讀者來函

耶穌喺犧牲之前嗰晚提到嘅“恩主”指嘅係乜嘢人？點解佢哋有噉嘅頭銜？

喺犧牲前一晚，耶穌勸使徒唔好喺信徒當中追求顯要嘅地位。佢話：“列國嘅君王主宰人民，掌權治理佢哋嘅稱為‘恩主’。不過你哋唔好噉樣。”（路加福音22:25,26）

耶穌所講嘅“恩主”指嘅係乜嘢人呢？我哋從一啲銘文、錢幣同著作可以睇到，古代嘅希臘同羅馬社會習慣用施惠者或者恩主呢啲頭銜嚟榮耀著名人物同埋統治者。呢啲人之所以得到尊榮，係因為佢哋為民衆提供咗一啲重要嘅服務。

好多君王都有“恩主”呢個頭銜，包括埃及王托勒密三世（約公元前247-222年）同托勒密八世（約公元前147-117年）、羅馬統治者尤利烏斯·凱撒（公元前48-44年）同奧古斯都（公元前31年－公元14年），以及猶地亞王希律大帝。希律大帝可能因為喺饑荒期間為民衆提供穀物同衣物而得到呢個頭銜。

根據德國聖經學者阿道夫·德斯曼所講，“恩主”呢個頭銜用得好廣泛。佢話：“從銘文搜集信息一啲都唔難，用少少時間就可以揾到超過100處［用到呢個頭銜］。”

噉耶穌對佢嘅門徒講“不過你哋唔好噉樣”，係乜嘢意思？耶穌係咪叫門徒唔好熱心參與公益活動，即係唔使關心周圍嘅人呢？當然唔係。睇嚟耶穌留意嘅係人表現慷慨嘅動機。

喺耶穌嘅日子，有錢人會贊助競技場嘅表演同運動，建造公園同神廟，以及支持其他類似嘅活動，以求得到好嘅名聲。不過，佢哋噉樣做嘅目的，係想獲得稱讚、人氣或者選票。一本參考書話，“雖然有啲人表現慷慨出於真誠，但係大多數人主要係為咗個人嘅政治利益。”所以，耶穌勸佢嘅門徒唔好有呢種野心勃勃同自私嘅精神。

幾年之後，保羅同樣强調咗呢個重要嘅原則，就係基督徒應該懷住正確嘅動機表現慷慨。佢寫信俾哥林多嘅信徒話：“每個人要照心裏所決定嘅去做，唔好勉强或者覺得被迫，因為上帝喜愛捐得快樂嘅人”。（哥林多後書9:7）