每日同耶和華一齊工作

1． 喺邊啲方面我哋可以同耶和華一齊工作？

耶和華係人類嘅創造主，佢希望完美嘅人類可以同佢合作，一齊實現佢對地球嘅旨意。雖然人類而家都唔完美，但忠於上帝嘅人仍然能够每日同耶和華一齊工作。例如，我哋做“上帝嘅同工”，傳講上帝王國嘅好消息，並幫助人成為基督嘅門徒。（哥林多前書3:5-9）試諗吓，我哋可以同宇宙全能嘅創造主合作，完成呢項偉大嘅工作，係幾咁大嘅殊榮！不過，傳講好消息同幫助人成為基督徒唔係我哋同耶和華一齊做嘅唯一一項工作。呢篇課文會分析，喺幫助家人同弟兄姊妹、表現好客精神、參與志願建築工程同埋擴大神聖服務呢幾個方面，我哋可以點樣同耶和華一齊工作。（歌羅西書3:23）

2． 點解喺事奉耶和華方面，我哋唔應該同人比較？

² 討論呢篇課文嘅時候請謹記，每個人嘅年齡、健康、環境同能力都唔一樣。所以，喺事奉耶和華方面，千祈唔好同其他人比較。使徒保羅受聖靈啟示話：“每個人都應該察驗自己所做嘅事。噉樣，人高興係因為自己嘅成就，唔係因為同人比較。”（加拉太書6:4）

幫助家人同弟兄姊妹

3． 點解話，照顧家人就係同耶和華合作？

³ 耶和華希望佢嘅僕人照顧自己嘅家人。例如：有啲弟兄姊妹要工作養家；有啲姊妹要留喺屋企照顧年幼嘅兒女；有啲成年嘅子女要照顧體弱多病嘅父母。呢啲都係必須要做嘅事。聖經話：“人唔照顧親屬，尤其係唔照顧自己嘅家人，其實就等於否認信仰，比不信嘅人更加唔好。”（提摩太前書5:8）如果你有呢啲家庭責任，可能會覺得，自己好難抽出時間為耶和華做更多服務。請唔好灰心！你照顧好家人，耶和華都會感到開心。（哥林多前書10:31）

4． 基督徒父母可以點樣表明自己將王國放喺首位？噉樣做有乜嘢美好結果？

⁴ 基督徒父母幫助兒女定立目標事奉耶和華，就係同耶和華合作。好多兒女自細受到父母良好嘅教導，後來都投身全時服務，甚至去到好遠嘅地方為耶和華工作。佢哋有啲做特派傳道員，有啲做先驅去需求更大嘅地區幫手，有啲就從事伯特利工作。雖然兒女遠離家鄉，父母唔能够經常同佢哋喺一齊，不過，有自我犧牲精神嘅父母會鼓勵兒女繼續執行佢哋嘅委派。點解？佢哋知道兒女將王國放喺生活首位，就感到非常喜樂同滿足。（約翰三書4）哈拿認為，自己嘅仔撒母耳係“借俾”耶和華嘅。可能好多基督徒父母都同哈拿有一樣嘅諗法。佢哋有正確嘅觀點，覺得同耶和華合作係好大嘅殊榮。（撒母耳記上1:28）

5． 你可以點樣為信徒同工提供實際嘅幫助？（請睇吓課文開頭嘅圖片）

⁵ 如果你嘅家庭責任唔係咁多，噉你可唔可以幫助嗰啲年紀老邁、體弱多病，或者其他有需要嘅信徒同工？你可以細心留意吓自己嘅會衆，睇吓邊啲人需要幫助。你或者可以花一啲時間幫助一個基督徒姊妹照顧佢年老嘅父母，噉佢就可以抽身處理其他事。你亦都可以接送一啲有需要嘅弟兄姊妹參加聚會，幫佢哋購買食物或生活用品，或者陪佢哋去醫院探望親友。可能耶和華就係通過你向呢啲同工伸出援手，回應佢哋嘅禱告。（請讀哥林多前書10:24）

表現好客精神

6． 表現好客意味住乜嘢？

⁶ 我哋身為上帝嘅同工，都應該有慷慨好客嘅精神。喺聖經原文，翻譯為“好客”嘅希臘語詞，意思係“仁慈噉對待陌生人”。（希伯來書13:2）聖經入面嘅好多記載都教導我哋用噉樣嘅方式表現愛心。（創世記18:1-5）我哋能够，亦都應該經常揾機會幫助其他人，無論對方係咪我哋嘅信徒同工。（加拉太書6:10）

7． 慷慨接待全時僕人點樣使自己得益？

⁷ 作為耶和華嘅同工，你願唔願意慷慨款待到訪嘅全時僕人？（請讀約翰三書5,8）我哋噉樣做，就可以同弟兄姊妹“互相鼓勵”。（羅馬書1:11,12）請睇吓奧拉夫嘅經歷。幾十年前，一個獨身嘅分區監督探訪奧拉夫嘅會衆，不過冇人能够接待佢。年輕嘅奧拉夫就問不信嘅父母，可唔可以俾分區監督住喺屋企。父母同意咗，不過奧拉夫就要自己瞓梳化。呢個犧牲係好值得嘅。奧拉夫回憶話：“嗰個星期過得真係開心！分區監督同我每日一早就起身，一邊食早餐一邊討論各種有意思嘅話題。我得到好多鼓勵，好想投身全時服務。”奧拉夫後來成為特派傳道員，40年來喺唔同嘅國家服務。

8． 就算傳道對象反應唔係咁好，點解我哋仲係應該表現仁慈？請舉例。

⁸ 我哋可以喺好多方面向陌生人表現愛心。即使一開始對方唔接受我哋嘅好意，我哋都應該噉樣做。請睇吓以下嘅例子。一個西班牙嘅姊妹幫助嚟自厄瓜多爾嘅耶茜卡學習聖經。有一次，佢哋討論嘅時候，耶茜卡一直係噉喊，於是姊妹問佢發生咩事。耶茜卡話，佢喺搬嚟西班牙之前，生活好貧窮。有一日佢冇錢買食物，淨係可以俾啲水個女飲。佢一邊氹個女瞓覺，一邊向上帝禱告。冇幾耐，就有兩個姊妹嚟探訪佢。不過，耶茜卡對佢哋一啲都唔客氣，仲撕爛咗佢哋送俾佢嘅雜誌。佢話：“唔通呢啲雜誌可以餵飽我個女咩？”兩個姊妹嘗試安慰佢，不過冇咩用。之後，兩個姊妹將一籃食物放喺佢門口。耶茜卡被姊妹嘅仁慈舉動深深打動。佢亦都感到自責，因為自己居然冇留意到上帝回應咗自己嘅禱告。而家，耶茜卡決心事奉耶和華。呢啲姊妹嘅慷慨精神，帶嚟幾咁美好嘅結果！（傳道書11:1,6）

參與志願服務

9,10． （甲）古代嘅以色列人通過乜嘢機會參與志願服務？（乙）今日，基督徒男子可以喺邊啲方面為會衆服務？

⁹ 喺古代，以色列人有好多機會可以參與志願服務。（出埃及記36:2；歷代志上29:5；尼希米記11:2）今日，你亦都可以通過唔同方式獻出自己嘅時間、資財同技能為弟兄姊妹服務。噉樣做會令你得到好多喜樂同福分。

¹⁰ 上帝嘅話語鼓勵會衆嘅男子盡力追求善工同監督嘅職分，呢個都係同上帝一齊工作嘅一個方式。（提摩太前書3:1,8,9；彼得前書5:2,3）基督徒男子噉樣做，就係想喺屬靈上同實際上幫助其他人。（使徒行傳6:1-4）長老有冇曾經委派你做招待員，或者請你協助管理書籍同傳道地區、保養王國聚會所或者其他事情呢？好多弟兄喺呢啲方面為會衆服務，從中得到好大嘅喜樂。

11． 一個姊妹參與志願建築工程嗰時結交咗好多朋友，佢點樣從中得益？

¹¹ 參與志願工程嘅人可以結識好多新朋友。一個叫瑪吉嘅姊妹有18年嘅時間一直參與王國聚會所建築工程。喺唔同嘅工程中，佢都關心同培訓年輕嘅姊妹。佢覺得參與志願建築工程可以同其他弟兄姊妹互相鼓勵。（羅馬書1:12）每當佢喺生活上遇到困難，喺參與建築工程嗰時結識嘅好多朋友都會俾佢好大嘅支持同幫助。你有冇曾經參與過類似嘅志願建築工程呢？無論你有冇特别嘅技能，都可以參與。

12． 發生災難嘅時候，我哋可以點樣幫助受災嘅弟兄姊妹？

¹² 發生災難嘅時候，我哋為受災嘅弟兄姊妹提供實際嘅幫助，從而有機會同上帝一齊工作。例如，我哋可以喺經濟上援助同工。（約翰福音13:34,35；使徒行傳11:27-30）另一個方法就係，協助災後嘅清理同重建工作。喺波蘭，有個姊妹叫做加芙列拉，佢間屋俾洪水摧毁咗。佢好開心見到附近會衆嘅弟兄姊妹過嚟幫助佢。佢回憶話：“我唔想講自己失去咗啲乜嘢，因為嗰啲只不過係物質上嘅。反而我好想大家知道，我得到咗更多。呢次經歷使我感受到，身為基督徒會衆嘅一分子係好大嘅殊榮，亦都使我得到好大嘅喜樂。”好多災後接受過幫助嘅弟兄姊妹都有同樣嘅感覺。而嗰啲同耶和華一齊工作，幫助同工嘅弟兄姊妹都感到非常喜樂同滿足。（請讀使徒行傳20:35；哥林多後書9:6,7）

13． 志願服務點樣强化我哋同耶和華嘅關係？請舉例。

¹³ 有啲見證人因為自己嘅地區發生戰爭，就逃到美國避難。斯蒂芬妮同其他同工向呢啲逃難嘅弟兄姊妹伸出援手，幫助佢哋揾屋同預備傢俬。斯蒂芬妮話：“佢哋因為感受到世界弟兄團體嘅關愛就好喜樂，亦都滿懷感激。我哋見到佢哋噉樣都好感動。”佢又話：“呢啲家庭覺得我哋幫咗佢哋好多，其實我哋從佢哋嗰度得到更多。我哋大家都喺呢個過程中體驗到愛心、團結、信心同埋對耶和華嘅仰賴，呢個使我哋更加愛耶和華，亦都使我哋更加珍視從上帝組織所得到嘅一切。”

擴大服務

14,15． （甲）以賽亞先知有點樣嘅精神？（乙）今日嘅王國傳道員可以點樣效法以賽亞？

¹⁴ 你係咪想為耶和華做更多服務？你願唔願意搬去一個需要更多傳道員嘅地區？當然，我哋事奉耶和華唔一定要離鄉别井，不過好多弟兄姊妹因為情況允許，就願意搬到其他地方擴大服務。當耶和華問“我可以差遣邊個呢？邊個肯為我哋去呢？”嘅時候，佢哋就表現出同以賽亞先知一樣嘅精神，回答話：“我喺呢度！請差遣我！”（以賽亞書6:8）你有冇意願擴大服務？你嘅情況允唔允許？你仲可以喺邊啲方面提供幫助？

¹⁵ 關於傳講好消息同幫助人成為基督徒嘅工作，耶穌話：“莊稼的確好多，工人實在太少。所以，你哋要懇求莊稼嘅主人，差工人出去收割佢嘅莊稼。”（馬太福音9:37,38）你可唔可以做先驅，或者搬去需求更大嘅地區服務，又或者你可唔可以幫助其他人噉樣做？好多弟兄姊妹都覺得，向耶和華同其他人表現愛心嘅最好方式，就係投身先驅服務，去需求更大嘅地區參與收割屬靈莊稼嘅工作。可能你仲有其他方法可以擴大服務，只要你盡力去做，就一定會滿心喜樂。

16,17． 如果你想為耶和華擴大服務，可以把握乜嘢機會？

¹⁶ 你願唔願意投身伯特利服務或者協助建築工程？無論作為臨時成員抑或通勤人員，你係咪都願意獻出自己？有啲弟兄姊妹願意為耶和華去任何地方，接受任何委派。佢哋可能掌握某啲技能，喺某方面亦都好有經驗，但如果組織有特别嘅需要，佢哋都樂意接受唔同嘅委派。上帝嘅組織一直都需要呢啲甘心樂意獻出自己嘅弟兄姊妹。耶和華亦都好賞識佢哋所表現嘅自我犧牲精神。（詩篇110:3）

¹⁷ 你願唔願意接受更多訓練，從而裝備好自己，使自己更有效噉為耶和華服務？如果你願意，就可以立下目標，努力符合資格參加王國傳福音者訓練班。嗰啲從事全時服務、有屬靈思想嘅弟兄姊妹，通過呢個訓練班得到好好嘅訓練，可以為上帝嘅組織做更多嘅工作。申請參加呢個訓練班嘅傳道員，願意喺畢業之後接受組織嘅任何委派。你係咪都好想把握呢個機會，盡力做更多嘅服務？（哥林多前書9:23）

18． 我哋每日同耶和華一齊工作，可以得到乜嘢益處？

¹⁸ 我哋待人慷慨，就表明我哋有良善、仁慈、愛心呢啲美好嘅特質。我哋作為耶和華嘅子民，每日都應該表現慷慨嘅精神，關心其他人。噉樣，我哋就可以得到喜樂、和平同幸福。（加拉太書5:22,23）無論個人情況係點，你都能够效法耶和華，向人表現慷慨，成為佢寶貴嘅同工！（箴言3:9,10）