第16章
聚集起嚟崇拜上帝
1．（甲）門徒聚集一齊嗰時，佢哋得到乜嘢？（乙）點解佢哋需要幫助呢？
耶穌復活之後冇幾耐，門徒聚集起嚟互相鼓勵。由於驚敵人揾到上門，所以佢哋鎖實大門。突然間，耶穌喺佢哋當中顯現，對佢哋講：“領受聖靈啦。”佢哋即刻就唔驚嘞。（請讀約翰福音20:19-22）後來，門徒再次聚集起嚟，耶和華將聖靈傾注喺佢哋身上。佢哋就充滿力量，可以執行前頭嘅傳道工作！（使徒行傳2:1-7）
2．（甲）耶和華點樣賜力量俾我哋？（乙）點解我哋需要耶和華賜力量俾我哋？（丙）點解家庭崇拜非常重要？（另見腳注同175頁嘅附欄“家庭崇拜”）
2 我哋同公元1世紀嘅基督徒面對類似嘅考驗。（彼得前書5:9）有時，我哋可能好怕人。所以，我哋需要耶和華賜力量俾我哋，先至可以持續不懈噉傳道。（以弗所書6:10）耶和華通過基督徒聚會加强我哋嘅力量。目前，我哋每週有兩個聚會，一個係公衆演講聚會同《守望台》研究班，另一個係週中嘅傳道與生活聚會。a而且，我哋每年有四項年度盛事，分别係區域大會、兩個分區大會，同埋耶穌受難紀念聚會。點解參加呢啲聚會同大會係非常重要嘅呢？呢啲聚會同大會係點樣發展而嚟嘅呢？我哋對呢啲活動嘅態度顯示乜嘢？
點解要聚集起嚟
3,4．耶和華要求佢嘅子民點樣做？請舉例説明。
3 好耐之前，耶和華就要求佢嘅子民聚集起嚟崇拜佢。比如，公元前1513年，耶和華賜一套律法俾以色列國族，規定佢哋每週要守安息日，噉樣每個家庭都可以喺呢一日專心崇拜佢，同埋學習律法。（申命記5:12；6:4-9）當以色列人聽從呢個吩咐嗰陣，每個家庭都受到强化，整個國家喺屬靈方面係潔淨、强壯嘅。但係，當佢哋唔守律法，又冇定期聚集起嚟崇拜耶和華嗰陣，就會失去上帝嘅悦納。（利未記10:11；26:31-35；歷代志下36:20,21）
4 我哋亦可以諗吓耶穌嘅榜樣。佢每個安息日都會去猶太會堂。（路加福音4:16）耶穌復活之後，雖然佢嘅門徒唔使按照律法守安息日，但係會定期聚會。（使徒行傳1:6,12-14；2:1-4；羅馬書14:5；歌羅西書2:13,14）1世紀嘅基督徒喺聚會裏面唔單止得到教導，同埋可以互相鼓勵，仲通過禱告、評論、唱詩歌嚟向上帝獻上讚美作為祭物。（歌羅西書3:16；希伯來書13:15）
耶穌嘅門徒聚集起嚟互相鼓勵，互相强化
5．點解我哋要參加每個星期嘅聚會同每年嘅大會？（另見176頁嘅附欄“使上帝嘅子民團結一致嘅年度盛會”）
5 我哋參加每週嘅聚會同每年嘅大會，就表明自己支持緊上帝嘅王國。我哋亦可以得到聖靈受到强化，仲可以通過呢個機會，表達出自己嘅信心去鼓勵其他人。更加重要嘅係，我哋可以通過禱告、評論、唱詩歌嚟崇拜耶和華。我哋嘅聚會可能同以色列人，或者1世紀基督徒嘅形式唔一樣。但係，無論以前抑或而家，聚集起嚟崇拜上帝都係非常重要嘅。噉我哋今日嘅聚會係點樣發展而嚟嘅呢？
每週嘅聚會“激發愛心，促進善行”
6,7．（甲）聚會嘅目的係乜嘢？（乙）有一段時間，各個小組嘅聚會有咩唔同？
6 查爾斯·泰兹·羅素弟兄最初尋求聖經真理嗰時，就睇出有需要同其他尋求真理嘅人聚集起嚟。佢喺1879年噉樣寫：“為咗鑽研聖經，我同其他人喺匹兹堡成立咗一個研經班，喺每個星期日舉行。”《錫安嘅守望台》都鼓勵讀者要聚集起嚟。1881年，佢哋每逢星期三同星期日都喺賓夕法尼亞州嘅匹兹堡舉行聚會。1895年11月刊嘅《守望台》（英語）提到，聚會嘅目的係令參加嘅人“彼此交流，培養愛心，增進基督徒嘅情誼”，亦有機會互相鼓勵。（請讀希伯來書10:24,25）
7 有好多年時間，各個聖經研究者小組嘅聚會形式，同埋舉行嘅次數都唔同。例如，1911年刊登美國一個小組嘅信，信入面話：“我哋每個禮拜至少舉行5次聚會。”佢哋嘅聚會係星期一、星期三同星期五各一次，星期日兩次。1914年刊登一封嚟自非洲一個小組嘅信，信入面話：“我哋每個月舉行兩次聚會，每次聚會星期五開始，到星期日結束。”隨住時間過去，聚會嘅形式慢慢發展到今日噉。請睇吓過程係點樣嘅。
8．早期嘅公衆演講有咩主題？請舉例。
8 公衆演講聚會 1880年，《錫安嘅守望台》出版第二年，羅素弟兄效法耶穌嘅榜樣，展開咗一次傳道旅程。（路加福音4:43）喺呢次旅程中，羅素弟兄為今日公衆演講聚會嘅模式奠定基礎。《守望台》雜誌提前向讀者宣布話，羅素弟兄“好樂意發表公衆演講，題目係：‘與上帝王國有關嘅事’”。1911年，有啲班（而家叫會衆）喺部分國家成立，每個班都受到鼓勵，派符合資格講者去附近嘅地區發表一系列嘅演講。演講一共有六個，演講題目同審判、贖價等有關。每個演講結束之後，會宣布下一週演講嘅題目同講者個名。
9．（甲）公衆演講聚會過去有乜嘢改變？（乙）你可以點樣表明自己重視呢個聚會？
9 1945年，《守望台》宣布喺全球開展公衆演講聚會活動，講者會發表一系列嘅公衆演講，一共有八個演講，題目同嗰個時期急需解決嘅難題有關。有幾十年時間，受委派嘅講者唔單止可以用忠信奴隸指定嘅題目嚟發表演講，仲可以發表自定題目嘅演講。不過，到咗1981年，所有講者都要採用組織發俾會衆嘅大綱。b直到1990年之前，有啲公衆演講大綱包括同聽衆討論嘅環節或者示範。但係，根據組織嘅指引，由1990年開始，公衆演講只會係演講形式。2008年1月，組織作出進一步調整，將公衆演講嘅時間由45分鐘縮短到30分鐘。雖然公衆演講聚會喺形式上有所改變，但係經過充分準備之後嘅演講，一向都可以幫助人增强對上帝話語嘅信心，亦都可以幫助我哋對上帝嘅王國有更全面嘅認識。（提摩太前書4:13,16）根據聖經發表嘅演講的確發揮重要作用。你有冇盡力邀請人嚟聽呢啲演講呢？
10-12．（甲）過去咁多年嚟，《守望台》研究班有乜嘢調整？（乙）我哋應該問吓自己乜嘢問題？
10 《守望台》研究班 守望台社委派稱為朝聖者嘅弟兄，去到各群會衆發表演講，同帶頭傳道。1922年，佢哋提議定期舉行聚會，討論《守望台》文章。呢個提議被採納咗。起初，《守望台》研究班喺週中或者週日舉行。
1931年，加納嘅《守望台》研究班
11 1932年6月15日刊嘅《守望台》（英語）提出進一步嘅指引，講明呢個聚會應該點樣舉行。文章指出，呢個聚會要按照伯特利家庭嘅《守望台》研究班模式舉行，由一個弟兄主持，另外三個弟兄會坐喺前排，輪流讀出每段内容。當時嘅文章冇提供問題，主持嘅弟兄會邀請聽衆根據討論嘅内容提出問題，然後再請聽衆回答。如果有需要嘅話，主持人會簡短扼要噉解釋一下文章嘅内容。
12 起初，每群會衆可以按照大多數人嘅意願選擇一篇文章嚟討論。不過，1933年4月15日刊嘅《守望台》（英語）建議所有會衆都用最新出版嘅《守望台》文章。1937年，組織指定呢個聚會要喺星期日舉行。1942年10月1日刊嘅《守望台》（英語）提出進一步指示，將聚會嘅模式調整到好似而家噉。首先，研讀文章每頁嘅最下面都會列出問題，用嚟討論。另外，聚會舉行嘅時間係一個鐘。文章仲鼓勵參加聚會嘅人最好用自己嘅説話回答問題，而唔係將每段嘅句子照讀出嚟。忠信奴隸會喺適當嘅時候提供靈糧俾我哋，而《守望台》研究班就一直係佢哋所用嘅主要渠道。（馬太福音24:45）我哋人人都應該問吓自己：“我每個星期有冇預習《守望台》研究班嘅課文？我有冇盡力參與評論呢？”
13,14．（甲）會衆研經班係點樣發展而嚟嘅呢？（乙）點解你鍾意呢個聚會呢？
13 會衆研經班 19世紀90年代初，《千禧年黎明》發行咗幾册之後，一位叫拉恩嘅聖經研究者建議，喺佢所住嘅美國馬里蘭州巴爾的摩市，成立研究聖經嘅“黎明組”。開始嗰陣，呢啲聚會仲喺試驗階段，通常喺私人屋企舉行。不過，1895年9月，美國好多個城市都開始有黎明組嘅聚會，而且有好好嘅成果。當月嘅《守望台》建議所有研究聖經真理嘅人都要舉行噉樣嘅聚會。雜誌仲提出，主持聚會嘅弟兄應該有良好嘅朗讀能力，佢每讀完一句，要等參加聚會嘅人評論，討論完每段之後，要翻開嗰一段嘅經文，將佢讀出嚟。討論完一篇文章之後，每個參加聚會嘅人都要概述文章嘅内容。
14 呢個聚會嘅名稱改咗幾次，一開始叫聖經研究嘅庇哩亞組，因為佢哋想效法1世紀細心考查聖經嘅比里亞人（庇哩亞人）。（使徒行傳17:11，《和合本》）後來，呢個聚會改為叫書籍研究班，而家叫會衆研經班。聚會亦都唔再以小組嘅形式喺私人屋企舉行，而喺王國聚會所舉行，整群會衆一齊參加。過去幾十年，呢個聚會討論過唔同嘅書、册子，仲有《守望台》文章。由一開始有呢個聚會起，每個參加嘅人就受到鼓勵要發表評論。呢個聚會大大加深我哋對聖經嘅認識。你有冇經常預習會衆研經班嘅資料，而且盡力喺聚會評論呢？
15．以往舉辦傳道訓練班有乜嘢目的？
15 傳道訓練班 凱里·巴伯曾經喺紐約布魯克林世界總部服務，佢回憶話：“1942年2月16日星期一晚上，布魯克林伯特利家庭嘅所有弟兄都受到邀請，參加一個後來稱為傳道訓練班嘅課程。”巴伯弟兄後來成為中央長老團成員，佢描述呢個訓練班係“耶和華帶領現代子民嘅過程中，其中一項最顯著嘅進展”。呢個課程好有效，幫助弟兄提高教導同傳道技巧，所以，由1943年開始，世界各地越來越多會衆開始使用《神治傳道訓練課程》呢本册子。1943年6月1日刊嘅《守望台》（英語）話，傳道訓練班嘅目的係幫助上帝嘅子民“受到培訓，更有效噉傳講王國嘅好消息”。（提摩太後書2:15）
16,17．過去舉辦嘅傳道訓練班，係咪只係幫人掌握技巧呢？請解釋。
16 一開始，好多人都覺得喺一大班人面前發表演講好困難。喺1918年，克萊頓·伍德沃思弟兄嘅爸爸曾經同盧述福弟兄，仲有其他人一齊無辜入獄。伍德沃思弟兄諗翻佢喺1943年，第一次喺傳道訓練班發表演講嗰時嘅感受，話：“對我嚟講，演講實在太難嘞。我一開口就口窒窒，又口乾，講嘢一時大聲一時細聲，一時快一時慢。”不過，伍德沃思弟兄嘅演講能力不斷提高，佢後來有殊榮發表好多公衆演講。呢個訓練班唔單止幫佢掌握各種技巧，亦都幫佢意識到保持謙卑同信賴耶和華係好重要嘅。佢話：“我睇出，邊個發表演講唔重要，重要嘅係準備充足，全心信賴耶和華，噉嘅話，聽衆就會好欣賞佢嘅演講，亦都會學到嘢。”
17 由1959年開始，姊妹亦都可以報名參加呢個訓練班。埃德娜·鮑爾姊妹講翻起當年參加大會聽到呢個宣布嗰時嘅情形，佢話：“我記得啲姊妹都好興奮，而家佢哋都有機會受訓練嘞。”咁多年嚟，好多弟兄姊妹把握機會參加傳道訓練班，得到耶和華嘅教導。今日，我哋都可以喺週中聚會得到噉樣嘅訓練。（請讀以賽亞書54:13）
18,19．（甲）今日我哋點樣得到實用嘅指引嚟執行傳道工作？（乙）點解我哋聚會嗰時會唱詩歌呢？（另見附欄“將真理唱出嚟”）
18 傳道工作聚會 1919年，就已經有專為組織傳道工作而設嘅聚會。當時，會衆嘅成員唔係個個都可以參加，只有嗰啲負責分發書刊嘅傳道員先可以。由1923年開始，呢個聚會每個月舉行一次，所有會衆成員都可以參加。到咗1928年，組織促請會衆每個星期舉行一次傳道工作聚會。1935年，《守望台》鼓勵所有會衆根據《指導員》（後來叫《公報》，之後再改為叫《王國傳道月報》）嚟舉行聚會。過咗冇幾耐，每群會衆都定期舉行呢個聚會。
19 今日，我哋從週中嘅聚會得到實用嘅指引，用嚟執行傳道工作。（馬太福音10:5-13）如果你收到《聚會手册》，有冇仔細閲讀，而且喺傳道嗰時，將建議運用出嚟呢？
一年當中最重要嘅聚會
公元1世紀嘅基督徒每年都聚集起嚟記念基督嘅死亡，今日嘅基督徒都係噉做（請睇第20段）
20-22．（甲）點解我哋要記念耶穌嘅死亡？（乙）參加每年嘅耶穌受難紀念聚會，可以點樣使你得益呢？
20 基督徒要聽從吩咐，記念耶穌嘅死亡，直到佢嚟。同逾越節一樣，耶穌受難紀念聚會每年舉行一次。（哥林多前書11:23-26）每年都有千百萬人參加呢個聚會。受難紀念聚會提醒受膏基督徒，佢哋有殊榮同耶穌一同承受王國。（羅馬書8:17）呢個聚會亦都激勵另外嘅綿羊深深尊重上帝王國嘅君王，決心對佢表現忠誠。（約翰福音10:16）
21 羅素弟兄同佢嘅同工意識到舉行主嘅晚餐好重要，亦都睇出呢個紀念聚會每年應該淨係舉行一次。1880年4月刊嘅《守望台》（英語）指出：“過去幾年，我哋好多人都喺匹兹堡……過逾越節［耶穌受難紀念聚會］，食象徵主身體嘅餅，飲象徵血嘅酒。”冇幾耐，大會開始同耶穌受難紀念聚會一齊舉行。第一次開始有人數記錄嘅係1889年，當時有225人出席，22人受浸。
22 今日，耶穌受難紀念聚會唔再係大會嘅一部分。不過，我哋仲係會邀請所有住喺附近嘅人，嚟聚會所或者租用嘅場所參加呢個聚會。2013年，超過1900萬人參加呢個聚會，記念耶穌嘅死亡。喺一年裏面呢個最重要嘅晚上，我哋唔單止可以親自參加呢個聚會，仲可以鼓勵其他人參加，呢個真係好大嘅榮幸！每年，你有冇熱心噉邀請更多人嚟參加耶穌受難紀念聚會呢？
我哋嘅態度顯示乜嘢
23．你哋對參加聚會同大會有乜嘢睇法？
23 耶和華嘅忠僕唔會將聚集起嚟崇拜上帝呢個吩咐，睇成係一個負擔。（希伯來書10:24,25；約翰一書5:3）大衛王就係一個例子，大衛好鍾意去耶和華嘅聖殿崇拜佢。（詩篇27:4）大衛特别鍾意同愛上帝嘅人一齊崇拜上帝。（詩篇35:18）我哋都可以諗吓耶穌嘅榜樣。耶穌細個嗰陣，就好渴望喺天父嘅家崇拜佢。（路加福音2:41-49）
你有冇做好計劃，每個星期都舉行家庭崇拜呢？
24．點解我哋要參加聚會同大會？
24 我哋參加聚會，就表明自己愛耶和華，同埋好想鼓勵信徒同工。聚會同大會係上帝教導我哋成為王國好公民嘅一個主要方式，我哋出席呢啲活動，就表明自己好想接受上帝嘅教導。另外，呢啲聚會亦都幫助我哋掌握需要嘅技巧，而且加强我哋嘅力量，使我哋可以堅持不懈噉執行傳道工作，幫助人成為君王耶穌基督嘅門徒，同埋培訓佢哋。呢個係上帝王國目前最重要嘅工作之一。（請讀馬太福音28:19,20）毫無疑問，我哋有幾渴望參加聚會，就顯示出我哋將上帝嘅王國睇得有幾真實。願我哋繼續珍視聚會同大會！