¿Ñee zapa ca judíu fe despué de binadiágacaʼ stidxi Dios la?

Caʼruʼ guiluxe lunes 10 de nisán, ne nuu Jesús ndaaniʼ templu caníʼ ximodo chiguuticabe laa. Nuube xizaa xi guiníʼ binni de Dios, ngue runi nabe: «Bixhozeʼ, bisisaca laluʼ». Oraqueca gucuá ti ridxi de guibáʼ ne ná: «Maʼ bisisacaʼ ni, ne laaca zusisacaʼ ni sti biaje» (Juan 12:27, 28).

Cadi cayene ca binni que xii ngue cazaaca. Nuu tu ná ti rayu ngue guxidxi, xcaadxi ná: «Ti ángel nga guniʼné laabe» (Juan 12:29). Peru Jehová ngue guníʼ. Cadi primé biaje nga gunadiaga binni stidxi Dios dede dxi bizulú Jesús cayuni xhiiñaʼ Dios.

Dxi guyuunisa Jesús, raca chonna iza arondaʼ, binadiaga Juan Bautista guníʼ Dios: «Ndiʼ nga Xiiñeʼ ni nadxieeʼ; ni rusiecheʼ naa». Despué, lu Pascua stiʼ iza 32, dxi bidxaa modo rihuinni Jesús nezalú Santiago, Juan ne Pedro, laaca binadiágacaʼ ora guníʼ Dios: «Ndiʼ nga Xiiñeʼ ni nadxieeʼ; ni rusiecheʼ naa. Lagucaadiaga laa» (Mateo 3:17; 17:5). Peru guionna biaje riʼ stale binni binadiaga stidxi Jehová.

De raqué bisiene Jesús: «Gucuá ridxi riʼ, cadi pur naa, sínuque pur laatu» (Juan 12:30). Ni guca riʼ bisihuinni dxandíʼ laabe nga Xiiñiʼ Dios, Mesías ni maca cá gueeda.

Dede biaʼ dxi nabani Jesús qué huayuu dxi gucheené Dios. Zacá gudíxhebe ti ejemplu de ximodo naquiiñeʼ guibani binni ne bisihuínnibe naquiiñeʼ guinitilú Binidxabaʼ, ni naca gobernante stiʼ guidxilayú riʼ. Guniʼruʼ Jesús: «Yanna maʼ cayaca juzgar guidxilayú; yanna maʼ chindeecabe gobernante stiʼ guidxilayú riʼ ti ladu». Cadi pur gana si nga chigati Jesús. ¿Xiñee yaʼ? Jesús peʼ guníʼ xiñee: «Peru ora guindísacabe naa de lu guidxilayú, zusendacaaʼ guiráʼ clase binni para gueeda ra nuaaʼ» (Juan 12:31, 32). Zacá ni, ra guuticabe Jesús lu ti yaga, zusendacaabe guiráʼ clase binni ne zuxhélebe ti neza ni ziné lu guendanabani ni qué zaluxe.

Ora binadiaga binni guniʼbe: «Ora guindísacabe naa», gunabadiidxacaʼ laabe: «Nánnadu ná Ley qué ziuu dxi gatiʼ Cristu. Yanna, ¿ximodo nga naluʼ zandísacabe Xiiñiʼ Hombre yaʼ? ¿Tuu nga Xiiñiʼ Hombre?» (Juan 12:34). Neca maʼ stale cosa biiyaʼ ca binni que biʼniʼ Jesús dede maʼ binadiágacabe stidxi Dios, stale de laacaʼ, qué runi crecaʼ pa dxandíʼ laabe nga Xiiñiʼ Hombre o Mesías ni maca cá gueeda que.

Bibiguetaʼ guníʼ Jesús sti biaje laa nga: «Biaaniʼ stiʼ guidxilayú» (Juan 8:12; 9:5). Gúdxibe ca binni que: «Ziuuruʼ biaaniʼ que sti tiempuhuiiniʼ ládetu. Lasá laga náparutu biaaniʼ, ti cadi guinaazeʼ guelacahui laatu [...]. Laga náparutu biaaniʼ, lagapa fe biaaniʼ ca, ti gácatu xpinni Dios» (Juan 12:35, 36). Despué de ni bizaaca riʼ, biree Jesús zeʼ, purtiʼ cadi 10 de nisán que nga naquiiñeʼ gátibe. 14 de nisán, lu Pascua que nga «zandísacabe» laabe o zuuticabe laabe lu ti yaga (Gálatas 3:13).

Ora guidúʼyanu xi guiráʼ biʼniʼ Jesús dxi biʼniʼ xhiiñaʼ Dios, rihuínnica guca cumplir profecía ni ná qué zuni cré ca judíu laabe. Maca bicaa Isaías zaca ca judíu casi ciegu, zaca ladxidoʼcaʼ naguidxi ne qué zabiguétacaʼ ra nuu Dios para guiándacaʼ (Isaías 6:10; Juan 12:40). Peru stale de ca judíu qué nacaʼ guni crecaʼ dxandíʼ peʼ Jesús nga ni chigulá laacaʼ, ne laa nga neza ni ziné lu guendanabani.

Nicodemo, José de Arimatea ne xcaadxi gobernante gúpacaʼ fe Jesús. Peru, ¿zusihuínnicaʼ nápacaʼ fe la? ¿O qué zusihuínnicaʼ fe sticaʼ para cadi guiládxicabe laacaʼ de ndaaniʼ sinagoga o purtiʼ «jma riuuláʼdxicaʼ gusisaca binni laacaʼ»? (Juan 12:42, 43).

De raqué bisiene Jesús xi riníʼ gapa binni fe laa: «Tu gapa fe naa, cadi naa siaʼ nga cayápabe fe, sínuque laaca cayápabe fe ni biseendaʼ naa». Nabé risaca ca cosa ni gudxi Dios laabe gusiidibe, ngue runi guniʼbe: «Peru tu qué guni tender naa ne qué guicaa stiidxaʼ la? nuu tu guni juzgar laa: ca diidxaʼ ni maʼ gunieeʼ nga chiguni juzgar laa lu últimu dxi» (Juan 12:44, 45, 48).

Maʼ para guiluxe Jesús guníʼ: «Purtiʼ cadi de naa siaʼ nga riree ni rinieeʼ, sínuque Bixhozeʼ ni biseendaʼ naa, maʼ gudxi naa xi guinieeʼ ne xi gusiideʼ. Ne nannaʼ guendanabani ni qué zaluxe nga raca significar mandamientu stibe» (Juan 12:49, 50). Nanna Jesús maʼ cadi candaa, zudii xquendanabani para guilá ca binni ni gapa fe laa (Romanos 5:8, 9).