耶和華透露佢嘅旨意

1,2． 耶和華點樣透露佢對人類嘅旨意？

仁愛嘅父母商量家事嘅時候，會俾仔女加入討論。至於同仔女講幾多，父母自有分寸。佢哋淨係會講一啲仔女可以明白嘅細節。

² 同樣，耶和華逐步透露佢對人類家庭嘅旨意，不過只係會喺適當嘅時候噉樣做。等我哋回顧吓歷史，睇睇耶和華點樣將佢王國嘅真理揭示出嚟。

點解需要上帝嘅王國

3,4． 耶和華有冇預定人類嘅歷史點樣發展？請解釋。

³ 建立彌賽亞王國本來唔係耶和華嘅旨意。點解噉講呢？因為耶和華冇預定人類嘅歷史應該點樣發展。佢創造人類嘅時候，賜俾人選擇嘅自由。上帝話俾亞當同夏娃知，佢嘅旨意係要人“繁衍增多，遍滿地面，開拓大地”。（創世記1:28）耶和華仲要求佢哋遵守佢所定嘅善惡標準。（創世記2:16,17）亞當同夏娃本來可以選擇服從上帝。如果佢哋同子孫後代都噉樣做嘅話，今日成個地球都會係完美嘅人，齊心一致噉崇拜耶和華。我哋原本係唔需要基督所統治嘅王國嚟實現上帝旨意嘅。

⁴ 即使撒但、亞當同夏娃叛逆不忠，但係耶和華都冇改變原定嘅旨意，佢依然定意要完美嘅人遍滿大地，四海一家。為咗實現自己嘅旨意，耶和華可以靈活變通。火車一定要喺固定嘅軌道上面行駛先至可以到達目的地，一旦遇到突發情況仲可能發生脱軌。但耶和華就唔同嘞，佢講過要做嘅事，一定會成功，宇宙當中冇任何勢力可以阻止佢實現自己嘅旨意。（請讀以賽亞書55:11）如果一條路唔通，耶和華就會用另一條。a（出埃及記3:14,15）喺適當嘅時候，耶和華亦都會俾忠心嘅僕人知道，佢改用乜嘢方法實現自己嘅旨意。

5． 伊甸園嘅反叛事件發生之後，耶和華點樣做呢？

⁵ 伊甸園嘅反叛事件發生咗之後，耶和華先至定意要建立一個由彌賽亞統治嘅王國。（馬太福音25:34）喺人類冇晒希望嘅時候，耶和華就透露咗佢會用乜嘢方法挫敗撒但奪權嘅陰謀，消除撒但造成嘅傷害，俾人類恢復完美。（創世記3:14-19）不過，耶和華冇一下子披露晒所有同呢個王國有關嘅細節。

耶和華開始揭示同王國有關嘅真理

6． （甲）耶和華應許咗乜嘢呢？（乙）但佢冇透露乜嘢？

⁶ 耶和華喺佢講嘅第一個預言裏面，應許會有一個“苗裔”打碎蛇嘅頭。（請讀創世記3:15）當時，耶和華冇透露呢個苗裔同蛇嘅苗裔分别係邊個。耶和華講咗呢個預言之後，有差唔多兩千年嘅時間，冇進一步透露其他嘅細節。b

7． （甲）耶和華點解揀選亞伯拉罕？（乙）我哋從呢件事學到乜嘢？

⁷ 後來，耶和華揀選咗亞伯拉罕，而且應許“苗裔”會出自佢嘅世系。亞伯拉罕蒙耶和華揀選，係因為佢聽從耶和華嘅話。（創世記22:18）我哋從呢件事學到乜嘢呢？耶和華淨係向敬畏佢嘅人透露佢嘅旨意。（請讀詩篇25:14）

8,9． 關於預言提到嘅苗裔，耶和華向亞伯拉罕同雅各透露咗乜嘢？

⁸ 耶和華通過天使向佢嘅朋友亞伯拉罕講話，第一次透露咗佢應許嘅“苗裔”會係人類。（創世記22:15-17；雅各書2:23）呢個“苗裔”會點樣打碎蛇嘅頭呢？蛇指嘅係邊個呢？請留意耶和華進一步透露嘅細節。

⁹ 耶和華決定，“苗裔”會出自亞伯拉罕嘅孫雅各嘅家族，因為雅各對上帝顯出好大嘅信心。（創世記28:13-22）耶和華通過雅各預告，應許嘅“苗裔”會係雅各嘅仔猶大嘅後代，呢個後代會得到王權，“萬民都必歸順佢”。（創世記49:1,10）耶和華通過雅各所講嘅呢句話，表明“苗裔”會成為君王，統治萬民。

10,11． 耶和華點解向大衛同但以理透露佢嘅旨意？

¹⁰ 猶大去世之後大約650年，耶和華向猶大嘅後代大衛王進一步透露自己嘅旨意。耶和華話大衛係“一個合心意嘅人”。（撒母耳記上13:14；17:12；使徒行傳13:22）由於大衛有敬畏上帝嘅心，耶和華決定同佢立約，承諾佢嘅一個後代會永遠作王。（撒母耳記下7:8,12-16）

¹¹ 大約500年之後，耶和華通過先知但以理披露彌賽亞（受膏者）喺地上出現嘅確切年份。（但以理書9:25）喺耶和華眼中，但以理“係極可貴嘅”。點解呢？因為但以理深深尊崇耶和華，而且恆心事奉佢。（但以理書6:16；9:22,23）

12． 天使吩咐但以理點樣做？點解呢？

¹² 雖然耶和華啟示但以理同其他先知寫低好多同“苗裔”（彌賽亞）有關嘅細節，但係呢啲忠僕唔能够完全領悟其中嘅含意，因為耶和華所定嘅時間仲未到。舉個例子，但以理睇到一個異象，同上帝王國嘅建立有關。天使吩咐佢要用印封住自己所寫嘅預言，直到耶和華指定嘅時期。嗰時，“真確嘅知識就會豐富起嚟”。（但以理書12:4）

耶穌向人透露上帝嘅旨意

13． （甲）邊個係上帝應許嘅苗裔？（乙）耶穌點樣幫助人明白創世記3:15記載嘅預言？

¹³ 上帝清楚表明，大衛嘅後代耶穌就係上帝應許嘅苗裔，佢會永遠作王。（路加福音1:30-33；3:21,22）耶穌開始傳道，幫助人認識上帝嘅旨意，就好似太陽升起，照亮咗嗰啲處於屬靈黑暗嘅人噉樣。（馬太福音4:13-17）例如，當時嘅人唔清楚創世記3:14,15提到嘅“蛇”係指邊個。耶穌解開咗呢個謎，佢話魔鬼從最初就係“殺人兇手”，亦都係“謊話之父”。（約翰福音8:44）後來，耶穌向約翰傳達上帝嘅啟示，指出“最初嘅蛇，叫做魔鬼，又叫撒但”。c（請讀啟示錄1:1；12:9）耶穌喺同一個啟示裏面亦都表明，身為上帝應許嘅苗裔，佢最終會點樣鏟除撒但，實現上帝喺伊甸園講嘅預言。（啟示錄20:7-10）

14-16． 公元1世紀，耶穌向門徒講解真理，門徒係咪總係能够完全領悟其中嘅含意呢？請解釋。

¹⁴ 呢本書第1章講過，耶穌經常向人談論上帝嘅王國。不過，耶穌唔一定將門徒想知道嘅細節全部話俾佢哋知。耶穌講解真理，就算講得好具體好詳細，門徒通常要到後來，有時甚至到千幾年之後，先至可以完全領悟其中嘅含意。請睇吓以下一啲例子。

¹⁵ 公元33年，耶穌清楚表明，上帝會從地上揀選一啲人同王國嘅君王一齊統治，蒙揀選嘅人死咗之後會復活到天上成為靈體。當時門徒仲未可以領悟耶穌呢番話嘅意思。（但以理書7:18；約翰福音14:2-5）喺同一年，耶穌用比喻講明，佢升天之後，仲要等一段好長嘅時間，上帝嘅王國先至會建立。（馬太福音25:14,19；路加福音19:11,12）門徒亦都唔明白呢一點。點解噉講呢？因為耶穌復活之後，門徒嚟問佢：“主呀，你係咪要喺呢個時候為以色列復興王國？”當時耶穌冇進一步透露任何細節。（使徒行傳1:6,7）耶穌曾經教導門徒，佢仲有“另外嘅綿羊”，呢啲“綿羊”唔屬於“小群羊”，所以唔會同佢一齊作王。（約翰福音10:16；路加福音12:32）基督嘅門徒要到上帝嘅王國喺1914年建立之後好多年，先可以確切噉理解“小群羊”同“另外嘅綿羊”分别指邊啲人。

¹⁶ 耶穌喺地上嗰時，其實有好多事要話俾門徒知，但佢冇噉樣做，因為知道當時門徒承擔唔嚟。（約翰福音16:12）的確，耶穌教導門徒認識咗唔少同王國有關嘅真理，但喺公元1世紀，關於上帝王國嘅知識仲未豐富起嚟。

真確嘅知識會喺終結時期豐富起嚟

17． （甲）為咗明白上帝王國嘅真理，我哋應該點樣做？（乙）我哋仲需要邊個嘅幫助呢？

¹⁷ 耶和華話俾但以理知，喺“終結嘅時期”有好多人“來往奔走”，“真確嘅知識”會豐富起嚟，人就可以深入認識上帝嘅旨意。（但以理書12:4）邊個想得到呢啲知識，就要落一番功夫。一本參考書指出，譯做“來往奔走”嘅希伯來語動詞，有“從頭到尾仔細查考”嘅意思。但唔好忘記，如果唔係耶和華提供幫助，無論我哋幾咁仔細查考聖經，都唔能够確切理解上帝王國嘅真理。（請讀馬太福音13:11）

18． 點解話，敬畏耶和華嘅人既有信心，又好謙卑呢？

¹⁸ 1914年之前，耶和華逐步向人揭示佢王國嘅真理。喺呢個制度嘅終結時期，佢依然噉樣做。呢本書第4同第5章會講吓，過去一百年期間，上帝嘅子民唔止一次修正咗佢哋對王國真理嘅理解。噉係唔係話，佢哋冇耶和華嘅支持呢？唔係，耶和華一直喺背後支持佢哋。點解噉樣講呢？因為敬畏耶和華嘅人既有信心，又好謙卑，而信心同謙卑都係耶和華鍾意嘅特質。（希伯來書11:6；雅各書4:6）耶和華嘅僕人對聖經嘅應許有信心，佢哋相信呢啲應許全部都會實現。關於聖經嘅應許點樣實現，當佢哋睇出自己誤解咗，就會謙卑噉承認錯誤，就好似英語版《守望台》1925年3月1日刊所講：“我哋知道，主嘅話語，主自己會解釋。喺指定嘅時候，主會用最好嘅方式向佢子民清楚解釋佢嘅話語。”

19． 今日，耶和華令佢子民對佢嘅旨意有點樣嘅理解？點解呢？

¹⁹ 上帝嘅王國喺1914年建立，當時上帝子民對於王國嘅預言點樣應驗只有片面嘅理解。（哥林多前書13:9,10,12）由於好想睇見上帝嘅應許實現，有時上帝嘅子民作出咗錯誤嘅結論。上一段提到嘅《守望台》亦都話：“要明白預言嘅含意，睇嚟最保險嘅做法係等到預言應驗咗或者喺度應驗緊嘅時候。”時間證明噉樣做係明智嘅。目前嘅制度好快就會結束，關於上帝王國嘅預言，好多已經應驗或正喺度應驗緊嘞。上帝嘅子民有謙卑嘅心，甘願受耶和華糾正。所以，耶和華就令佢哋更全面噉理解佢嘅旨意。真確嘅知識確實豐富起嚟。

新嘅理解為上帝嘅子民帶嚟考驗

20,21． 對於新嘅理解，公元1世紀嘅基督徒有乜嘢反應？

²⁰ 每當耶和華幫助我哋對真理有更清晰嘅理解，我哋嘅内心情況就會顯露出嚟。如果我哋對上帝有信心，為人謙卑，就會樂意接受新嘅理解。公元1世紀中期，基督徒面對過噉樣嘅考驗。想像一下，假如你係嗰個時代嘅猶太人，已經歸信基督，但仲係深深尊重摩西律法，將佢睇成係猶太民族嘅驕傲。有一日，會衆讀出使徒保羅喺聖靈啟示下寫嘅信。信嘅内容係，摩西律法廢除咗嘞，耶和華已經捨棄以色列血統嘅人，轉而恩待屬靈嘅以色列，當中有猶太人亦都有外邦人。（羅馬書10:12；11:17-24；加拉太書6:15,16；歌羅西書2:13,14）你聽到呢啲信嘅内容，會有乜嘢反應呢？

²¹ 有啲基督徒謙卑噉聽從保羅嘅勸告，結果蒙耶和華賜福。（使徒行傳13:48）但有啲人就固執己見，點都唔願意接受新嘅理解。（加拉太書5:7-12）如果佢哋唔肯改變自己嘅睇法，就會失去同基督一齊作王嘅機會。（彼得後書2:1）

22． 上帝幫我哋更清晰噉理解佢嘅旨意，對於呢一點你有乜嘢感覺？

²² 近幾十年來，耶和華亦都幫助我哋更清晰噉理解佢嘅王國。例如話，佢幫我哋更清楚噉睇出，基督會喺幾時將上帝王國嘅子民同嗰啲唔肯聽從真理嘅人分開，就好似牧人將綿羊山羊分開一樣。耶和華仲幫我哋明白以下真理：14萬4000人會喺幾時全部召集起嚟；關於上帝嘅王國，耶穌所講嘅比喻有乜嘢含意；仲喺地上嘅受膏基督徒會喺幾時被接到去天上。d耶和華幫我哋更清晰噉理解呢啲真理，對於呢一點你有乜嘢感覺呢？你嘅信心係唔係增强咗呢？新嘅理解唔係證明咗耶和華一直喺度教導佢謙卑嘅子民咩？你繼續讀呢本書，就會更加相信，耶和華正喺度向敬畏佢嘅人逐步透露佢嘅旨意。