Primé libru de Crónicas
13 Guniʼné David ca xaíque stiʼ ti mil, ca xaíque stiʼ ti gayuaa ne guiráʼ ca xaíque. 2 Para gudxi David guiráʼ ca israelita ni nuu raqué: «Pa rábitu jneza ne pa nga nga ni racalaʼdxiʼ Jehová la?* guséʼndanu tu chitidxi xcaadxi bíʼchinu ni nabeza lu guiráʼ ca layú stiʼ guidxi Israel, ne tu chitidxi ca sacerdote ne ca levita ni nabeza ndaaniʼ ca guidxi ni napa layú ra rigaa guixi para guieegucaʼ* laanu. 3 Ne chicaanu Arca stiʼ Dios stinu». Purtiʼ ca dxi biʼniʼ mandar Saúl qué nizaaláʼdxicabe ni. 4 Guiráʼ ca israelita ni nuu raqué guyuucaʼ de acuerdu gúnicaʼ ni zaqué, purtiʼ guidubi guidxi que biiyaʼ jneza ni. 5 Ngue runi bisendacaa David guidubi naca guidxi Israel, dede ca ni nuu ruaa guiiguʼ* stiʼ Egipto hasta ca ni nabeza Lebó-Hamat,* para chicaacabe Arca stiʼ Dios ni dxandíʼ ni nuu Quiryat-Jearim.
6 Para guyé* David ne guidubi naca guidxi Israel Baalá —laca laani nga Quiryat-Jearim, ti guidxi stiʼ Judá— para chicaacaʼ Arca stiʼ Jehová, Dios ni dxandíʼ, ni zuba lu trono stiʼ luguiáʼ* ca querubín, nezalú Arca riʼ nga rusisácacabe labe. 7 De raqué bidxiibacabe* Arca stiʼ Dios ni dxandíʼ lu ti carreta nacubi ne guleecabe ni de ra lidxi Abinadab. Ne ca ni ziné carreta que nga Uzá ne Ahió. 8 Guizáʼ ziyecheʼ David ne guidubi naca guidxi Israel nezalú Dios ni dxandíʼ, ziyuundacabe ne ziguxhídxicabe arpa ne xcaadxi instrumentu ni napa cuerda, pandereta, címbalo* ne trompeta. 9 Peru ora yendácabe lu layú* stiʼ Kidón, biaʼ qué nutiixhi si ca toro que Arca que, ngue runi bisigaanáʼ Uzá para guinaaze ni. 10 Peru guizáʼ bidxiichiné Jehová Uzá, ne biiti laabe, purtiʼ bisigaanabe para guinaazebe Arca que, ne raqué gútibe, nezalú Dios. 11 Peru bidxiichi David* xiñee guizáʼ bidxiichiné Jehová Uzá,* ne gulee lácabe lugar que Pérez-Uzá* ne de yanna zacá lani.
12 Ne dxi que bidxibi David Dios ni dxandíʼ ne guníʼ: «Yanna, ¿ximodo guedaniáʼ Arca stiʼ Dios ni dxandíʼ yaʼ?». 13 Qué niné diʼ David Arca que ndaaniʼ Xquidxi David, lugar ra nabeza que, lugar de ngue biʼniʼ mandarbe chinécabe ni ra lidxi Obed-Edom, ti hombre nabeza Gat.* 14 Biaana Arca stiʼ Dios ni dxandíʼ ra nuu ca ni nabeza ra lidxi Obed-Edom; biaanani ra lídxibe chonna beeu. Ne qué nusaana Jehová de niguu ndaayaʼ guiráʼ ca ni nabeza ra lidxi Obed-Edom ne guiráʼ ni napa.