仁慈——通過言行表達出嚟嘅一種特質

一個仁慈嘅舉動的確可以帶俾人安慰。如果有人關心我哋，我哋會好感激對方。既然我哋每個人都鍾意其他人用仁慈嘅方式對待自己，噉我哋應該諗吓自己可以點樣培養呢種美好嘅特質。

仁慈嘅意思包括，真誠噉關心其他人，而呢種關心係以積極嘅言語同行動表現出嚟嘅。仁慈呢種特質係主動嘅，唔係只係表面上嘅禮貌。真正嘅仁慈嚟自深切嘅愛同憐恤之情。更重要嘅係，仁慈係上帝聖靈果實嘅一部分，係基督徒應該培養嘅特質。（加拉太書5:22,23）冇錯，我哋都必須培養仁慈，所以等我哋嚟分析一下，耶和華同耶穌點樣表現呢種特質，以及我哋可以點樣效法佢哋嘅榜樣。

耶和華仁慈對待所有人

耶和華仁慈、體貼噉對待所有人，包括“忘恩負義嘅惡人”。（路加福音6:35）例如，耶和華“叫日頭出嚟照善人，亦照惡人，降雨俾義人，亦都俾不義嘅人”。（馬太福音5:45）所以，就算有啲人唔承認耶和華係創造主，但耶和華仲係仁慈噉為佢哋提供生活所需，亦都俾佢哋享有一定程度嘅快樂。

耶和華為亞當同夏娃所做嘅，就係表現仁慈嘅一個好例子。亞當夏娃犯罪之後，“就用無花果樹嘅葉編成裙，遮蔽身體”。不過，當時大地因為受到咀咒而生滿“荆棘同蒺藜”，耶和華知道佢哋喺伊甸園外面生活需要更合適嘅衣服，於是仁慈噉考慮到呢一點，就“用獸皮做衣服”俾佢哋着。（創世記3:7,17,18,21）

雖然耶和華仁慈噉對待好人同壞人，但係佢特别對佢嘅忠僕表現仁慈。例如，喺先知撒迦利亞嘅日子，有個天使見到耶路撒冷嘅聖殿嘅重建工程完全停止就覺得不安。耶和華聆聽呢個天使講出自己嘅憂慮，然後“用親切嘅話安慰”佢。（撒迦利亞書1:12,13）耶和華都用過類似嘅方式嚟對待以利亞。有一次，以利亞先知情緒好低落，甚至求耶和華攞走佢嘅性命。耶和華體恤以利亞嘅感受，派咗個天使去强化佢。耶和華仲向以利亞保證，佢並唔係孤軍作戰。以利亞聽到呢番仁慈嘅話，同埋得到所需嘅幫助之後，就能够繼續執行佢嘅委派。（列王紀上19:1-18）喺上帝嘅僕人當中，邊個最能够反映出耶和華呢種顯著嘅特質呢？

耶穌——一位充滿仁慈嘅人

耶穌喺地上傳道期間，好多人都知道佢待人仁慈體貼。佢從來都冇用苛刻或者傲慢嘅態度嚟對待人。佢滿懷體恤噉對人講：“你哋所有辛苦勞碌、擔子沉重嘅人啊，嚟我呢度啦，我要使你哋得到安舒。 ……我嘅軛係容易負嘅”。（馬太福音11:28-30）因為耶穌待人仁慈，所以無論佢去到邊，啲人都願意跟從佢。耶穌“動咗憐憫嘅心”，就餵飽佢哋，醫好佢哋當中有病同殘疾嘅人，又“教導佢哋”好多有關天父嘅事。（馬可福音6:34；馬太福音14:14；15:32-38）

耶穌洞悉人心，關心他人，表明佢的確充滿仁慈。無論一啲人嘅請求會為耶穌帶嚟幾咁大嘅不便，耶穌都會“仁慈”噉幫助佢哋。（路加福音9:10,11）例如，一個患咗血崩嘅婦人喺律法上係不潔嘅，但係佢為咗醫好自己嘅病就摸咗耶穌嘅外衣。被發現之後，婦人好驚，不過耶穌並冇責怪佢。（利未記15:25-28）耶穌同情呢位飽受煎熬十二年嘅婦人，對佢講：“女兒，你嘅信心使你痊癒嘞。平平安安噉去喇，願你健康，擺脱你嘅惡疾。”（馬可福音5:25-34）耶穌嘅所言所行真係非常仁慈！

表現仁慈要有積極嘅行動

我哋從以上嘅例子睇出，真正嘅仁慈係通過行動表現出嚟嘅。耶穌通過好心嘅撒馬利亞人嘅比喻，表明行動有幾咁重要。喺比喻當中，一個男子喺路上遇劫，俾人打到半死之後揼喺路邊。雖然撒馬利亞人同猶太人互相懷有敵意，但係一個撒馬利亞人覺得呢個男子好可憐，仁慈之心推動佢採取行動。於是，呢個撒馬利亞人為男子包紮傷口，將佢帶到客店。之後，佢又俾錢店主，請佢照顧受傷嘅男子，甚至提出佢會支付任何額外嘅費用。（路加福音10:29-37）

除咗用行動之外，仁慈亦都可以通過體貼同激勵人心嘅言辭表達出嚟。所以，雖然“人心擔憂，鬱鬱不樂”，但係聖經又話，“聽見良言，心裏歡喜”。（箴言12:25）我哋仁慈、良善噉關心其他人，就會喺言語上鼓勵佢哋，使佢哋感到快樂。a噉樣佢哋就會受到强化，更容易應付生活上嘅難題。（箴言16:24）

培養仁慈

所有人都係按照“上帝嘅形像”創造嘅，所以我哋都有能力可以培養仁慈呢種特質。（創世記1:27）例如，保羅去羅馬嘅時候，受羅馬軍官猶流監管。猶流仁慈噉對待保羅，佢哋去到西頓嗰陣，佢允許保羅去朋友嗰度，受佢哋照顧。（使徒行傳27:3）冇幾耐之後，保羅喺馬耳他島遭遇海難。島上嘅居民非常仁慈噉對待保羅以及同佢一齊嘅人，甚至為佢哋生火取暖。（使徒行傳28:1,2）佢哋噉樣做真係值得稱讚。不過，真正嘅仁慈唔係只係一次半次向人表現出嚟嘅。

我哋培養仁慈，使呢種特質成為我哋品格嘅一部分同埋我哋嘅生活方式，先可以完全取悦上帝。由於呢個原因，耶和華叫我哋“穿上”仁慈。（歌羅西書3:12）當然，使呢種美好特質成為自己嘅一部分，唔係咁容易就做到嘅。點解噉講？有時我哋冇表現仁慈，係因為怕醜、冇自信、受到反對或者有自私嘅傾向。無論點都好，我哋倚靠聖靈嘅幫助，學習用耶和華嘅方式嚟表現仁慈，就能够克服呢啲障礙。（哥林多前書2:12）

我哋有冇留意到，自己喺表現仁慈方面有一啲需要改善嘅地方呢？我哋應該問吓自己：“我有冇懷住體恤之心聆聽其他人傾訴呢？我係咪敏於留意其他人嘅需要？我最後一次仁慈對待親友以外嘅其他人係幾時呢？”然後，我哋可以立下目標，進一步認識自己身邊嘅人，特别係基督徒會衆嘅弟兄姊妹。我哋噉樣做，就可以了解佢哋嘅情況同埋留意到佢哋嘅需要。我哋要諗吓自己希望人哋點樣仁慈對待自己，之後就用自己所希望嘅方式嚟對待人。（馬太福音7:12）最後，只要我哋祈求耶和華幫助我哋培養仁慈，佢就會祝福我哋所付出嘅努力。（路加福音11:13）

仁慈嘅人容易親近

保羅表明自己係上帝嘅僕人嗰時列出咗好多種特質，其中一種就係“仁慈”。（哥林多後書6:3-6）因為保羅用仁慈嘅言行個别噉關心其他人，好多人都受到吸引，樂意親近佢。（使徒行傳28:30,31）同樣，我哋態度仁慈可以吸引其他人認識真理。我哋向所有人表現仁慈，就有可能打動佢哋嘅心，甚至使反對者消除敵意。（羅馬書12:20）話唔定，佢哋仲會對聖經信息産生興趣。

將來，無數人會喺地上樂園復活。可能佢哋第一次體驗到真正嘅仁慈嗰陣，會感到好興奮。佢哋因為充滿感恩之心而向其他人表現仁慈。嗰啲唔樂於助人同埋唔願意向人表現仁慈嘅人，喺上帝王國嘅統治之下根本冇立足之地。另一方面，嗰啲蒙上帝嘉許得永生嘅人將會以仁愛同仁慈嘅方式相待。（詩篇37:9-11）到時，全世界都會得享真正嘅和平安全！不過，呢個美好嘅應許實現之前，我哋而家可以點樣通過表現仁慈而得益？

表現仁慈而得益

聖經話：“仁慈嘅人使自己得益處”。（箴言11:17）一般嚟講，人都鍾意同仁慈嘅人喺一齊，亦都會仁慈噉對待佢哋。耶穌話：“你哋用乜嘢量器量俾人，人就會用乜嘢量器量翻俾你哋。”（路加福音6:38）所以，一個仁慈嘅人比較容易結交到好朋友，亦都比較容易同其他人保持良好嘅關係。

保羅勸勉以弗所嘅基督徒話：“你哋要以仁慈相待，存憐憫之心，彼此甘心寬恕”。（以弗所書4:32）如果會衆嘅基督徒都懷住體恤之心互相表現仁慈，盡力彼此幫助，噉會衆嘅所有人就會大大得益。呢啲基督徒唔會用尖酸刻薄嘅言詞嚟批評或者諷刺人。佢哋亦都唔會隨便講閒話中傷人，而會努力用言語强化人。（箴言12:18）噉樣，會衆弟兄姊妹嘅靈性就會越來越健壯。

冇錯，仁慈係一種用言語同行動表現出嚟嘅特質。我哋表現仁慈，就能够將上帝耶和華温暖同慷慨嘅特質反映出嚟。（以弗所書5:1）我哋噉樣做，亦都可以强化會衆，同埋吸引人歸附正確嘅崇拜。願所有人都能够睇出我哋仁慈待人！