第17章
培訓王國傳道員
1-3．（甲）耶穌點樣擴大傳道工作嘅規模？（乙）我哋跟住會解答邊啲問題？
耶穌用咗大約兩年嘅時間行匀加利利，向人傳道。（請讀馬太福音9:35-38）佢去過好多城鎮同鄉村，傳講王國嘅好消息，又喺猶太會堂裏面教導人。無論佢喺邊度傳道，都有一大班人圍住佢。耶穌話，“莊稼的確好多”，需要多啲工人。
2 耶穌點樣擴大傳道工作嘅規模呢？佢差12個使徒“去傳講上帝嘅王國”。（路加福音9:1,2）耶穌曾經受到天父訓練，而家佢都好樂意訓練使徒。耶穌知道使徒可能唔係好清楚要點樣傳道，所以差使徒出去之前，先培訓佢哋。
3 你可能會問：耶穌喺天父嗰度受過乜嘢培訓？佢又點樣培訓使徒呢？作為彌賽亞君王，今日佢有冇培訓門徒執行傳道工作呢？點樣培訓？
“我講嘅呢啲話，同父親教我嘅一樣”
4．天父幾時開始教導耶穌？喺邊度教呢？
4 耶穌清楚表明自己係受天父教導嘅。佢喺地上傳道嗰時曾經講過：“我講嘅呢啲話，同父親教我嘅一樣。”（約翰福音8:28）天父幾時開始教導耶穌？喺邊度教呢？耶穌係上帝嘅頭生子，好可能天父創造佢之後冇幾耐，就開始教導佢嘞。（歌羅西書1:15）耶穌喺天上同天父相處咗無數歲月，佢嘅爸爸係“偉大導師”，佢一邊觀察爸爸，一邊聽爸爸嘅教導。（以賽亞書30:20）耶穌受到無與倫比嘅教育，認識到天父嘅特質、作為同旨意。
5．耶和華俾乜嘢指示佢個仔，教導佢喺地上執行傳道工作？
5 耶和華教導耶穌應該點樣喺地上執行傳道工作。聖經用一個預言描述偉大導師同佢頭生子之間嘅關係。（請讀以賽亞書50:4,5）預言話，耶和華“每日朝早”都叫醒個仔。就好似一位老師一早叫醒個學生，為咗教導佢。一本聖經參考書話：“耶和華……就好似一位老師喺學校教導學生一樣，教導耶穌要傳講乜嘢信息，同埋點樣傳講。”喺天上嘅“學校”，耶和華教佢個仔要“講乜嘢，話乜嘢”。（約翰福音12:49）耶和華仲指示佢個仔應該點樣教導其他人。a耶穌喺地上嗰時學以致用，除咗自己傳道之外，仲培訓門徒，為咗幫佢哋好好執行傳道工作。
6,7．（甲）耶穌點樣培訓使徒？（乙）呢啲培訓裝備好佢哋執行乜嘢工作？（丙）今日，耶穌確保我哋得到乜嘢培訓？
6 本章開頭提到，耶穌差使徒去傳道之前先培訓佢哋。係咩培訓呢？馬太福音第10章記載，耶穌喺傳道方面提出清晰嘅指示，包括：去邊度傳道（第5,6節）；傳講乜嘢信息（第7節）；要信賴耶和華（第9,10節）；點樣對待傳道對象（第11-13節）；俾人拒絶嗰時應該點做（第14,15節）；面對迫害嗰時應該點做（第16-23節）。b耶穌具體噉指導佢嘅使徒，裝備好佢哋喺1世紀做傳道先鋒，宣揚上帝王國嘅好消息。
7 今日又點樣呢？上帝王國嘅君王耶穌吩咐門徒，將王國嘅好消息“傳遍普天下，對所有國族作見證”。（馬太福音24:14）噉耶穌有冇培訓我哋去執行呢件最重要嘅工作呢？當然有。佢喺天上指引門徒，確保我哋得到訓練，幫助我哋知道應該點樣喺地區裏面傳道，亦都知道應該點樣喺會衆裏面履行各種職責。
培訓傳福音者
8,9．（甲）傳道訓練班嘅主要目的係乜嘢？（乙）週中聚會點樣幫助你更有效噉傳道？
8 過去咁多年嚟，耶和華嘅組織一直通過大會同聚會，訓練上帝嘅子民執行傳道工作，傳道工作聚會就係個例子。由上世紀40年代開始，喺總部帶頭嘅弟兄亦都開始舉辦各種訓練班。
9 傳道訓練班 正如上一章指出，呢個訓練班喺1943年成立。呢個訓練班嘅目的係咪只係幫助人喺會衆裏面提高演講嘅質素呢？唔係嘅。佢嘅主要目的係訓練耶和華嘅子民善用講話嘅恩賜嚟讚美佢，幫助所有學員有效噉傳講王國嘅好消息。（詩篇150:6）今日，弟兄姊妹都可以從週中聚會得到噉樣嘅訓練。
10,11．（甲）而家邊啲人可以去基列學校？（乙）基列學校課程目的係乜嘢？
10 守望台基列聖經學校 呢個學校喺1943年2月1日星期一開始，本來係培訓先驅同其他全時僕人去海外傳道。但係，由2011年10月開始，只有參與特别全時服務嘅人，先至可以去基列學校受訓，呢啲人包括特别先驅、探訪會衆嘅監督同埋佢哋嘅妻子、伯特利成員，仲有未去過基列學校嘅特派傳道員。
11 基列學校課程有咩目的？一位資深嘅導師回答：“課程會幫學員通過鑽研聖經嚟强化信心，幫佢哋培養需要嘅屬靈特質，可以應付喺崗位上遇到嘅各種挑戰。課程另一個主要目的係令學員更加熱心去傳福音。”（以弗所書4:11）
12,13．基列學校對全球嘅傳道工作有乜嘢貢獻？請舉例。
12 基列學校對全球嘅傳道工作有乜嘢貢獻呢？自從1943年以來，超過8500個學員喺基列學校受訓，畢業生被派到170幾個國家同地區傳道。c呢啲特派傳道員學以致用，熱心傳道，仲用自己學到嘅嚟訓練其他人。好多特派傳道員被派去只有少數傳道員甚至冇傳道員嘅地區服務。
13 以日本為例。第二次世界大戰期間，當地嘅公開傳道工作停止咗。直到1949年8月，日本嘅傳道員唔够10個。但係，到咗年底，有13個受過基列學校培訓嘅特派傳道員喺當地努力傳道，後來有更多特派傳道員去到日本。起初，佢哋集中喺大城市傳道，後來仲去埋其他城市。呢啲特派傳道員熱心鼓勵聖經學生同埋其他人做先驅。佢哋嘅努力冇白費，反而得到好好嘅成果。而家，日本有超過21萬6000個王國傳道員，有將近百分之40嘅人做先驅！d
14．組織舉辦嘅訓練班充分證明咗乜嘢？（另見188頁附欄“培訓王國傳道員嘅各種訓練班”）
14 其他訓練班 先驅訓練班、基督徒夫婦聖經研習班，同埋獨身弟兄聖經研習班，曾經幫助學員喺靈性上進步，同埋帶頭熱心傳道。e呢啲訓練班充分證明，我哋嘅君王的確幫助門徒裝備齊全執行任務。（提摩太後書4:5）
培訓弟兄執行重任
15．有職責嘅弟兄好想點樣效法耶穌？
15 以賽亞嘅預言提到耶穌受上帝教導。耶穌喺天上嘅“學校”學識“用良言回答疲乏嘅人”。（以賽亞書50:4）佢喺地上嗰時，將所學到嘅應用出嚟，使“辛苦勞碌、擔子沉重嘅人”重新得力。（馬太福音11:28-30）有職責嘅弟兄好想效法耶穌，鼓勵弟兄姊妹，使佢哋得到力量。為咗達到呢個目的，組織為嗰啲符合資格嘅弟兄舉辦唔同嘅訓練班，幫助佢哋更有效噉為同工服務。
16,17．王國職務訓練班嘅目的係乜嘢？（另見腳注）
16 王國職務訓練班 1959年3月9日，第一屆王國職務訓練班喺紐約南蘭星鎮舉辦。探訪會衆嘅監督同會衆僕人（而家叫長老團協調人）可以參加呢個為期一個月嘅課程。起初，王國職務訓練班課程淨係用英語舉行，後來亦都用其他語言舉行，世界各地越來越多弟兄都可以受到培訓。f
1970年，勞埃德·巴雷弟兄喺日本做王國職務訓練班嘅導師
17 《1962耶和華見證人年鑑》（英語）指出王國職務訓練班嘅目的，話：“喺呢個忙碌嘅世界裏面，耶和華見證人會衆嘅監督一定要識得好好安排自己嘅生活，先可以照顧到會衆每一個成員，造福佢哋。同時，監督亦都應該思想健全，唔可以因為會衆嘅事務而忽略屋企人。世界各地嘅會衆僕人聚埋一齊參加王國職務訓練班，接受培訓，就可以按照聖經嘅要求履行監督嘅職責，呢個真係一個好好嘅機會啊！”（提摩太前書3:1-7；提多書1:5-9）
18．王國職務訓練班點樣造福上帝嘅所有子民？
18 上帝所有嘅子民都能够從王國職務訓練班得益。點解噉講呢？長老同助理僕人將學到嘅實踐出嚟，就可以好似耶穌噉樣，使同工得到力量。有冇長老或者助理僕人關心過你，對你講過暖人心窩嘅話，聽你傾訴或者探訪你，使你受到鼓勵呢？你係咪好感激佢哋呢？（帖撒羅尼迦前書5:11）呢啲符合資格嘅弟兄的確係會衆嘅寶貴恩賜。
19．（甲）教導委員會仲督導邊啲訓練班？（乙）呢啲訓練班嘅目的係乜嘢？
19 其他訓練班 中央長老團嘅教導委員會仲督導其他訓練班，培訓組織裏面有職責嘅弟兄，包括會衆長老、探訪會衆嘅監督同分部委員會成員。呢啲訓練班係要幫助佢哋更有效噉履行各種職責。呢啲以聖經為根據嘅課程，鼓勵弟兄要喺靈性上保持强壯，同埋運用聖經原則，去牧養耶和華交俾佢哋照顧嘅寶貴綿羊。（彼得前書5:1-3）
2007年，馬拉維嘅第一屆組織事務訓練班
20．（甲）點解耶穌話我哋所有人都係“受耶和華教導”？（乙）你決心點樣做？
20 事實表明，彌賽亞君王確保門徒受到良好嘅培訓。耶和華首先培訓佢個仔耶穌，耶穌再培訓門徒，所以，佢哋得到嘅培訓都係從上頭嚟嘅。難怪耶穌話我哋所有人都係“受耶和華教導”。（約翰福音6:45；以賽亞書54:13）等我哋一齊下定決心，接受君王嘅培訓，從中得益。同時我哋要記得，呢啲訓練嘅主要目的係要幫助我哋靈性强壯，使我哋可以徹底執行職務。
a 我哋點知道父親教導兒子點樣傳道呢？請諗吓，耶穌教導人嗰時，用咗好多比喻，應驗咗一個佢出世之前幾百年就已經寫好嘅預言。（詩篇78:2；馬太福音13:34,35）由此可見，講出呢個預言嘅耶和華上帝，早就決定要佢個仔用比喻同有含意嘅故事嚟教導人。（提摩太後書3:16,17）
b 幾個月之後，耶穌“選立咗七十個人，差佢哋兩個兩個”出去傳道，仲訓練佢哋點樣傳道。（路加福音10:1-16）
c 有啲人去過唔止一次基列學校。
d 關於去過基列學校嘅特派傳道員，對全球嘅傳道工作有乜嘢貢獻，詳見《耶和華見證人——上帝王國的宣揚者》第23章。
e 後兩個訓練班已經俾王國傳福音者訓練班取代咗。
f 而家，王國職務訓練班每隔幾年都會舉辦，課程有長有短，所有長老都可以參加。由1984年開始，助理僕人都可以參加呢個訓練班。