Jma risácani que ganna binni ximodo chichuu tiempu

NDAANIʼ stale guidxi napa binni refrán para guiníʼ ximodo chichuu tiempu, ne tobi de laacani nga rieeteʼ lu ti Proverbio inglés: Ora guiaaziʼ gubidxa ne naxiñáʼ nuu guibáʼ la? riecheʼ cani rusá barcu. Peru ora guirá gueelaʼ naxiñáʼ nuu guibáʼ la? naquiiñeʼ gápacabe cuidadu. Ca dxi stinu riʼ, ora guʼyaʼ cani ruundaʼ de tiempu (meteorólogo), ximodo nuu guibáʼ ca siadóʼ ca la? riniʼcaʼ ximodo ziuu ti dxi.

Ca dxi bibani Jesús lu Guidxilayú riʼ, laaca biiyaʼ ca binni que guibáʼ para gúnnacaʼ ximodo chichuu tiempu. Casi ti biaje gúdxibe ca judíu sicaríʼ: «Ora ma chi guiaazi gubidxa ne guʼya tu naxiñá ibáʼ, óraque na tu: “Qué ziaba nisa guie ixíʼ purti naxiñá ibáʼ”. Ne zaqueca pa guʼya tu naxiñá ibáʼ siadóʼ la? óraque na tu: “Yanadxí ziaba nisa guie purti naxiñá ibáʼ ne nachuundu nuu”. Laatu riene tu xi na ca seña ni rihuinni ibáʼ, peru ca seña ni cayuuya tu yanna riʼ, nga qué riene tu». Nga nga ni gudxi Jesús ca binni que (Mateo 16:2, 3).

Xi ca seña ngue bihuinni dxiqué yaʼ. Laacani nga guiráʼ ca cosa ni bisihuinni Jesús ngue Mesías ni biseendaʼ Dios. Guiráʼ ni bíʼnibe bisihuinni dxíchicani laabe nga Mesías que cásica ora rihuinni naxiñáʼ nuu guibáʼ. Neca bihuinni laabe ngue Mesías que, peru ca judíu que qué nulábicaʼ cani, jma nda risaca cani que ganna binni ximodo chichuu tiempu.

Ca dxi stinu riʼ laaca cahuinni stale seña ni jma risaca que ora guihuinni gadxé color nuu guibáʼ. Jesús guníʼ zanitilú ca binni malu ti guibani binni galán lu Guidxilayú riʼ, ne bizeetebe caadxi cosa ni zazaaca ca dxi stinu riʼ. Laabe guniʼbe zadinde binni ndaaniʼ guidubi naca guidxilayú, ziuu guendarindaana, ne ca cosa riʼ zusihuinni cani mayaca guidxaa modo nabáninu. Jesús guníʼ ora guihuinni ca cosa riʼ la? mayaca gucueeza Dios cani cayaca ca (Mateo 24:3-21).

Ñee cayuuyaluʼ «ca seña ni rihuinni» yanna riʼ la?