Primé libru de Crónicas
18 Gudiʼdiʼ si ti tiempu, biʼniʼ ganar David ca filisteu, bíʼnibe laacaʼ esclavu ne gúxhabe laacaʼ Gat ne ca guidxihuiiniʼ nuu gaxha de laani. 2 De raqué biʼniʼ ganarbe guidxi Moab ne beeda gaca ca moabita esclavu stiʼ David ne gudíxecabe laabe impuestu.
3 Dxi zeʼ Hadadézer, rey stiʼ Zobá, ziyubi guni mandar ca layú ni nuu gaxha de guiiguʼ Éufrates, biʼniʼ ganar David laabe gaxha de Hamat. 4 Gunaazeʼ David ti mil carru* ni rié lu guerra stibe, gadxe mil soldadu ni dxiʼbaʼ maniʼ ne gande mil soldadu ni rié a pie. Despué bininá David ñee* ca caballu ni rigubayú ca carru ni rié lu guerra stibe, peru guleechú ti gayuaa caballu ni qué ñuniná. 5 Ora beeda ca siriu de Damasco zeeda gacanecaʼ Hadadézer, rey stiʼ Zobá, biiti David veintidós mil soldadu sticaʼ. 6 De raqué gudixhe David chuʼ grupu de soldadu ndaaniʼ guidxi Siria de Damasco, ne beeda gaca ca siriu que esclavu stiʼ David ne gudíxecabe laabe impuestu. Ratiica cheʼ David racané Jehová laa para guni ganar.* 7 Laaca guxha David ca xpinni Hadadézer ca escudu redondo de oro ni zinecaʼ. Ne yenebe cani Jerusalén. 8 Laaca ziné David stale cobre stiʼ guidxi Tibhat ne Cun, ca guidxi stiʼ Hadadézer. Ne cobre que nga biquiiñeʼ Salomón para guni tanque de cobre, ca columna ne ca herramienta de cobre que.
9 Ora gunna Tou, rey stiʼ Hamat, maʼ binduuxeʼ David interu naca ejércitu stiʼ Hadadézer rey stiʼ Zobá, 10 nagueendaca biseendabe xiiñibe Hadoram ra nuu rey David para guinabadiidxaʼ laabe ximodo nuube ne guni felicitar laabe pur gudindenebe Hadadézer ne biʼniʼ ganarbe laa (purtiʼ stale biaje gudindené Hadadézer rey Tou). Yené Hadoram stale cosa risaca de plata, oro ne cobre para David. 11 Ne guleechú rey David ca cosa riʼ para Jehová, cásica bíʼnibe né plata ne oro ni gúxhabe guiráʼ ca guidxi ni biʼniʼ ganarbe: stiʼ Edom, stiʼ Moab, stiʼ ca ammonita, stiʼ ca filisteu ne stiʼ ca amalequita.
12 Biiti Abisái, xiiñiʼ Zeruyá, dieciocho mil edomita ndaaniʼ ti valle ni runibiáʼcabe casi valle de Zidi.* 13 Ne biʼniʼ mandarbe cheʼ caadxi grupu de soldadu stibe ndaaniʼ guidxi Edom ne beeda gaca ca edomita esclavu stiʼ David. Ratiica cheʼ David racané Jehová laa para guni ganar.* 14 Ne gúcaruʼ David rey ndaaniʼ guidubi naca guidxi Israel, laaca biyúbibe gaca ni jneza ndaaniʼ guidxi que ne qué nuquiichinabe laacaʼ. 15 Joab xiiñiʼ Zeruyá nga naca xaíque stiʼ ejércitu stiʼ David ne Jehosafat xiiñiʼ Ahilud nga ziné ti registru para rey que, 16 Sadoc xiiñiʼ Ahitub ne Ahimélec xiiñiʼ Abiatar nga nácacaʼ sacerdote, ne Savsá nga naca secretariu. 17 Benaya xiiñiʼ Jehoiadá nga biʼniʼ mandar ca keretita ne ca peletita, ne ca xiiñiʼ David que nga gúpacaʼ ca puestu jma risaca nezalú rey que.