Primé libru de Crónicas
14 Biseendaʼ Hiram rey stiʼ Tiro caadxi mensajeru ra nuu David. Laaca biseendabe yaga cedru, albañil* ne carpinteru para gucuí ti yoo* para David. 2 Ne bidii David cuenta Jehová peʼ nga bicuí laa casi rey ndaaniʼ guidxi Israel, purtiʼ biʼniʼ reinu stibe guizáʼ nadipaʼ para gacané Israel, guidxi stiʼ.*
3 Gupa David jma xheelaʼ ndaaniʼ guidxi Jerusalén ne gúpabe jma xiiñibe, gunaa ne hombre. 4 Ndiʼ nga lá ca xiiñibe ni gúpabe Jerusalén: Samúa, Sobab, Natán, Salomón, 5 Ibhar, Elisúa, Elpélet, 6 Noga, Néfeg, Jafía, 7 Elisamá, Beeliadá ne Elifélet.
8 Ora gunna ca filisteu maʼ naca David rey stiʼ guidxi Israel, gudxíʼbacaʼ para chiyúbicaʼ laabe. Peru gunna David ni ne biree zigucaalú laacabe. 9 Ora yendá ca filisteu que, bicaalucaʼ ca binni nabeza ndaaniʼ valle stiʼ Refaím. 10 Para gunabadiidxaʼ David Dios: «¿Ziaaʼ zitindeniáʼ ca filisteu la? ¿Zusaanaluʼ laacabe lu nayaʼ la?». Para ná Jehová rabi laabe: «Zaa, guyé, purtiʼ zacaniáʼ lii guni ganarluʼ ca filisteu». 11 Ngue runi gudxiʼbaʼ David Baal-Perazim ne raqué binitilú laacabe. Ne guníʼ David: «Cásica richeza nisa ti lugar para tidiʼ, zacaca maʼ biquiiñeʼ Dios ni dxandíʼ nayaʼ para bixheleʼ ti neza para naa lade ca xhenemiguáʼ». Ngue runi gulee lácabe lugar que Baal-Perazim.* 12 Raqué bisaana ca filisteu que ca dios sticaʼ, ne bizaaquicabe cani ora biʼniʼ mandar David gúnicabe ni.
13 Despué, biguetaʼ bicaalú ca filisteu que ca binni ni nabeza ndaaniʼ valle* que. 14 Para gunabadiidxaʼ David Dios sti biaje, peru ndiʼ nga ni bicabi Dios ni dxandíʼ laabe: «Cadi gucaaluluʼ laacabe de frente sínuque bidii vuelta ne bicaalú laacabe neza déchecabe, frente de ca yagahuiiniʼ bacá.* 15 Ne ora gunadiágaluʼ caxidxi zeeda zácabe lade ca yagahuiiniʼ bacá, bicaalú, purtiʼ Dios ni dxandíʼ nga chisániruʼ nezaluluʼ para gunitiluluʼ ejércitu stiʼ ca filisteu». 16 Para biʼniʼ David guiráʼ xixé ni biʼniʼ mandar Dios ni dxandíʼ laa, binduuxecabe ejércitu stiʼ ca filisteu dede Gabaón hasta Guézer. 17 Ndaaniʼ guiráʼ ca guidxi que gúnnacabe tuu nga David, ne zaqué nga bicaa Jehová guiráʼ ca guidxi que guidxíbicaʼ laabe.