«Bidxagayaa modo bíʼnibe»
GÜNTER GRASS nga ti hombre de Alemania ni rucaa libru ne biʼniʼ ganar ti premiu nobel lu iza 1999 pur ca libru ni bicaa. Lu iza 2006 guleebe ti libru ra bicaabe modo bibánibe. Luni bicaabe dxi yenécabe laabe lu ejército ni láʼ Defensa Civil alemana. Laaca guniʼbe nabé bidxagayaabe de ti hombre ni qué huasiaandabe, neca maʼ gudiʼdiʼ jma de sesenta iza. Hombre que gupa stale guendanagana purtiʼ qué niná nucheené Dios stiʼ.
Lu periódicu Frankfurter Allgemeine Zeitung guníʼ Grass de ti hombre ni qué liica niná ninaazeʼ guiibaʼ purtiʼ cadi comunista, socialista ne cadi tobi de ca nazi que laa, sínuque testigu stiʼ Jiobá laa. Grass qué rietenalaʼdxiʼ diʼ lá Testigu riʼ, peru gudíxhebe lá sicaríʼ «Laadu qué rúnidu nga», purtiʼ qué niná nucheené Dios ne qué ñuni ni bicaacabe laa que. Peru ca testigu stiʼ Jiobá biyúbicaʼ tu láʼ hombre riʼ, nácasini Joachim Alfermann. Stale biaje bininácabe ne bisituícabe lube ne despué maʼ qué ninácabe ñuu tu niganna laabe. Peru, Alfermann qué nucheené diʼ Jiobá ne qué ninaazeʼ guiibaʼ.
Grass guníʼ sicaríʼ: «Bidxagayaa modo laabe, ne gunabadiidxaʼ laca naa: “Ximodo gunda biʼniʼ huantarbe guiráʼ ni bíʼnicabe laabe que pue. Xiñee gunda biʼniʼ huantarbe yaʼ”». Biiyasícabe qué nucheené Alfermann Dios stiʼ neca bíʼnicabe laa stale cosa la? biseendacabe laa ndaaniʼ lidxi guiibaʼ ni láʼ Stutthof lu beeu febrero stiʼ 1944. Qué ñátidibe lu guendaridinde que, ngue runi bindaacabe laabe lu abril stiʼ iza 1945, ne dede dxi gútibe lu iza 1998 qué nusaanabe de ñúnibe ni na Jiobá.
Guiráʼ ra biʼniʼ mandar ca binni de Alemania bininacaʼ ca Testigu ne Alfermann nga tobi de ca 13,400 Testigu ni gucaná purtiʼ qué niná nucheené Dios stiʼ. Qué ñuucabe lu política ne qué ninácabe ninaazecabe guiibaʼ, purtiʼ bizuubacabe stiidxaʼ Dios (Mateo 26:52; Juan 18:36). Biaʼ 4,200 Testigu guluucabe laacaʼ ndaaniʼ lidxi guiibaʼ ne 1,490 guti. Stale binni ni cadi naca Testigu ridxagayaacaʼ modo biʼniʼ huantar ca binni riʼ para cadi nucheenecaʼ Dios sticaʼ.
[Dibuju/foto ni zeeda lu yaza 32]
Joachim Alfermann