Bisibani Jesús xiiñiʼ ti viuda

Despué de bisianda Jesús mozo stiʼ ti oficial stiʼ ejércitu, bireebe de Capernaúm ne zebe guidxi Naín, ni riaana jma de 30 kilómetru ladu suroeste. Peru cadi stúbibe zebe, laaca zinanda ca discípulo stibe laabe ne laaca zeʼ stale binni. Ora guyuube gaxha de guidxi Naín, zándaca maʼ zixhinni, biiyabe stale judíu zireenecaʼ ti gueʼtuʼ. Zigucaachicabe ti joven fuera de guidxi que.

Guizáʼ cayuubaʼ ladxidóʼ jñaa joven que. Viuda gunaa riʼ ne guti tobi lucha xiiñibe. Ora gutiʼ xheelabe, biaananebe xiiñibe ni nadxiibe ne laa nga gudixhedxí ladxidoʼbe, guxuíʼlunu pabiáʼ tobi si guyuucabe. Peru cumu maʼ guti xiiñibe la? maʼ qué gápabe tu guʼyaʼ laabe dxi guiniisibe. ¿Tu gapa ne gacané laabe yanna yaʼ?

Ora biʼyaʼ Jesús pabiáʼ naná nuu ladxidóʼ gunaa riʼ ne pabiáʼ triste ni cazaaca que, guizáʼ biabe laa. Cumu né stale cariñu guniʼné Jesús gunaa riʼ la? guizáʼ gucané ni laa gapa confianza Jesús. Gudxi Jesús gunaa riʼ: «Maʼ cadi gúʼnaluʼ». Peru cadi ngasi biʼniʼ Jesús, sínuque oraqueca bidxíñabe ne gudáʼnabe camilla ra nexheʼ gueʼtuʼ que (Lucas 7:13, 14). Modo bidxiña Jesús gunaa riʼ ne ni bíʼnibe pur laa, bicaani ca binni ni cayuunaʼ que guidxagayaacaʼ stale dede bizuhuaadxicaʼ. Zándaca stale tu canabadiidxaʼ xiñee gúdxibe gunaa que zaqué ne xi chigúnibe.

¿Xi caníʼ ique ca ni zinanda Jesús yaʼ? Huayuuyacabe gusianda Jesús binni huará. Peru, ruluíʼ si qué huayuuyacabe gusibánibe tuuxa ni maʼ guti. Nánnacabe raca stale iza ante, guyuu binni biasa de lade gueʼtuʼ, peru ¿zanda gusibani Jesús tuuxa ni maʼ guti la? (1 Reyes 17:17-23; 2 Reyes 4:32-37). Para guníʼ Jesús: «Joven, cayabeʼ lii: ¡biasa!» (Lucas 7:14). Oraqueca gurí joven que ne bizulú caníʼ. Ne bidii Jesús laabe jñaabe ni qué guiráʼ guidxagayaa. Guizáʼ biecheʼ gunaa riʼ. Maʼ cadi stúbibe nuube yanna.

Ora biʼyaʼ ca binni que maʼ nabani joven que, bizulú cusisácacaʼ Jehová, ni rudii guendanabani. Caadxi binni guníʼ: «Maʼ biasa ti profeta ni napa poder ládenu». Ne xcaadxi bidii cuenta pabiáʼ risaca ni guca que ne guniʼcaʼ: «Maʼ bietenalaʼdxiʼ Dios de xquidxi» (Lucas 7:16). Guidubi región que binadiaga milagru guca riʼ ne zándaca dede Nazaret binadiaga binni ni, lugar ra biniisi Jesús, ni riaana biaʼ 10 kilómetru de guidxi riʼ. Dede ca binni de Judea binadiaga ni biʼniʼ Jesús.

Guizáʼ racalaʼdxiʼ Juan Bautista, ni deguyoo que, ganna de ca cosa ni cayuni Jesús. ¿Xi biʼniʼ Juan ora gudxi ca discípulo stiʼ laa ca milagru cayuni Jesús?