«Xii nga ni dxandí»

NGA nga ni gunabadiidxaʼ Poncio Pilatu Jesús, zácaxabe qué zanda guicabi Jesús laabe. Laabe qué racaláʼdxibe gánnabe ni canabadiidxabe que, ngue runi qué nicabi diʼ Jesús laabe. Zándaca guníʼ íquebe guirutiʼ zanda guiene xii nga ni dxandíʼ ni guníʼ Jesús que (Juan 18:38).

Tiempu riʼ, ca xaíque yuʼduʼ, ca maestru, ca políticu ne xcaadxi binni laaca rusihuínnicaʼ guirutiʼ zanda guiene xii nga ni dxandíʼ. Riníʼ íquecaʼ guirutiʼ zanda ganna xii nga jneza ne ni cadi jneza ne ximodo guni adorar binni Dios. Xiñee yaʼ. Purtiʼ nacaʼ guiráʼ ora ruchaa modo riníʼ ique binni (Isaías 5:20, 21). Nga runi, qué racaláʼdxicaʼ guibánicaʼ nayá casi ca binni ni bibani dxiqué.

Nabé risaca ni gunabadiidxaʼ Pilatu que purtiʼ Jesús guníʼ: «Beda gale ndaani guidxilayú para güe nia binni xii nga ni dxandíʼ» (Juan 18:37). Jesús nanna xii nga ni dxandíʼ ca. Dede gúdxibe ca discípulo stibe: «Ne zanna tu ni dxandíʼ, ne zaladi tu ra cá tu yaga purti ma nanna tu ni» (Juan 8:32).

Paraa zanda guidxélanu ni dxandíʼ ca yaʼ. Dxi biʼniʼ orar Jesús ti biaje gúdxibe Dios: «Dxandíʼ stiidxa luʼ» (Juan 17:17). Dios bidii laanu Stiidxaʼ ti zacá gánnanu xi conseju naquiiñeʼ chinándanu ne ximodo ugaandanu ti guendanabani ni qué zaluxe (2 Timoteo 3: 15-17).

Qué nizaalaʼdxiʼ Pilatu ñanna xii nga ni dxandíʼ, neca guyuu Jesús raqué para nusiéneni laabe.Yanna lii yaʼ. Xiñee qué guinabadiidxaluʼ ca testigu stiʼ Jiobá xii nga «ni dxandíʼ» ni bisiidiʼ Jesús que yaʼ. Laacabe ziuuláʼdxicabe gacanécabe lii guiéneluʼ ni.