Zanda gúʼndanu ni nagueenda, peru jneza nuuni la?

LU BEEU septiembre 2005 biree ti Biblia nacubi para ganda guʼndaʼ binni ni lu ti gayuaa minutu, ne ti yuʼduʼ ni nuu Inglaterra guníʼ galán guiree Biblia ca. Lani The 100-Minute Bible, (ti Biblia ni zanda gúʼndaluʼ lu ti gayuaa minutu). Lu 17 yaza stini zeeda guiráʼ cani gucuá lu diidxaʼ hebreu. Ne lu 33 yaza stini zeeda guiráʼ cani gucuá lu diidxaʼ griegu. Ra bíʼnicabe ni zacá, guleecabe «guiráʼ ni riree binni gana guʼndaʼ», casi guníʼ ti hombre. Dxandíʼ, zanda gúʼndanu ni nagueenda, peru jneza nuuni la?

Lu Biblia riʼ cadi cá diʼ lá Jiobá (Salmo 83:18). Cani ruundaʼ Biblia zudiicaʼ cuenta zeeda stale cosa luni cadi jneza. Casi lu primé ndaa stiʼ Biblia ca na «biʼniʼ [Dios] guibáʼ ne guidxilayú lu xhoopaʼ gubidxa». Peru lu diidxaʼ hebreu Génesis 1:1 na: «Primé que Dios bizáʼ guibáʼ ne guidxilayú», ne de racá cuzeeteruʼ ni xi guiráʼ biʼniʼ Dios lu xhoopaʼ gubidxa lu Guidxilayú riʼ. Ne Génesis 2:4 na Dios biʼniʼ guibáʼ ne Guidxilayú lu ti dxi. Diidxaʼ dxi ni cayeeteʼ lu textu riʼ zeeda gácani tiempu ni biquiiñeʼ Dios para bizáʼ guibáʼ ne Guidxilayú.

Guidúʼyanu sti ejemplu. Job guca ti hombre ni biʼniʼ ni jneza. Biblia ni guleecabe ca na Binidxabaʼ naca ti «xpinni [Dios]» ne bicaalube Job, ne nani «xhiiñaʼ» Binidxabaʼ nga «gudxiibabe donda» ique binni guidxilayú. Ñee rudiiluʼ cuenta xii nga ni cadi jneza ni cayeeteʼ luni la? Lu diidxaʼ hebreu Binidxabaʼ riniʼni «tobi ni rucaalú». Nga runi, cadi xpinni Dios Binidxabaʼ, sínuque xhenemigu Dios laabe. Ne de ndaaniʼ ladxidoʼbe biale gudxiibabe donda ique binni guidxilayú (Apocalipsis 12:7-10).

Yanna, ñee jneza modo bitiixhicabe ca diidxaʼ griegu riʼ lu Biblia stícabe la? Lu ejemplu de ca dendxuʼ ne ca chiva ni guníʼ Jesús que, Biblia riʼ na riuube jma pur cani racané «tutiica binni, neca huaxiéʼ risácacaʼ». Peru, xipeʼ ndiʼ guníʼ Jesús yaʼ. Laabe guniʼbe zaguu ndaayabe cani racané ca binni ni zinanda laabe, nga nga ca «bíʼchibe» (Mateo 25:40). Lu Biblia riʼ, Apocalipsis cusiidiʼ «Roma nga Babilonia guidxi roʼ ne zanitilú guidubi naca ni». Peru lu ca guiʼchiʼ ni gucuá lu griegu nin ti biaje cadi cuzeeteʼ cani Babilonia «guidxi roʼ» nga Roma (Apocalipsis 17:15–18:24).

Pa dxandipeʼ nga racaláʼdxinu gunibiaʼnu Jiobá, Dios ni bizáʼ laanu, ne gánnanu xi chigúnibe la? naquiiñeʼ guidúʼndanu guiráʼ xixé ni cá lu Biblia. Neca zaquiiñenu jma de ti gayuaa minutu para gúʼndanu ni, Dios zaguu ndaayaʼ laanu pa gúninu ni (Juan 17:3). Nga runi, biʼniʼ stipa pur gúʼndaluʼ guidubi naca Biblia (2 Timoteo 3:16, 17).