王國嘅教育——培訓君王手下嘅僕人

你面帶笑容噉望住台上嘅講者，流露出讚賞嘅眼神。呢個年輕嘅弟兄同你屬於同一群會衆，呢次係佢第一次喺大會擔任節目。你好欣賞佢嘅演講，内心自然會感歎，上帝子民受到嘅培訓實在係太好嘞！你仲記得佢第一次喺台上嘅情形，同而家簡直好似兩個人噉。佢參加先驅訓練班之後進步好大，最近仲同太太參加咗王國傳福音者訓練班。佢嘅演講真係好精彩，你一邊鼓掌，一邊望住周圍嘅聽衆，同時諗到上帝嘅所有子民都得到優良嘅教導。

聖經預告，上帝嘅子民都會“受耶和華教導”。（以賽亞書54:13）呢個預言今日正喺度應驗。耶和華嘅組織除咗通過出版物，仲通過聚會同大會教導我哋。組織亦都設立咗各種訓練班，幫助我哋履行組織交託嘅各項職務。呢一篇，我哋會睇吓呢啲教導點樣充分表明上帝嘅王國正喺度施行統治。