讀者來函

點解耶和華見證人將保羅描繪為禿頭或者頭髮稀疏嘅人？

今日冇人可以肯定保羅嘅外表係點樣嘅。我哋出版物入面嘅圖畫都係通過想像，而唔係基於考古文物嘅真實圖片畫出嚟嘅。

不過，我哋都同意對保羅外表嘅一啲公認嘅講法。例如，《錫安嘅守望台》1902年3月1日刊（英語）提到：“關於保羅嘅外表：……公元150年寫成嘅《保羅與德克拉行傳》嘅描述，可能係傳統上最為人接受嘅。呢本書將保羅嘅外表描述為‘矮細、禿頭、O形腿、强壯、一字眉、鼻長長。’”

《牛津基督教詞典》（1997年版）提到呢本古代作品話：“《行傳》所記載嘅一啲歷史細節有可能係真實嘅。”《保羅與德克拉行傳》成書之後嘅幾個世紀，已經存留有80本希臘語手抄本同其他語言版本，表明呢本書的確受人重視。所以，我哋出版物嘅圖畫都參考咗呢啲古代作品對保羅外貌嘅描述。

不過要記住，有其他嘢比保羅嘅外表更加重要。保羅傳道嘅時候，一啲膚淺嘅人批評佢話：“佢喺呢度嘅時候，為人軟弱無能，又冇口才。”（哥林多後書10:10）但係我哋唔好忘記，係耶穌使佢成為基督徒嘅。我哋都可以諗吓保羅“係［基督］揀選嘅器皿，［基督］要派佢向外邦人……傳揚［耶穌］嘅名”。（使徒行傳9:3-5,15；22:6-8）我哋仲可以諗吓，耶和華啟示保羅寫嘅聖經書卷對我哋有幾大嘅益處。

成為基督徒之前，佢冇誇耀自己世俗嘅成就，亦都冇講及佢自己嘅外表。（使徒行傳26:4,5；腓立比書3:4-6）佢承認：“我喺使徒當中係最細嘅，根本唔配稱為使徒”。（哥林多前書15:9）佢後來又話：“我連聖民中最細嘅都不如，但係上帝就將分外恩典賜俾我，叫我傳好消息俾外邦人，宣揚基督無法量度嘅屬靈財富”。（以弗所書3:8）顯然，保羅傳講嘅信息比佢嘅外表更加重要。