公元46年，猶地亞正經歷緊嚴重嘅饑荒。由於糧食短缺，物價上漲，住喺嗰度嘅猶太裔基督徒買唔起食物。佢哋冇嘢食，如果繼續噉樣落去就會餓死。不過，佢哋好快就會體驗到耶和華點樣伸出援手保護佢哋，呢個係以往嘅基督徒從未經歷過嘅。跟住發生乜嘢事呢？

² 耶路撒冷同猶地亞嘅猶太裔基督徒正身受苦難。喺叙利亞嘅安提阿，猶太裔同非猶太裔嘅基督徒知道情況之後，就為佢哋籌集資金。跟住，佢哋選出巴拿巴同掃羅呢兩位負責嘅弟兄，將救援物資送去耶路撒冷，交俾會衆嘅長老。（請讀使徒行傳11:27-30；12:25）請想像一下，猶地亞處於困境嘅弟兄姊妹見到安提阿嘅弟兄姊妹向佢哋表現愛心，一定深受感動！

3．（甲）今日，上帝嘅子民點樣效法公元1世紀安提阿嘅基督徒？請舉例。（另見附欄“現代第一次大規模嘅救援行動”）（乙）呢一章我哋會討論乜嘢問題？

³ 呢件發生喺公元1世紀嘅事，係聖經首次記載有基督徒將救援物資運送俾其他地方嘅基督徒。今日，我哋都效法安提阿基督徒嘅榜樣。當我哋知道信徒同工喺其他地方遇到考驗或者災難嘅時候，就會援助佢哋。a為咗明白賑災工作同基督徒嘅其他職務有乜嘢關係，等我哋嚟討論一下同賑災職務有關嘅三個問題：點解我哋將賑災工作睇成係一個職務？賑災工作嘅目的係乜嘢？我哋點樣從賑災工作得益？

點解話賑災工作係“敬奉上帝”嘅一種方式

4．關於基督徒嘅職務，保羅同哥林多會衆講咗啲乜嘢？

⁴ 喺保羅寫俾哥林多會衆嘅第二封信入面，佢解釋基督徒有雙重職務。保羅嘅信雖然係寫俾受膏基督徒嘅，但係佢所講嘅話喺今日都適用於基督“另外嘅綿羊”。（約翰福音10:16）一方面，我哋嘅職務係“勸人同［上帝］和好嘅職務”，即係傳道同教導嘅工作。（哥林多後書5:18-20；提摩太前書2:3-6）另一方面，我哋嘅職務涉及到為信徒同工所做嘅事，就係保羅提到嘅“賙濟嘅事”。（哥林多後書8:4）喺“勸人同［上帝］和好嘅職務”同“賙濟嘅事”呢兩節經文裏面，譯成“職務”同“事”嘅詞都嚟自希臘語詞迪阿科尼阿。點解明白呢一點咁重要呢？

5．保羅表明賑災工作係基督徒嘅職務，點解明白呢點好重要？

⁵ 保羅使用同一個希臘語詞嚟描述呢兩件事，表明當時基督徒會衆嘅各種職務亦都包括賑災工作。佢之前講過：“職務各有唔同，但主係相同嘅。能力各有唔同，……呢一切都係同一股聖靈發揮力量嘅結果。”（哥林多前書12:4-6,11）事實上，保羅將會衆裏面各種各樣嘅職務睇成係“敬奉上帝”b嘅一種方式。（羅馬書12:1,6-8）所以佢認為用一部分時間嚟“賙濟聖民”係適當嘅。（羅馬書15:25,26）

6．（甲）點解保羅話賑災工作係崇拜上帝嘅一種方式？（乙）今日，我哋喺世界各地點樣執行賑災工作？（見214頁附欄“災難發生時！”）

⁶ 保羅幫助哥林多會衆明白到，點解賑災工作係佢哋職務嘅一部分，亦都係崇拜耶和華嘅一種方式。保羅又指出，基督徒提供救援係因為佢哋“順從基督嘅好消息”。（哥林多後書9:13）由於佢哋好想將基督嘅教導實踐出嚟，所以採取行動幫助信徒同工。保羅話佢哋向弟兄姊妹表現愛心，其實係因為“上帝……非凡嘅分外恩典”。（哥林多後書9:14；彼得前書4:10）關於為有需要嘅弟兄姊妹服務，包括賑災工作，《守望台》1975年12月1日刊（英語）明確指出：“毫無疑問，耶和華上帝同佢嘅愛子耶穌基督非常重視呢種服務。”的確，賑災工作係敬奉上帝嘅一種重要方式。（羅馬書12:1,7；哥林多後書8:7；希伯來書13:16）

賑災工作有明確嘅目的

7,8．我哋賑災工作嘅第一個目的係乜嘢？請解釋。

⁷ 我哋嘅賑災工作有乜嘢目的呢？保羅寫俾哥林多會衆嘅第二封信回答咗呢個問題。（請讀哥林多後書9:11-15）佢喺信中提到，通過參與“呢個賙濟衆人嘅任務”，即係賑災工作，可以達成三個重要嘅目的。等我哋嚟逐個分析一下。

⁸ 第一，我哋嘅賑災工作可以榮耀耶和華。請留意，喺上一段引錄嘅五節經文裏面，保羅多次提到耶和華上帝。使徒保羅話，賑災工作能够“激發人感謝上帝”，而且“多多流露對上帝嘅感謝”。（11,12節）佢提到賑災工作點樣使基督徒將“榮耀歸於上帝”同讚美“上帝……非凡嘅分外恩典”。（13,14節）關於賑災工作，保羅總結話：“願感謝歸於上帝”。（15節；彼得前書4:11）

9．賑災工作點樣有助於消除人對耶和華見證人嘅誤解？請舉例。

⁹ 今日，上帝嘅僕人都同保羅一樣，將賑災工作視為榮耀耶和華嘅機會，而且可以為上帝嘅教導增光。（哥林多前書10:31；提多書2:10）事實上，賑災工作往往可以有助於消除人對耶和華同見證人嘅誤解。例如：喺一個遭受颶風襲擊嘅地區，有位女士喺門口貼咗張告示：“耶和華見證人，請勿探訪。”後來有一日，佢見到救援人員喺佢屋企對面修復緊一間房屋。佢觀察呢啲態度友善嘅救援人員一段時間之後，就去打聽吓佢哋係乜嘢人。知道呢啲志願人員係耶和華見證人之後，佢覺得好驚訝，就話：“我誤會咗你哋嘞。”結果點呢？呢位女士將門口嘅告示攞翻落嚟。

10,11．（甲）有乜嘢例子表明我哋可以“大大彌補”信徒同工嘅“缺乏”？（乙）乜嘢出版物可以幫助救援人員？（另見附欄“救援人員嘅另一個工具”）

¹⁰ 第二，我哋可以“大大彌補”信徒同工嘅“缺乏”。（哥林多後書9:12上）我哋好想滿足弟兄姊妹嘅急切需要，幫助佢哋減輕痛苦。點解呢？因為基督徒會衆嘅成員都屬於“一個身體”，所以“身體一處受苦，各處就一同受苦”。（哥林多前書12:20,26）今日，好多弟兄姊妹受到弟兄之情同憐恤之心嘅推動，一收到通知就即刻放低手頭上做緊嘅事，帶埋工具去受災嘅地區，援助信徒同工。（雅各書2:15,16）例如喺2011年，一場海嘯襲擊日本之後，美國分部辦事處發咗一封信俾美國嘅地區建築委員會，問有冇“一啲符合資格嘅弟兄姊妹”可以去日本幫助重建王國聚會所。結果點呢？幾個星期之内，就有差唔多600位志願人員提交申請，而且仲願意自費飛到日本！美國分部辦事處話：“我哋真係估唔到有咁多人積極響應。”一個日本弟兄問一位外國嘅救援人員點解會嚟幫手嗰時，對方回答話：“我哋同日本嘅弟兄姊妹都係屬於‘一個身體’，我哋對弟兄姊妹嘅痛苦感同身受。”救援人員出於無私嘅愛心，甚至有時冒住生命危險去幫助信徒同工。c（約翰一書3:16）

¹¹ 其他人都好欣賞我哋嘅賑災工作。例如，2013年有一場災害襲擊美國阿肯色州，有份報紙報道咗見證人嘅志願者迅速採取行動。報道話：“耶和華見證人嘅志願者喺賑災方面組織得井井有條，天衣無縫。”正如使徒保羅所講嘅，我哋確實“大大彌補”咗弟兄姊妹嘅缺乏，滿足佢哋嘅需要。

12-14．（甲）點解幫助受災嘅弟兄姊妹恢復屬靈常規咁重要呢？（乙）弟兄姊妹嘅心聲點樣强調參與屬靈活動嘅重要性？

¹² 第三，我哋可以幫助受災嘅弟兄姊妹恢復屬靈常規。呢個點解咁重要呢？保羅提到嗰啲得到援助嘅人會受到感動而“多多流露對上帝嘅感謝”。（哥林多後書9:12下）如果受災嘅弟兄姊妹想向耶和華表達感激之心，有乜嘢比盡快恢復屬靈常規更好呢？（腓立比書1:10）《守望台》喺1945年指出：“保羅同意……收集捐款係因為可以幫助……有需要嘅弟兄姊妹得到一啲救援物資，噉樣佢哋就可以更有力量同熱心參與傳道工作。”今日，我哋嘅目的都一樣。當弟兄姊妹恢復傳道工作嘅時候，唔單止可以幫助受災嘅鄰居，仲可以强化自己。（請讀哥林多後書1:3,4）

¹³ 弟兄姊妹得到援助之後，重新開始傳道工作，亦都因為噉而得到强化。等我哋嚟聽吓佢哋嘅心聲。一個弟兄話：“我哋成家人可以去傳道真係好大嘅福分，當我哋努力去安慰其他人嘅時候，就唔會太過專注於自己嘅憂慮。”一個姊妹話：“專注屬靈嘅活動會令我忘記自己處於災難之中，俾到我安全感。”另一個姊妹話：“雖然好多嘢我哋都控制唔到，但係傳道可以幫助我哋一家人專注於未來嘅希望。我哋向人傳講新世界嘅希望，可以令我哋更加堅信一切將會煥然一新。”

¹⁴ 受災嘅信徒同工需要盡快恢復嘅另一個屬靈活動，就係參加聚會。請睇吓清子姊妹嘅經歷。當時清子差唔多60歲，佢喺一場海嘯之後失去咗一切，除咗佢着住嘅衫同涼鞋之外就乜都冇晒。佢好迷茫，唔知可以點樣生活落去。後來有位長老話俾清子知，佢安排咗大家喺佢嘅車入面照常舉行聚會。清子話：“呢位長老同太太，仲有另一個姊妹同我一齊坐喺車入面。聚會雖然好簡單，不過就好似一個奇迹噉，令我暫時忘記海嘯，感到内心安寧。嗰次聚會使我睇出，同基督徒交往有幾咁大嘅幫助。”另一個受災嘅姊妹參加聚會之後，話：“聚會使我可以有力量生存落去！”（羅馬書1:11,12；12:12）

賑災職務帶嚟恆久嘅益處

15,16．（甲）哥林多會衆同其他基督徒通過參與賑災工作得到乜嘢益處？（乙）今日，我哋參與賑災工作同樣得到乜嘢益處？

¹⁵ 當保羅提到賑災工作嘅時候，佢亦講到哥林多會衆同其他基督徒可以通過參與呢項工作得益。佢話：“佢哋［耶路撒冷得到援助嘅猶太裔基督徒］亦因為上帝賜俾你哋非凡嘅分外恩典，就切切想念你哋，為你哋懇切祈求。”（哥林多後書9:14）冇錯，由於哥林多嘅弟兄姊妹，包括非猶太裔嘅基督徒表現慷慨嘅精神，得到援助嘅猶太裔基督徒一定深受感動，為佢哋禱告，亦都更愛佢哋。

¹⁶ 《守望台》1945年12月1日刊（英語）運用保羅嘅話説明賑災工作對我哋嘅益處，話：“請想像吓，一個地方嘅聖民去援助另一個地方嘅聖民，噉樣做係幾咁團結啊！”今日嘅救援人員都有同感。一位參與過水災救援嘅長老話：“我覺得參與救援工作使我同弟兄姊妹比以往任何時候都更加親近。”一位受到援助嘅姊妹好感激噉話：“呢種深厚嘅弟兄之情，令我覺得自己好似已經喺樂園裏面一樣。”（請讀箴言17:17）

17．（甲）賑災工作點樣應驗以賽亞書41:13嘅話？（乙）點解賑災工作可以榮耀耶和華，而且使我哋更加團結？請舉例説明。（另見附欄“世界各地嘅志願人員參與救援工作”）

¹⁷ 當救援人員到達災區嗰陣，受災嘅弟兄姊妹特别感受到上帝確實履行咗佢嘅承諾：“我，就係你嘅上帝耶和華，正握住你嘅右手，同你講：‘你唔使怕，我必定幫助你。’”（以賽亞書41:13）一個劫後餘生嘅姊妹話：“睇到災難造成嘅破壞真係令我好絶望，但係耶和華向我伸出援手，通過弟兄姊妹幫助我，呢啲係難以用言語嚟形容嘅。”兩位長老喺天災之後代表佢哋嘅會衆寫咗一封信，話：“地震帶嚟好大嘅痛苦，但係我哋體驗到耶和華通過弟兄姊妹嚟幫助我哋。以前我哋只係讀過有關賑災工作嘅資料，不過而家就親身體驗到。”

你都可以出一分力

18．如果你想參與賑災工作，可以點做？（另見附欄“參與賑災工作改變佢嘅一生”）

¹⁸ 你想唔想感受吓賑災工作嘅喜樂呢？一般救援人員都係從參與建造王國聚會所嘅人當中選出嚟嘅。如果你有呢個打算，可以話俾會衆嘅長老知，你想申請參加王國聚會所建築工程。一位參與過多年賑災工作嘅長老提醒話：“你一定要收到賑濟委員會嘅正式邀請，先至可以前往災區。”噉樣，就可以使我哋嘅賑災工作有秩序噉進行。

19．我哋嘅賑災工作點樣有力噉表明我哋係真基督徒？

¹⁹ 基督吩咐門徒要“彼此相愛”，服從呢個吩咐嘅一個好方法就係參與賑災工作。我哋通過呢種方式表現愛心，就證明自己確實係基督嘅門徒。（約翰福音13:34,35）今日，有咁多弟兄姊妹甘心獻出自己，援助嗰啲忠貞支持上帝王國嘅人，為耶和華增光。呢個對我哋嚟講係幾咁大嘅福分啊！