Jueces
14 De raqué biete Sansón Timná ne raqué biiyabe ti gunaa xiiñiʼ ti filisteu.* 2 Despué gudxíʼbabe ra nuu bixhózebe ne jñaabe ne rábibe laacaʼ: «Dxi guyaaʼ Timná guyuuladxeʼ ti baʼdudxaapaʼ, xiiñiʼ ca filisteu. Napaʼ gana guichaganaʼyaʼ laabe ne racalaʼdxeʼ gacanetu naa». 3 Para gunabadiidxaʼ bixhózebe ne jñaabe laabe: «¿Ñee riaadxaʼ gunaa lade ca familia stinu o ndaaniʼ guidxi riʼ para guichaganaluʼ la? ¿Xiñee lade ca filisteu ni qué runi ni ná Dios* chiyúbiluʼ xheelaluʼ pue? Peru ná Sansón rabi bixhoze: «Racalaʼdxeʼ gacanetu naa guichaganaʼyaʼ laabe purtiʼ laabe nga maʼ guyuuladxeʼ». 4 Peru qué ganna bixhózebe ne jñaabe pa Jehová ngue cayuni guiráʼ ndiʼ para gunitilú ca filisteu, purtiʼ tiempu que, ca filisteu nga cayuni mandar guidxi Israel.
5 De raqué bietené Sansón bixhoze ne jñaa para checaʼ Timná. Ora yendabe ra nuu caadxi lubáʼ uva stiʼ Timná, biree ti lión* lube ne bizulú caguu beedxeʼ. 6 Óraque bidii Jehová espíritu stiʼ Sansón ne gúpabe stale stipa purtiʼ né guiropaʼ chú si nabe bíʼnibe lión que chupa galaa, casi rúnicabe ti chivuhuiiniʼ. Peru qué ñábibe bixhózebe ne jñaabe ni bíʼnibe que. 7 Despué guyebe Timná ne guníʼnebe baʼdudxaapaʼ que; raqué bidiibe cuenta guizáʼ riuuláʼdxibe laa.
8 Despué, ora biguétabe zicaabe baʼdudxaapaʼ que para chinebe laa ra lídxibe, yeyúbibe lión ni biitibe que. Ne biiyabe dxaʼ bizu ne nuu miel ndaaniʼ lión que. 9 Para gulee Sansón caadxi miel ne ziyó ni neza. Ne ora yendabe ra nuu bixhózebe ne jñaabe, laaca bidiibe laacaʼ miel para gocaʼ. Peru qué ñábibe laacaʼ pa ndaaniʼ ti lión ni maʼ guti guleebe miel que.
10 De raqué guyé bixhózebe ra nuu baʼdudxaapaʼ que. Ne raqué biʼniʼ Sansón ti guendaró, purtiʼ ngue nga costumbre napa ca hombre joven. 11 Ora biʼyaʼ binni laabe, beedanécabe 30 hombre ra nuube para gacanecaʼ laabe. 12 Para gudxi Sansón laacabe: «Chitidxeʼ laatu ti adivinanza. Ne pa dentru de gadxe gubidxa, biaʼ guindaa saa riʼ, gábitu naa xii ni la? zudieeʼ laatu 30 lari de lino para gácutu ne 30 muda lari. 13 Peru, pa qué gábitu naa xi laani la? laatu gudiitu naa 30 lari de lino ne 30 muda lari». Para ná ca hombre que rabi laabe: «Gudxi laadu adivinanza stiluʼ ca; racaláʼdxidu gunadiágadu ni». 14 Para gúdxibe laacaʼ:
«De tuuxa ni ro biree guendaró,
ne de tuuxa ni nadipaʼ biree ni nanaxhi».
Gudiʼdiʼ chonna gubidxa, ne qué ganda guni adivinárcabe ni guniʼbe que. 15 Peru ra bizaa tapa gubidxa que, guyécabe ra nuu xheelaʼ* Sansón ne gúdxicabe laa: «Gudxi xheelaluʼ gabi lii xi riníʼ adivinanza stiʼ. Pa coʼ la? zuzáʼquidu lii ne familia stiʼ bixhózeluʼ. ¿O biʼniʼ invitartu laadu para si gáxhatu stidu la?». 16 Ngue runi guyé gunaa que yeguuna lu Sansón ne ná rabi laabe: «Cadi dxandíʼ nadxiiluʼ naa; pa ñaca dxandíʼ nadxiiluʼ naa la? ñábiluʼ naa xi riníʼ adivinanza ni gúdxiluʼ ca binni xquidxeʼ». Para nabe rábibe laa: «Pa nin bixhozeʼ ne jñaa caʼruʼ gabeʼ ni la? laxa peʼ lii». 17 Peru qué nusaana de ñuunabe lu Sansón dede ra bizaa gadxe gubidxa de cayaca saa que. Ne ra bizaa gadxe gubidxa que, de tantu maʼ gucuabe ladxidóʼ Sansón, gudxi laabe xi riníʼ adivinanza que. De raqué bireebe yetídxibe ni ca binni xquidxibe. 18 Ngue runi ra bizaa gadxe gubidxa, ante guiaaziʼ gubidxa,* guyé ca hombre de guidxi que ne gúdxicaʼ Sansón:
«¿Ñee nuu xiixa jma nanaxhi que miel
ne nuu tuuxa jma nadipaʼ que ti lión la?».
Para bicábibe laacaʼ:
«Pa ñaca qué niquiiñetu vaquiá stinneʼ para nichézatu layú la?*
qué ñuu dxi ñánnatu adivinanza stinneʼ».
19 De raqué bidii Jehová laabe espíritu stiʼ, ne guyebe Asquelón, raqué biitibe 30 hombre, gúxhabe xhábacaʼ ne bidiibe ni ca hombre ni gudxi laabe xi riníʼ adivinanza que. Despué bireebe zebe ra lidxi bixhózebe ne guizáʼ zidxiichibe.
20 Ne xheelaʼ Sansón que, bicheelacabe laa tobi de ca joven ni guyé yegacané laabe ra guca saa que.