Guiropa libru de Crónicas
21 Despué guti Jehosafat ne bicaachicabe laabe ndaaniʼ Xquidxi David, ra gaʼchiʼ ca bixhozebiidabe,* ne yanna maʼ caziiláʼdxibe casi caziiláʼdxicaʼ, ne maʼ xiiñibe Jehoram beeda gaca rey. 2 Ca bíʼchibe —ca xiiñiʼ Jehosafat— nga Azarías, Jehiel, Zacarías, Azarías, Miguel ne Sefatías; guirácabe nga ca xiiñiʼ Jehosafat, rey stiʼ Israel. 3 Ne bidii bixhózecabe laacabe stale regalu de plata ne oro ne stale cosa risaca ne guidxi nadipaʼ* ndaaniʼ guidxi Judá; peru reinu que bidiibe ni Jehoram, purtiʼ laa nga xiiñibe ni jma huaniisi.
4 Gucuaasibe reinu stiʼ bixhózebe, biitibe guiráʼ ca bíʼchibe né espada ne laaca biitibe caadxi príncipe stiʼ Israel para cadi chuʼ tu gucaalú laabe. 5 Napa Jehoram 32 iza dxi beeda gaca rey, ne biʼniʼ mandarbe xhono iza Jerusalén. 6 Ne yenándabe ni biʼniʼ ca rey stiʼ Israel, casi biʼniʼ ca familia stiʼ Acab, purtiʼ bichaganabe xiiñidxaapaʼ Acab. Ne bíʼnibe cosa ni cadi jneza nezalú Jehová. 7 Peru qué niná Jehová nunitilú ca familia stiʼ David pur acuerdu ni bíʼninebe laa, purtiʼ maca biʼniʼ prometerbe David, qué zusaana de gapa ti lámpara,* laa ne ca xiiñiʼ.
8 Ca dxi cayuni mandar Jehoram, maʼ qué niná guidxi Edom ñuni mandar Judá laacaʼ ne gulicaʼ ti rey sticaʼ. 9 Ngue runi gucuaa Jehoram ca comandante ne ca carru* stiʼ ne zecaʼ raqué. Biásabe huaxhinni ne biʼniʼ ganarbe ca edomita ni guluu leʼ laabe ne ca comandante stiʼ ca carru stibe. 10 Peru dede yanna qué naʼ Edom guni mandar Judá laa, ne ngueca biʼniʼ guidxi Libná tiempu que purtiʼ bidxiideche Jehoram Jehová, Dios stiʼ ca bixhozebiidabe. 11 Laaca bíʼnibe stale lugar ra nasoo* lu ca dani stiʼ Judá para gucaabe ca binni nabeza Jerusalén gucheenecaʼ Dios ni dxandíʼ ne guni adorarcaʼ xcaadxi dios, ne laaca bicaabe ca binni de Judá guixélecaʼ de Dios.
12 Últimu yendá ti mensaje ni bicaa profeta Elías ra nuube, luni ná: «Ndiʼ nga ni ná Jehová, Dios stiʼ bixhozebiidaluʼ David: “Qué ninándaluʼ ni biʼniʼ Jehosafat bixhózeluʼ, nin ni biʼniʼ Asá, rey stiʼ Judá. 13 Sínuque zinándaluʼ guiráʼ ni biʼniʼ ca rey stiʼ Israel ne cucaaluʼ Judá ne ca binni nabeza Jerusalén guni adorarcaʼ xcaadxi dios, cásica biʼniʼ adorar familia stiʼ Acab xcaadxi dios. Dede biitiluʼ ca bíʼchiluʼ, ca xiiñiʼ bixhózeluʼ, jma ndaʼ jneza ni rúnicaʼ que lii. 14 Nga runi zuni castigar Jehová xquídxiluʼ, ca xiiñiluʼ, ca xheelaluʼ ne zunidebe guiráʼ ca cosa stiluʼ. 15 Ne guizáʼ zaca huaraluʼ, dede zápaluʼ ti guendahuará lu doo xquiʼluʼ, ne zacaxirooni ra tidiʼ dxi, dede zaree doo xquiʼluʼ pur guendahuará ca”».
16 Para bicaa Jehová ca filisteu ne ca árabe ni nabeza gaxha de ca etíope gucaalucaʼ Jehoram. 17 Yechuucaʼ ndaaniʼ guidxi Judá ne zinecaʼ guiráʼ ca cosa risaca ni bidxélacaʼ ra lidxi* rey que, zinecaʼ ca xiiñibe ne ca xheelabe; ni biaana si nga Jehoacaz,* xiiñibe ni jma nahuiiniʼ. 18 Ne despué de bizaaca guiráʼ ndiʼ, biseendaʼ Jehová ti guendahuará malu ni qué rianda luguiáʼ Jehoram; gucahuará doo xquiʼbe. 19 Gudiʼdiʼ si ti tiempu, biaʼsi chupa iza, biree doo xquiʼbe pur guendahuará que, ne guizáʼ biʼniʼ sufrirbe para gútibe. Ne qué ñuni xquídxibe ti bele naroʼbaʼ para laabe, casi bíʼnicaʼ dxi gutiʼ ca bixhozebiidabe. 20 Nápabe 32 iza dxi gúcabe rey, ne biʼniʼ mandarbe xhono iza Jerusalén. Guirutiʼ ñuubaʼ ladxidóʼ dxi gútibe. Bicaachicabe laabe ndaaniʼ Xquidxi David, peru cadi ra gaʼchiʼ ca rey.