Primé libru de Crónicas
26 Ndiʼ nga ca grupu stiʼ ca hombre ni rapa ra puertaʼ. De lade ca coreíta que nuu Meselemías xiiñiʼ Coré ni zeeda de familia stiʼ Asaf. 2 Ne gupa Meselemías xiiñiʼ: Zacarías nga primé, Jediael guiropa, Zebadías guionna, Jatniel guidapa, 3 Elam gaayuʼ, Jehohanán xhoopaʼ ne Elieho-Enái gadxe. 4 Ne gupa Obed-Edom xiiñiʼ: Semaya nga primé, Jehozabad guiropa, Joá guionna, Sacar guidapa, Netanel gaayuʼ, 5 Amiel xhoopaʼ, Isacar gadxe ne Peuletái xhono; zacá nga guluu Dios ndaayaʼ Obed-Edom.
6 Ne gupa xiiñibe Semaya xiiñiʼ ni naca xaíque familia, purtiʼ nácacaʼ nadxibalú ne de confianza. 7 Ca xiiñiʼ Semaya nga Otní, Refael, Obed ne Elzabad; ne ca biʼchiʼ Elzabad nga Elihú ne Semakías, laaca nácacabe hombre de confianza. 8 Guirácabe nga ca xiiñiʼ Obed-Edom. Cásica laacabe, ca xiiñicabe ne ca bíʼchicabe nácacabe hombre nadxibalú ne de confianza para gúnicabe xhiiñacabe; biaʼsi 62 de familia stiʼ Obed-Edom. 9 Ne gupa Meselemías xiiñiʼ ne biʼchiʼ, biaʼsi 18 hombre de confianza. 10 Ne gupa Hosá xiiñiʼ, zeedabe de ca xiiñiʼ Merarí. Simrí nga xaíque —purtiʼ neca cadi laadibe nga baʼduʼ primé, biʼniʼ bixhózebe laabe xaíque—, 11 Hilquías nga guiropa, Tebalías guionna ne Zacarías guidapa. Biaʼsi 13 bizaa ca xiiñiʼ Hosá ne ca biʼchiʼ.
12 Laaca gupa ca xaíque stiʼ ca grupu stiʼ ca hombre ni rapa ra puertaʼ que dxiiñaʼ ni rúnicaʼ ra lidxi Jehová, casi ca bíʼchicaʼ. 13 Ne bilaacabe suerte* para ca familia neza bixhózecabe, gastiʼ naca pa nahuiiniʼ o pa naroʼbaʼ familia stícabe, ti gánnacabe xi puertaʼ gaca tocar laacabe. 14 Selemías la? guca tocar laa puertaʼ ni nuu ladu rindani gubidxa. De raqué bilaacabe suerte* para xiiñibe Zacarías, ti hombre nuu xpiaaniʼ para gudii conseju, ne guca tocar laabe puertaʼ ni nuu ladu guiaʼ. 15 Obed-Edom la? guca tocar laa puertaʼ ni nuu ladu gueteʼ ne lu náʼ ca xiiñibe biaana ca cuartu ra riaapaʼ cosa. 16 Supim ne Hosá la? guca tocar laacaʼ ladu riaaziʼ gubidxa, gaxha de ra Puertaʼ stiʼ Saléket, cueʼ neza ni zeʼ ndaaniʼ guidxi; ruzuhuaa ti grupu de guardia ti ladu ne ruzuhuaa sti grupu de guardia sti ladu. 17 Riuu xhoopaʼ levita ladu rindani gubidxa. Ruzuhuaa tapa ti dxi ladu guiaʼ ne ruzuhuaa xtapa ti dxi ladu gueteʼ. Ne ndaaniʼ ca cuartu ra riaapaʼ ca cosa que riuu chupa chupa. 18 De ra nuu corredor ni napa columna que,* ladu rindani gubidxa, riuu tapa cueʼ neza ni zeʼ ndaaniʼ guidxi que ne ruzuhuaa xhupa cueʼ corredor ni napa columna que. 19 Nga nga ca grupu de ca hombre ni rapa ra puertaʼ ni zeeda de ca xiiñiʼ ca coreíta ne ca merarita.
20 Lade xcaadxi levita que la? Ahíya nga ruuyaʼ guiaapaʼ ca cuartu ra riaapaʼ tesoro ni nuu ra lidxi Dios ni dxandíʼ ne ca cuartu ra riaapaʼ tesoro ra nuu ca cosa ni bireechú* para Dios. 21 Lade ca xiiñiʼ Ladán —ca xiiñiʼ guersonita ni zeeda de Ladán, ca xaíque familia stiʼ Ladán, guersonita que—, nuu Jehielí, 22 ne ca xiiñiʼ Jehielí, Zetam ne bíʼchibe Joel. Laacabe ruuyacabe guiaapaʼ ca cuartu ra riaapaʼ tesoro ni nuu ra lidxi Jehová. 23 Lade ca amramita, ca izharita, ca hebronita ne ca uzielita la? 24 nuu Sebuel, —xiiñiʼ Guersón, xiiñiʼ Moisés— nácabe xaíque stiʼ ca ni rapa ca cuartu ra riaapaʼ ca cosa que. 25 Lade ca bíʼchibe, neza familia stiʼ Eliezer, nuu Rehabías, Jesayá, Joram, Zicrí ne Selomot. 26 Selomot riʼ ne ca biʼchiʼ nga rápacaʼ guiráʼ ca cuartu ra riaapaʼ tesoro ra nuu ca cosa ni bireechú para Dios, ca ni guleechú rey David, ca xaíque familia neza bixhózecaʼ, ca xaíque stiʼ ti mil ne stiʼ ti gayuaa ne ca xaíque stiʼ ejércitu que. 27 Guleechúcabe caadxi cosa ni gúxhacabe ca xhenemígucabe lu guerra para iquiiñeʼ ora gaca chaahuiʼ ra lidxi Jehová. 28 Laaca gúpacabe guiráʼ ca cosa ni guleechú Samuel hombre ni riene visión stiʼ Dios,* Saúl xiiñiʼ Quis, Abner xiiñiʼ Ner ne Joab xiiñiʼ Zeruyá. Intiica cosa ni cueechúcabe, Selomit ne ca biʼchiʼ nga rápacaʼ ni.
29 De lade ca izharita la? gucuaa Kenanías ne ca xiiñiʼ xcaadxi dxiiñaʼ ni raca fuera de ndaaniʼ lidxi Dios, casi gácacaʼ xaíque* ne juez stiʼ Israel.
30 Lade ca hebronita la? Hasabías ne ca biʼchiʼ, biaʼsi ti mil gadxe gayuaa hombre de confianza, laacabe nga bíʼyacabe parte de guidxi Israel ni nuu ladu riaaziʼ gubidxa de guiiguʼ Jordán. Laacabe nga ruuyacabe guiráʼ ca dxiiñaʼ ni raca para Jehová ne ni raca para rey. 31 Lade ca hebronita la? Jeriya nga xaíque stiʼ ca hebronita según xaíque familia stícabe neza bixhózecabe. Dxi mayaca gusaa David 40 iza de cayuni mandar, biyúbicabe lade ca hombre riʼ ne bidxélacabe hombre nadipaʼ ne nadxibalú ndaaniʼ guidxi Jazer ni nuu Galaad. 32 Ne biaʼsi bizaa ca bíʼchibe chupa mil gadxe gayuaa hombre de confianza ne nácacabe xaíque familia neza bixhózecabe. Ngue runi bisaana rey David lu nácabe gúʼyacabe ca rubenita, ca gadita ne galaa tribu stiʼ ca manasita. Laacabe nga ruuyacabe gaca guiráʼ dxiiñaʼ ni raca para gaca adorar Dios ni dxandíʼ ne para gaca xhiiñaʼ rey.