Guiropa libru de Crónicas

3 Para bizulú Salomón bicuí lidxi Jehová ndaaniʼ guidxi Jerusalén, lu dani Moria, lu layú* stiʼ Ornán jebuseu que; laani nga lugar ra biʼniʼ preparar David, raqué nga bihuinni Jehová nezalú David, bixhózebe. 2 Bizulú bicuibe ni lu iza tapa de nácabe rey, lu guiropa dxi stiʼ guiropa beeu que. 3 Ne base stiʼ lidxi Dios ni dxandíʼ, ni biʼniʼ Salomón que, ziuulani 60 codo ne xilágani* gande codo, biaʼ medida yooxhoʼ que.* 4 Gúpani ti entrada ni rábicabe pórtico ne xilágani gande codo, biaʼca xilaga yoo que, ne nasooni gande codo.* Ne biʼniʼ forrarbe ndaanini de oro puru. 5 Biʼniʼ forrarbe yoo naroʼbaʼ que de yaga enebro ne despué biʼniʼ forrarbe ni de oro de ni jma galán, de raqué bizaʼbe jma yaga palmera cueʼ yoo que ne bíʼnibe adorno de cadena. 6 Laaca biquiidibe guié sicarú ndaaniʼ yoo que, ne oro ni biquiiñebe que zeedani de Parvaim. 7 Biʼniʼ forrarbe yoo que, ca muríu stini, ñee ca xpuertaʼ ni, ca pader stini ne ca xpuertaʼ ni de oro; ne bizaʼbe jma querubín lu ca pader stini.

8 Despué bíʼnibe cuartu* láʼ Santísimo que biaʼca xilaga yoo que, ziuulani gande codo ne xilágani gande codo. Biquiiñebe xhoopaʼ gayuaa talentu* de oro de ni jma galán para biʼniʼ forrarbe ni. 9 Nanaa oro stiʼ ca clavu que 50 siclo,* ne biʼniʼ forrarbe ca cuartu ni nuu ique yoo que de oro.

10 Ne ndaaniʼ cuartu* láʼ Santísimo que bíʼnibe chupa estatua de yaga stiʼ querubín ne biʼniʼ forrarbe cani de oro. 11 Biaʼsi gande codo ziuulaʼ xhiaa guiropaʼ querubín que;* tobi de ca xhiaa primé querubín que ziuulani gaayuʼ codo ne guíʼdini cueʼ yoo, ne sti xhiaa querubín riʼ ziuulani gaayuʼ codo ne guíʼdini xhiaa sti querubín que. 12 Tobi de ca xhiaa guiropa querubín que ziuulani gaayuʼ codo ne laaca guíʼdini cueʼ sti pader yoo que, ne sti xhiaa querubín riʼ ziuulani gaayuʼ codo ne guíʼdini xhiaa primé querubín que. 13 Cumu nuchiaa xhiaa guiropaʼ querubín que la? biaʼsi gande codo ziuulaʼ guidapaʼ xhiaa que,* zuhuaa ca querubín que ne nudxiilucaʼ neza ra nuu Santo que.

14 Laaca bíʼnibe cortina que de hilu azul, hilu moradu de guichaladi dendxuʼ, hilu naxiñáʼ rini ne lari de ni jma galán ne biʼniʼ bordarbe querubín luni.

15 De raqué bíʼnibe chupa columna ra entrada yoo que ne nasoocani 35 codo, ne ca adorno ni zuba lu cada columna que nasoocani gaayuʼ codo. 16 Ne bíʼnibe caadxi cadenahuiiniʼ casi bigáʼ ne bicaabe cani lu ca columna que, laaca bíʼnibe ti gayuaa granada ne bicaabe cani lu ca cadena que. 17 Bizuhuaabe ca columna que entrada stiʼ templu que, tobi ladu derechu* ne tobi ladu bigaʼ;* ni zuhuaa ladu derechu que gulee labe laa Jakín* ne ni zuhuaa ladu bigaʼ que gulee labe laa Boaz.*