王國嘅真理——分發靈糧

你同聖經學生啱啱睇完一節經文。跟住，你睇到佢雙眼好似發光噉，佢似乎明白咗經文嘅意思。然之後，佢慢慢反應過嚟，問：“你嘅意思係，聖經話我哋可以喺樂園裏面永遠噉生活落去，樂園就喺地球度？”你嘅傳道同伴微笑咗一下，對佢講：“你啱啱睇過嘅經文係咪噉講嘅呢？”學生好驚訝噉擰一擰頭，話：“真係唔敢相信，我從來都冇聽講過！”你諗翻幾個星期之前，佢學到上帝嘅名係耶和華嗰時，都係噉講嘅。

你係咪都有過噉嘅經歷呢？好多基督徒都有。睇到學生對聖經真理嘅反應咁好，我哋好自然就會諗，可以確切噉認識真理，係一份幾咁寶貴嘅禮物啊！不妨停落嚟諗吓，當初你係點樣收到呢份禮物嘅。喺呢一篇會講吓呢個問題。過去一百年期間，上帝王國嘅君王耶穌基督一直積極噉教導上帝嘅子民，幫助佢哋認識真理。上帝嘅子民逐步得到屬靈嘅啟迪，唔係已經清晰噉證明咗上帝嘅王國係真實嘅咩？