“願佢……實現你嘅所有計劃”
“你仲要因耶和華而滿心喜樂，佢就將你心裏面所求嘅賜俾你。”——詩篇37:4
1．年輕人而家就需要為未來做乜嘢？點解佢哋唔需要過度憂慮？（請睇吓課文開頭嘅圖片）
年輕人，你一定會同意，開始一個旅程之前，先做好計劃係最明智嘅。人生就好似一個旅程噉，到底要去邊個方向，趁後生嘅時候就應該計劃好。當然，做計劃未必係容易嘅。一個叫凱蒂嘅女仔話：“而家就要決定自己嘅一生，壓力真係好大呀。”唔使驚！耶和華同佢嘅子民講：“你唔使怕，因為我與你同在。你唔需要四顧張望，因為我係你嘅上帝，我要使你堅强。我一定會幫助你”。（以賽亞書41:10）
2．我哋點知道耶和華想我哋有開心快樂嘅未來？
2 耶和華鼓勵你明智噉為你嘅未來做計劃。（傳道書12:1；馬太福音6:20）大自然有迷人嘅風景、悦耳嘅聲音、美味嘅食物。耶和華想通過呢一切話俾你知，佢真係好想你開心快樂。再諗吓，耶和華點樣關心我哋，點樣教導我哋過最好嘅生活。耶和華對嗰啲拒絶接受佢指引嘅人話：“我憎恨嘅事，你哋偏偏去做。……睇吓！我嘅僕人必因内心快樂而歡呼”。（以賽亞書65:12-14）耶和華嘅子民喺生活上做明智嘅選擇，就可以榮耀耶和華。（箴言27:11）
開心快樂嘅人生計劃
3．耶和華俾咗乜嘢建議你呢？
3 喺計劃人生方面，耶和華俾咗乜嘢建議你呢？因為耶和華創造咗人類，佢知道人認識同忠心事奉佢，就可以得到快樂。（詩篇128:1；馬太福音5:3）動物就完全唔同，佢哋有嘢食、有水飲、繁衍後代就滿足。上帝知道人類唔會淨係滿足於呢啲需要，佢希望你追求其他目標而得享幸福快樂。你嘅創造主係“仁愛和平嘅上帝”、“快樂嘅上帝”，佢“照自己嘅形像”創造人。（哥林多後書13:11；提摩太前書1:11；創世記1:27）效法仁愛嘅上帝，你就會好喜樂。聖經話俾我哋知一個人生嘅基本真理，就係“施與比接受更快樂”。你係咪都親身體驗過呢個真理？（使徒行傳20:35）所以，耶和華期待你為未來做好計劃，善用一生向上帝同其他人表現愛心。（請讀馬太福音22:36-39）
4,5．點解耶穌咁喜樂呢？
4 耶穌基督為年輕人樹立完美嘅榜樣。佢細個嗰陣時，一定過得好開心。聖經話“有嬉笑嘅時候……有歡躍嘅時候”。（傳道書3:4）耶穌通過學習聖經親近耶和華。佢12歲嘅時候，聖殿裏面嘅老師都對耶穌喺屬靈方面嘅“悟性同對答詫異不已。”（路加福音2:42,46,47）
5 耶穌長大成人之後，仍然保持喜樂。點解佢咁喜樂呢？佢知道，耶和華想佢“向窮人宣揚好消息……盲眼嘅能復明”。（路加福音4:18）耶穌做耶和華所委派嘅事使自己充滿喜樂。詩篇40:8講出咗耶穌嘅心聲：“我嘅上帝啊，我樂於遵行你嘅旨意”。耶穌好鍾意教導人認識佢嘅天父。（請讀路加福音10:21）有一次，耶穌向一個婦人傳道之後，同佢嘅門徒講：“我嘅食物就係遵行差派我嚟嗰一位嘅旨意，完成佢嘅工作。”（約翰福音4:31-34）向上帝同向人表現愛心，令耶穌深感喜樂。如果效法耶穌，你都會好喜樂㗎！
6．同有經驗嘅基督徒傾吓你嘅人生計劃，點解對你大有幫助？
6 好多基督徒喺年輕嘅時候就做先驅，親身體驗到真正嘅喜樂。你有冇試過同佢哋傾吓你嘅人生計劃呢？“唔先商議，計劃失敗；集思廣益，事必有成。”（箴言15:22）呢啲熱心服務嘅弟兄姊妹好可能會話俾你知，參與全時服務可以得到好好嘅訓練，使你一生受益。耶穌喺天上一直受到父親教導，佢嚟到地上之後，通過傳道工作學到更多，體會到更多。無論係用好消息打動人心，定係喺考驗下保持忠義，佢都從中得到好大嘅喜樂。（請讀以賽亞書50:4；希伯來書5:8；12:2）等我哋一齊睇吓，先驅工作點樣為你打開服務嘅大門，帶嚟更大嘅喜樂。
幫助人成為基督徒係最好嘅工作
7．點解好多年輕嘅弟兄姊妹好鍾意幫助人成為基督徒？
7 耶穌話：“你哋要去，使所有國族嘅人做我嘅門徒……教導佢哋”。（馬太福音28:19,20）幫助人成為基督徒，係最令人心滿意足，又可以榮耀上帝嘅工作。同其他工作一樣，提高你嘅技能係需要時間嘅。迪莫西弟兄十幾歲就開始做先驅，佢話：“我好鍾意全時事奉耶和華，因為呢個係我對耶和華表達愛嘅方式。一開始，我一個聖經學生都冇，但後來搬咗去另一個地區，一個月之内就揾到幾個聖經學生，有個學生仲開始參加聚會添。參加咗為期兩個月嘅獨身弟兄聖經研習班之後，a我收到新委派，喺新嘅地區又揾到四個聖經學生。我好鍾意教人聖經，因為我可以睇到聖靈發揮作用，改變佢哋。”（帖撒羅尼迦前書2:19）
8．有啲年輕嘅弟兄姊妹，點樣幫助更多人成為基督徒？
8 有啲年輕基督徒學習另一種語言。例如，嚟自北美洲嘅雅各寫道：“我七歲嗰時，好多同班同學都係越南人。我好想幫佢哋認識耶和華，所以冇幾耐，我就開始學習佢哋嘅語言。我通常都會對照英語同越南語嘅《守望台》嚟學習。我又喺附近一個越南語會衆度識到啲新朋友。我喺18歲嗰年開始做先驅。之後，我參加咗獨身弟兄聖經研習班。呢個課程對我目前嘅先驅委派好有幫助。喺而家嘅地區，我係越南語小組唯一嘅長老。好多越南人聽到我講佢哋嘅語言就覺得好驚訝，佢哋請我入屋，所以好多時我都有機會同佢哋討論聖經。有啲人繼續進步，後來仲受咗浸添。”（參考使徒行傳2:7,8）
9．幫助人成為基督徒點樣使你得益不淺？
9 幫助人成為基督徒可以使你得益不淺，例如幫你養成良好嘅工作習慣，改善溝通技巧，培養自信心，同埋識得點樣待人接物。（箴言21:5；提摩太後書2:24）另一個益處就係，你會得到特别嘅喜樂。因為你幫助人成為基督徒嘅同時，亦都幫助自己更加深入了解聖經，加强信心。你仲可以學到點樣親近耶和華，同佢一齊並肩工作。（哥林多前書3:9）
10．喺反應冷淡嘅地區，你可以點樣得到喜樂？
10 就算喺你嘅地區，大多數人對聖經嘅好消息反應冷淡，你都可以因為傳道工作而得到喜樂。幫助人成為基督徒，需要會衆所有人互相合作。雖然，最終會受浸嘅人唔多，而揾到佢哋嘅，只係個别弟兄姊妹，不過會衆每一個人都可以從中得到喜樂。例如，布蘭登喺一個反應冷淡嘅地區，做咗九年先驅。佢話：“我鍾意傳講好消息，因為呢個係耶和華叫我哋做嘅。我畢業之後冇幾耐，就開始做先驅。我好鍾意鼓勵會衆入面年輕嘅弟兄，亦都好開心睇到佢哋喺屬靈上進步。後來，我參加咗獨身弟兄聖經研習班，收到一個新嘅先驅委派。雖然咁耐以來，我喺地區冇幫到任何一個人進步到受浸，但係其他弟兄姊妹有。我好高興自己喺年輕嗰時就做好計劃，全心投入傳道工作。”（傳道書11:6）
計劃可以點樣引領你
11．有好多年輕人鍾意參與邊種形式嘅神聖服務？
11 為耶和華服務嘅方式有好多。例如，興建王國聚會所嘅需求好大，所以好多年輕人都參與志願建築工程。興建王國聚會所係神聖嘅服務，可以榮耀上帝，你自己亦可以從呢個服務得到好大嘅喜樂。就好似其他嘅神聖服務一樣，有機會同弟兄姊妹一齊工作係一件非常開心嘅事。參與建築工作會令人大大得益，可以加强你嘅安全意識，使你更加勤奮，同埋學識點樣同監督通力合作。
好多福分等住嗰啲參與全時服務嘅人（請睇第11-13段）
12．先驅工作可以帶嚟乜嘢服務機會？
12 一個叫做凱文嘅弟兄話：“我細細個就立定決心，將來要全時為耶和華服務。我19歲嘅時候終於可以做先驅嘞。我用部分時間同一個做建築嘅弟兄打工嚟維持自己嘅生活。我學識點樣安裝屋頂同門窗。後來，有兩年嘅時間我參加咗颶風救援小組，幫手重建王國聚會所同弟兄姊妹嘅房屋。當我聽到南非有建築需求嗰時，就提交申請，之後受到邀請。喺非洲，每幾個星期，我就做完一個王國聚會所工程，跟住又搬去第二度開始另一個。我同建築隊嘅弟兄姊妹一齊生活，一齊討論聖經，一齊工作，我哋就好似一家人噉。我都好鍾意每個星期同當地嘅弟兄姊妹一齊傳道。我細個嗰時做嘅決定，使我有意想不到嘅喜樂。”
13．伯特利服務點樣使年輕人得到喜樂？
13 有啲人實現咗佢哋全時為耶和華服務嘅目標，而家喺伯特利工作。伯特利服務係一種快樂嘅生活方式，因為你喺嗰度所做嘅每一件事，都係為耶和華而做嘅。伯特利家庭協助供應屬靈嘅食物。一個叫做達斯廷嘅伯特利成員話：“我九歲嗰時就將全時服務視為我嘅人生目標，一畢業就開始做先驅。一年半之後，我受到邀請去伯特利，喺嗰度我學識點樣操作印刷機，後來又做編寫電腦程式嘅工作。喺伯特利，我好開心可以聽到關於全球傳道工作進展嘅第一手資料。我好鍾意呢種服務，因為我哋喺呢度所做嘅，可以幫助人親近耶和華。”
點樣計劃你嘅未來？
14．你可以點樣為全時服務做準備呢？
14 你可以點樣為全時服務做準備呢？最重要嘅係培養屬靈嘅特質，呢啲特質可以幫助你更好噉為耶和華服務。所以你而家就要更加努力閲讀上帝嘅話語，深入沉思經文嘅含義，喺聚會嗰時揾機會表達你嘅信心。在學期間，你可以參與傳道，積累更多經驗同埋提高傳道技巧。你婉轉得體噉向人提出問題，留心聽佢哋嘅諗法，就可以慢慢學識關心人。你都可以主動為會衆做多啲服務，例如幫手清潔同維修聚會所。耶和華好鍾意嗰啲態度謙卑又甘心獻出自己嘅人。（請讀詩篇110:3；使徒行傳6:1-3）使徒保羅邀請提摩太參與特派傳道工作，因為“路司得同以哥念嘅弟兄都讚賞佢。”（使徒行傳16:1-5）
15．有啲乜嘢方法，可以幫助你做好計劃嚟維持生活？
15 先驅一般都要賺錢維持生活。（使徒行傳18:2,3）或者你可以計劃吓，報讀一啲可以幫你喺當地揾到兼職嘅職業培訓課程。你做計劃嘅時候，可以請教分區監督同本地嘅先驅。問吓佢哋有乜嘢工作既可以維持生活，又可以兼顧先驅工作。聖經都鼓勵你，“要將你嘅事交託俾耶和華，你嘅計劃就能够成功。”（箴言16:3；20:18）
16．年輕嘅時候就全心事奉耶和華，點樣裝備你喺未來負起其他責任？
16 你可以肯定，耶和華希望你“緊握”幸福快樂嘅未來。（請讀提摩太前書6:18,19）先驅工作使你有更多機會接觸其他先驅同工，幫助你成為成熟嘅基督徒。好多人都覺得，年輕嘅時候就全心事奉耶和華，可以使佢哋日後嘅婚姻更加美滿。嗰啲喺結婚之前參與先驅工作嘅弟兄姊妹，通常結咗婚之後都會繼續一齊做先驅。（羅馬書16:3,4）
17,18．點解計劃未來嘅人生牽涉到你嘅内心？
17 計劃未來嘅人生牽涉到你嘅内心。詩篇20:4話：“願［耶和華］成全你嘅心願，實現你嘅所有計劃。”所以，要認真諗吓你想點樣運用自己嘅一生。要沉思耶和華喺現今點樣實現佢嘅旨意，然後，睇吓你自己可以點樣參與其中。跟住，計劃好你嘅人生，去做令耶和華喜悦嘅事啦。
18 全心事奉耶和華會令你深感滿足，因為呢個係榮耀上帝嘅生活方式。冇錯，“要因耶和華而滿心喜樂，佢就將你心裏面所求嘅賜俾你。”（詩篇37:4）
a 已被王國傳福音者訓練班取代。