更加要彼此鼓勵

1．點解使徒保羅勉勵當時嘅希伯來裔基督徒更加要彼此鼓勵？

點解我哋應該努力鼓勵人？我哋可以喺使徒保羅寫俾希伯來裔基督徒嘅書信入面揾到答案。保羅話：“要彼此關注，激發愛心，促進善行。唔好放棄聚會，好似有啲人習慣咗一樣，反而要彼此鼓勵。你哋既然睇見嗰個日子臨近，就更加要噉樣做。”（希伯來書10:24,25）不出五年，生活喺耶路撒冷嘅猶太裔基督徒就會睇出“耶和華顯赫嘅大日子”迫近，亦都意識到佢哋需要逃出呢座城，就好似耶穌吩咐嘅噉。（使徒行傳2:19,20；路加福音21:20-22）公元70年，羅馬人喺耶路撒冷執行耶和華嘅判決，呢個表明耶和華嘅大日子到咗嘞。

2．點解我哋而家更加要彼此鼓勵？

² 今日我哋可以確信，耶和華“非常可畏”嘅大日子已經臨近。（約珥書2:11）西番雅先知話：“耶和華嘅大日子臨近嘞，臨近嘞，飛快而嚟！”（西番雅書1:14）呢個預言都適用喺我哋而家嘅日子。既然耶和華嘅日子迫在眉睫，我哋就更加“要彼此關注，激發愛心，促進善行”。（希伯來書10:24）所以，我哋應該多啲關心弟兄姊妹，喺佢哋需要嘅時候鼓勵佢哋。

邊啲人需要受到鼓勵？

3．關於鼓勵，使徒保羅點樣講？（請睇吓課文開頭嘅圖片）

³ “人心擔憂，鬱鬱不樂；聽見良言，心裏歡喜。”（箴言12:25）我哋都好認同呢句話。好多時我哋都需要得到鼓勵。保羅所講嘅話表明，即使係有責任鼓勵人嘅弟兄，佢哋自己都需要受到鼓勵。佢寫信俾羅馬嘅基督徒話：“我好渴望見到你哋，將一啲屬靈嘅恩賜分俾你哋，使你哋堅定不移。或者應該講，我喺你哋嗰度，由於你我嘅信心彼此交流，大家就能够互相鼓勵。”（羅馬書1:11,12）保羅喺鼓勵人方面係一個非常好嘅榜樣，不過有時佢自己都需要受到强化。（請讀羅馬書15:30-32）

4,5．邊啲人需要得到鼓勵？點解？

⁴ 全時為耶和華服務嘅人都配受稱讚。為咗可以從事先驅工作，好多忠心嘅弟兄姊妹喺生活上作出好大嘅犧牲，特别先驅、伯特利成員、分區監督同佢哋嘅太太，以及喺遠程翻譯處服務嘅弟兄姊妹都一樣。佢哋所有人都甘願過自我犧牲嘅生活，使自己有更多時間事奉耶和華。所以，我哋好應該鼓勵佢哋。有啲弟兄姊妹好想繼續全時為耶和華服務，但係由於某啲原因，佢哋不得不離開自己嘅崗位。佢哋亦都好需要我哋嘅鼓勵。

⁵ 有啲弟兄姊妹為咗聽從“要同主内嘅人結婚”呢個勸告而保持獨身，佢哋都好需要受到鼓勵。（哥林多前書7:39）同樣，辛勤工作嘅太太都好想丈夫向佢哋表達愛意，感激自己所做嘅一切。（箴言31:28,31）嗰啲遭受迫害或者飽受疾病煎熬但依然保持忠心嘅基督徒，都好需要受到其他人嘅鼓勵。（帖撒羅尼迦後書1:3-5）耶和華同基督一定會安慰呢啲忠心嘅僕人。（請讀帖撒羅尼迦後書2:16,17）

長老要努力鼓勵人

6．我哋從以賽亞書32:1,2睇出，長老擔任點樣嘅角色？

⁶ 請讀以賽亞書32:1,2。我哋生活喺一個困難重重嘅時期，好容易會變得灰心沮喪。耶穌基督通過佢嘅受膏弟兄同埋屬於另外綿羊嘅“衆領袖”鼓勵我哋。呢啲長老唔係管轄其他人信心嘅“主人”，而係使弟兄姊妹得到快樂嘅“同工”。（哥林多後書1:24）

7,8．除咗言語上嘅鼓勵，長老仲可以點樣强化弟兄姊妹？

⁷ 使徒保羅係值得我哋效法嘅榜樣。佢寫信俾帖撒羅尼迦受迫害嘅基督徒話：“我哋既然對你哋深懷温情，就唔單止樂意將上帝嘅好消息傳俾你哋，連自己嘅性命都樂意俾你哋，因為你哋係我哋所疼愛嘅。”（帖撒羅尼迦前書2:8）

⁸ 只係言語上鼓勵人有時係唔够嘅。保羅同以弗所嘅長老講：“你哋都要……扶助軟弱嘅人，亦要謹記主耶穌嘅話。佢講過：‘施與比接受更快樂。’”（使徒行傳20:35）保羅除咗鼓勵弟兄姊妹，仲樂意為佢哋作出犧牲，“甚至犧牲一切”。（哥林多後書12:15）同樣，長老唔單止需要喺言語上鼓勵同安慰弟兄姊妹，仲要真誠噉向佢哋表現個人關注，使佢哋得到强化。（哥林多前書14:3）

9．長老可以點樣以鼓勵人嘅方式提出勸告？

⁹ 向人提出勸告都係强化人嘅一種方法。長老可以通過聖經學到點樣以鼓勵人嘅方式提出勸告。喺呢方面，復活後嘅耶穌為我哋立下傑出嘅榜樣。佢用强烈嘅措辭向小亞細亞某啲會衆提出勸告。俾勸告之前，佢先温和噉稱讚以弗所、别迦摩同推雅推拉會衆。（啟示錄2:1-5,12,13,18,19）佢同老底嘉會衆講：“我對邊個有深厚嘅感情，就責備邊個，管教邊個。所以你要熱心，亦要悔改。”（啟示錄3:19）長老向人提出勸告嘅時候，應該效法基督嘅榜樣。

唔係只有長老先有責任鼓勵人

10．我哋每一個人可以點樣强化其他人？

¹⁰ 鼓勵人，唔係只係長老嘅責任。保羅勸勉所有基督徒要“睇情況講强化人嘅好話，使聽見嘅人得益”。（以弗所書4:29）每一個人都應該敏於觀察其他人嘅需要。保羅同希伯來裔嘅基督徒講：“你哋要舉起下垂嘅手，挺直軟弱嘅膝，修平你哋所走嘅道路，使跛腳嘅唔會甩臼，反而得到醫治。”（希伯來書12:12,13）我哋所有人，即使係小朋友，都可以通過鼓勵嘅言詞强化其他人。

11．瑪爾特點樣得到幫助？

¹¹ 瑪爾特a姊妹曾經有一段時間患有抑鬱症。佢寫道：“有一日，我祈求耶和華俾我所需嘅鼓勵，跟住就遇到一位年長嘅姊妹。佢向我表現温情同憐恤，呢個正係當時我非常需要嘅。佢亦都同我分享佢自己遭遇過嘅一啲考驗，同我所經歷嘅好相似。之後我就覺得冇咁孤獨無助嘞。”呢位年長姊妹可能唔知道自己所講嘅話為瑪爾特帶嚟咁大嘅幫助。

12,13．我哋可以點樣實踐腓立比書2:1-4嘅原則？

¹² 保羅向腓立比會衆嘅所有成員提出勸告：“如果你哋靠基督得到鼓勵，從愛裏得到安慰，享有屬靈嘅交誼，心裏懷有温情憐恤，就應該使我嘅喜樂完完全全。噉樣，你哋要思想相同，愛心相同，齊心一意，想法一致。凡事都唔好好辯爭勝，唔好自命不凡，要謙卑，睇其他人比自己優越。各人唔好只顧自己嘅事，亦要顧及其他人嘅事。”（腓立比書2:1-4）

¹³ 冇錯，我哋所有人都應該盡力關心其他人，用“從愛裏得到［嘅］安慰”、“屬靈嘅交誼”同埋“温情憐恤”去鼓勵我哋嘅弟兄姊妹。

使人得到鼓勵嘅方法

14．使人得到鼓勵嘅一個方法係乜嘢？

¹⁴ 知道自己喺屬靈上幫助過嘅人繼續保持忠貞，使我哋得到好大嘅鼓勵。使徒約翰都有同樣嘅感受，佢話：“我聽見自己嘅兒女按真理行事，就冇乜嘢事更值得我感恩嘞。”（約翰三書4）好多先驅得知，自己多年前幫助過嘅人而家繼續保持忠貞，有啲仲成為先驅，一定大受鼓勵。如果有個先驅感到灰心，我哋幫助佢回想喜樂嘅經歷就可以鼓勵到佢。

15．我哋可以用乜嘢方法鼓勵嗰啲忠貞事奉耶和華嘅人？

¹⁵ 好多分區監督都講過，探訪完會衆之後，哪怕只係收到一張簡單嘅感謝卡，佢哋同太太都會受到鼓勵。長老、特派傳道員、先驅同埋伯特利成員忠貞噉為耶和華服務。如果我哋向佢哋表示感激，佢哋一定會大受鼓勵。

我哋可以點樣鼓勵人

16．我哋點樣做就可以鼓勵到人？

¹⁶ 我哋可能因為自己唔善於交談，就覺得好難鼓勵人。其實，鼓勵人唔一定要做好多嘢。同對方打招呼嗰陣，話唔定只係一個微笑就可以鼓勵到對方。如果佢睇嚟唔係咁開心，可能係有心事。呢個時候，我哋聆聽佢講話就可以俾到佢好大嘅安慰。（雅各書1:19）

17．一個年輕弟兄喺極度低落嘅時候點樣得到幫助？

¹⁷ 一個年輕嘅弟兄叫做亨利，佢幾個家人都離開咗真理。其中一個係佢爸爸，曾經係一位受人尊敬嘅長老。呢件事令亨利大受打擊。一位分區監督邀請亨利去咖啡廳，耐心聆聽佢表達自己心入面嘅感受。亨利受到鼓勵之後，明白到只有繼續保持忍耐先可以幫助家人返翻真理。佢從詩篇46篇、西番雅書3:17同馬可福音10:29,30得到好大嘅安慰。

18．（甲）關於鼓勵，所羅門王點講？（乙）保羅提出乜嘢建議？

¹⁸ 瑪爾特同亨利嘅例子表明，我哋可以喺弟兄姊妹需要安慰嘅時候鼓勵佢哋。所羅門王話：“口善回答，自覺歡喜；講話合時，真係美好！眼睛明亮，心就歡喜；有好消息，骨也豐潤。”（箴言15:23,30）另外，閲讀《守望台》或者組織嘅網站可以使情緒低落嘅人重新振作。保羅所講嘅話表明，大家一齊唱王國詩歌係一個使人得到鼓勵嘅方法。佢話：“要用詩篇、讚美上帝嘅詩歌、洋溢恩慈嘅屬靈歌曲，不斷彼此教導勸戒，從心底歌頌耶和華。”（歌羅西書3:16；使徒行傳16:25）

19．點解我哋越來越需要互相鼓勵？我哋應該點樣做？

¹⁹ 隨住耶和華嘅大日子“臨近”，我哋更加需要互相鼓勵。（希伯來書10:25）保羅話：“要不斷彼此鼓勵，互相强化，就好似你哋而家所做嘅噉”。（帖撒羅尼迦前書5:11）如果我哋按照保羅嘅建議去做，就會感到非常喜樂。