Ximodo zanda iquiiñeluʼ lúdxiluʼ

ÑEE nánnaluʼ pabiáʼ ziuulaʼ ludxi ti jirafa la? Ziuulani biaʼ 45 centímetru, ne randa runiibime ni ne nadipani. Nga runi, randa ráxhame bandaga lu ca yaga ca. Ludxi ti ballena azul la? nanaani biaʼca nanaa ti elefante. ¡Bixuiʼlú pabiáʼ nadípame para ganda guniibime ni!

Pa guchaaganu pabiáʼ ziuulaʼ ne nadipaʼ lúdxicame ne pabiáʼ nanaa cani la? gastiʼ nga lúdxinu. Peru lúdxinu ca jma nadípani. Xiñee yaʼ. Guidúʼyanu xiná Biblia zanda gúnini neca nahuiinini: «Ludxi binni zanda guutini ne gusibánini» (Proverbios 18:21). Dxandíʼ, stale biaje maʼ huayunadiáganu pabiáʼ runiná ludxi binni ora rusiguii o qué riníʼ ni dxandíʼ, ne pur nga dede nuu tu huayati neca qué gapa donda.

Ne stale binni maʼ cadi xhamígucaʼ purtiʼ bininásaacaʼ laacaʼ ne diidxaʼ, ne laaca huayuniná ni riníʼcabe xcaadxi binni. Sicaríʼ guníʼ Job, ti hombre ni gundisaʼ ca xhamigu falsu luguiáʼ: «Dede padxí nga maʼ gusaanatu de guchiichitu xhiálmaʼ ne de ganinatu naa ne stiidxatu pue» (Job 19:2). Discípulo Santiago bidii ti ejemplu para bisihuinni pabiáʼ nga runiná ludxi binni ora qué rucueeza ruaa, nabe: «Neca nahuiini [ludxi binni] peru naroʼba ni runi ni. Laguuya si laatu pabiáʼ nahuiini ti batee, peru zanda ucaa gui ni ti guiʼxhi roʼ. Ne ludxi nu laca zeda aca casi ti batee» (Santiago 3:5, 6).

Peru lúdxinu ca laaca randa rusibánini. Ora rininu diidxaʼ ni riguu gana binni ne ni rusihuinni cayénenu laacabe la? racaneni laacabe para cadi chúʼcabe triste ne para cadi guicá íquecabe guuticabe laca laacabe. Nuu stale binni ni guduʼbaʼ guixi dxiqué ne ni guzá biiti binni, nahuiinirucaʼ mápeca ñáticaʼ pa qué nudiicabe conseju laacaʼ. Guiráʼ ni riníʼ ca binni ni runi ni jneza ca zeeda gaca casi ti «yaga ni rudii guendanabani», ne «casi manzana de oro ni nuu ndaaniʼ xiixa de plata nga ti diidxaʼ ni guiníʼcabe ora caquiiñeʼ» (Proverbios 15:4; 25:11).

Neca galán iquiiñenu lúdxinu para gacanenu binni la? jma galán nga iquiiñenu ni para gusisácanu Jiobá Dios, gucheechenu ca diidxaʼ nacubi ne galán stiʼ Reinu ne para gusíʼdinu binni xipeʼ nga zeeda lu Biblia. Xiñee jma galán gúninu nga yaʼ. Jesús guníʼ xiñee: «Ne zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3; Mateo 24:14; 28:19, 20).