發出悦耳嘅聲音！
“要歌頌我哋嘅上帝，噉係美好嘅事。”——詩篇147:1
1．唱詩可以達到乜嘢目的？
一個受歡迎嘅作詞人曾經講過：“字詞可以引發思考，音樂可以牽動情感。不過一首歌既能打動人心，又能激發思考。”我哋可以通過唱詩嚟表達對天父耶和華嘅愛同讚美。無論係一個人定係同弟兄姊妹一齊嘅時候，唱詩都係正確崇拜嘅重要一環。
2,3．（甲）有啲人對喺聚會裏面唱詩有乜嘢感覺？（乙）我哋會討論乜嘢問題？
2 但係對你嚟講，喺聚會嗰陣要開口唱詩歌，有乜嘢感覺？你會唔會覺得好尷尬？喺一啲文化裏面，男人會覺得喺公衆場合唱歌係好唔自在嘅。如果帶頭嘅弟兄揾藉口唔唱詩歌，或者喺聚會唱詩歌嗰陣做其他嘢，佢哋噉樣做就可能會影響到整群會衆。（詩篇30:12）
3 如果我哋認為唱詩係我哋崇拜嘅一部分，噉我哋喺聚會唱詩嗰陣就唔會行開或者缺席。所以，我哋每個人都要問吓自己：“喺聚會嗰陣唱詩，我有乜嘢感覺？我可以點樣消除顧慮，大膽唱詩？喺唱詩嘅時候，我又可以點樣唱出詩歌嘅神韻？”
唱詩——正確崇拜嘅重要一環
4,5．喺古代以色列人嘅崇拜當中，唱詩嘅安排有幾咁重要？
4 耶和華嘅忠僕一直通過音樂嚟讚美佢。值得留意嘅係，當古代以色列人忠心為耶和華服務嘅時候，喺佢哋嘅崇拜當中，唱詩係必不可少嘅。例如，喺大衛王為聖殿做籌備工作嗰陣，佢安排咗4000個利未人擔任樂師，其中有288人“喺歌頌耶和華方面受過訓練，歌藝精湛”。（歷代志上23:5；25:7）
5 喺聖殿嘅呈獻禮上，音樂同唱詩係好重要嘅一部分。經文描述：“號筒手同歌手都一齊同聲讚美感謝耶和華。佢哋吹號擊鈸，用各種歌唱嘅樂器高聲讚美耶和華……耶和華嘅榮光充滿咗上帝嘅殿。”可想而知，嗰個場景幾咁鼓舞人心！（歷代志下5:13,14；7:6）
6．請描述尼希米喺耶路撒冷做省長嗰時嘅精彩音樂合奏。
6 尼希米帶領忠心嘅以色列人重建耶路撒冷城牆，同時佢亦都組織利未部族歌手喺各種樂器嘅伴奏下高歌。喺舉行重建城牆落成禮嘅時候，精彩嘅音樂合奏使氣氛更加喜樂。當時有“兩大隊感恩合唱團”，一隊向右邊走，一隊向左邊走，然後兩隊喺靠近聖殿嘅城牆上會合。樂隊嘅奏樂聲響徹四方。（尼希米記12:27,28,31,38,40,43）耶和華一定好開心聽到佢嘅子民熱心唱詩讚美佢。
7．耶穌點樣表明唱詩係基督徒崇拜嘅重要部分？
7 基督徒會衆成立之後，音樂仍然係正確崇拜嘅重要部分。喺人類歷史上最重要嘅嗰一晚，耶穌設立咗主嘅晚餐之後，亦都同門徒一齊唱詩歌。（請讀馬太福音26:30）
8．公元1世紀嘅基督徒點樣為唱詩立下先例？
8 喺一齊唱詩讚美耶和華方面，公元1世紀嘅基督徒立下咗一個先例。雖然佢哋經常喺簡陋嘅私人屋企聚會，但係佢哋唱詩讚美耶和華嘅熱情並冇因此而減弱。使徒保羅喺聖靈嘅啟示下，勸勉基督徒同工：“要用詩篇、讚美上帝嘅詩歌、洋溢恩慈嘅屬靈歌曲，不斷彼此教導勸戒，從心底歌頌耶和華。”（歌羅西書3:16）我哋嘅詩歌的確係“洋溢恩慈嘅屬靈歌曲”。呢啲詩歌亦都係“忠信睿智嘅奴隸”所提供嘅靈糧之一。（馬太福音24:45）
克服唱詩嘅恐懼
9．（甲）有乜嘢因素會阻礙人喺聚會同大會高聲歡唱？（乙）我哋應該點樣唱詩讚美耶和華？邊個應該帶頭噉樣做？（請睇吓課文開頭嘅圖片）
9 假如喺你嘅家庭、文化或者環境入面冇唱歌嘅習慣，噉又點呢？由於有現代科技，你可以欣賞到職業歌手唱嘅歌。但係如果你攞自己同娛樂界嘅職業歌手比較，你可能會覺得有啲尷尬，技不如人。不過，我哋唔好俾呢啲因素阻礙我哋唱詩讚美耶和華。相反，我哋應該攞起歌書，抬起頭，衷心唱出自己嘅感受。（以斯拉記3:11；請讀詩篇147:1）今日，喺好多王國聚會所，歌詞會顯示喺屏幕上，呢個可以幫助我哋放聲唱出詩歌。值得留意嘅係，長老參加嘅王國職務訓練班，亦都包括唱王國詩歌嘅環節。目的係要强調長老有責任喺會衆裏面帶頭唱詩歌。
10．如果我哋因為恐懼就唔敢放聲唱詩歌，就應該記住乜嘢？
10 阻礙好多人放聲唱詩歌嘅其中一個原因係恐懼。可能我哋驚喺人面前顯得太特出，或者驚自己唱得唔好聽。雖然我哋喺講話嘅時候“都難免多次犯錯”，但係我哋唔會因為呢個理由就唔再講話。（雅各書3:2）噉點解因為我哋嘅歌喉唔好就唔敢唱詩讚美耶和華呢？
11,12．有乜嘢方法可以改善我哋嘅歌喉？
11 我哋唔敢唱詩歌，可能係因為我哋唔係好識點樣唱。不過，我哋可以通過一啲基本建議嚟改善我哋嘅歌喉。a
12 你可以學吓正確嘅呼吸方法嚟幫助你大聲有力噉唱出詩歌。就好似燈泡有電先會發光，同樣呼吸使我哋有力氣去講話同唱歌。你唱歌嘅音量應該同平時講話一樣，甚至可以更大聲。（想了解更多建議，請睇《神聖教育使你得益——傳道訓練班課本》181-184頁“適當地控制呼吸”呢個標題下嘅資料。）其實，聖經有時都鼓勵耶和華嘅子民喺唱詩讚美佢嗰陣要“歡呼”。（詩篇33:1-3）
13．我哋可以點樣更有自信噉唱出詩歌？
13 喺家庭崇拜或者自己一個人嘅時候，可以試吓：喺歌書入面選出你最鍾意嘅詩歌，然後充滿自信噉大聲讀出歌詞。之後，用同樣嘅音量，一口氣讀出其中一段歌詞，跟住將呢一段大聲唱出嚟。（以賽亞書24:14）噉樣你唱歌嘅聲音就會變得更加雄厚有力。歌聲變得有力係一件好事，唔使因為噉而擔心或者覺得尷尬！
14．（甲）擘大啲個口可以點樣幫助我哋唱詩？（請睇附欄“點樣改善你嘅歌喉”）（乙）喺改善聲音質素方面，你揾到乜嘢實用嘅建議？
14 我哋需要擴張口腔嘅空間，先可以有雄厚嘅歌聲。所以，另一個建議係要將個口擘大啲，仲要大過平時講話。如果你覺得自己嘅聲線微弱或者音調過高又可以點做？關於呢方面嘅實用建議，請睇《神聖教育使你得益——傳道訓練班課本》184頁附欄“克服具體困難”。
衷心唱出讚美詩歌
15．（甲）2016年嘅年會有乜嘢宣布？（乙）點解需要出版新歌書？
15 喺2016年賓夕法尼亞州守望台聖經書社嘅年會上，大家都好興奮聽到中央長老團成員斯蒂芬·萊特弟兄作出一項宣布，組織會發行一本名為《向耶和華“高聲歡唱”》嘅新歌書，而且我哋好快就可以喺聚會嗰陣使用。萊特弟兄解釋要更新歌書嘅一個原因係，要同《聖經新世界譯本》修訂版（英語）保持一致。呢個調整包括删除或者修改歌詞，因為《新世界譯本》2013年修訂版唔會再使用一啲字詞。另外，新歌書亦都收錄咗一啲新歌，係同傳道工作同埋感激贖價有關嘅。再加上，因為唱詩喺我哋嘅崇拜當中係非常重要嘅，所以中央長老團希望出版一本封面設計同《新世界譯本》修訂版一樣嘅新歌書。
16,17．新歌書有乜嘢調整？
16 《向耶和華“高聲歡唱”》裏面嘅詩歌序列係以主題嚟編排嘅，目的係幫助人更容易搜尋詩歌。例如，頭12首同耶和華有關，之後嘅8首同耶穌以及贖價有關。歌書亦都有一個分類索引，方便弟兄喺準備公衆演講嗰時揾到切合講題嘅詩歌。
17 為咗幫助大家更由衷噉唱出詩歌，新歌書喺表達上更加清晰易明，亦都删除咗一啲喺生活上唔再普遍使用嘅字詞。詩歌“保護你的心”改為“要保護自己的内心”係好合適嘅。點解呢？喺聚會同大會裏面，一啲新人、對聖經感興趣嘅人、年輕人同姊妹唱呢首歌嘅時候，可能會有奇怪嘅感覺，覺得自己好似喺度勸導人要點樣做。所以，歌名同歌詞都作出咗一啲調整。
喺家庭崇拜嘅時候練習唱詩（請睇第18段）
18．點解我哋想更加熟悉新詩歌？（另外請參考腳注）
18 《向耶和華“高聲歡唱”》裏面嘅好多詩歌都係以禱告嘅形式編寫嘅。我哋可以通過呢啲詩歌向耶和華表達自己嘅感受，而另一啲詩歌就有助於“激發［我哋嘅］愛心，促進善行”。（希伯來書10:24）我哋每個人肯定都好想更加熟悉詩歌嘅旋律、節奏同歌詞。我哋可以喺jw.org網站上面播放合唱版嘅詩歌。我哋喺屋企練習唱詩嘅時候，可以學吓點樣衷心而有自信噉唱出嚟。b
19．會衆嘅所有人可以用乜嘢直接嘅方式嚟崇拜耶和華？
19 要記住，唱詩係我哋崇拜嘅重要部分。我哋亦都可以通過唱詩，衷心噉向耶和華表達愛同感激之心。（請讀以賽亞書12:5）你開心噉唱出詩歌，都可以鼓勵到其他人有自信噉唱出嚟。事實上，喺會衆入面，年長嘅，年幼嘅，或者係新近感興趣嘅，都可以用呢個直接嘅方式嚟崇拜耶和華。所以，唔使覺得唔好意思用唱詩呢種方式去表達自己嘅感受。相反，要聽從詩篇執筆者嘅清晰指引：“要向耶和華歌唱”。冇錯，要發出悦耳嘅聲音！（詩篇96:1）
a 關於點樣改善我哋歌喉嘅進一步資料，請睇JW電視網2014年12月嘅節目（英語）（影片點播——每月節目與宣布）。
b 為咗幫助我哋更有感情噉唱出詩歌，喺大會上下午嘅節目開始之前，都會播放10分鐘嘅音樂特輯。呢啲音樂係為咗準備好我哋嘅内心同頭腦，使我哋更好噉聆聽接住落嚟嘅節目而編寫嘅。所以我哋受到提醒，喺大會開始之前就應該返到自己嘅座位，留心欣賞呢啲音樂。