Xi zanda guni ca xpinni Cristu ora guniibi dxáchacabe laacaʼ
JESÚS gudxi ca discípulo stiʼ ante gati: «Ma gunaba binidxaba laatu para uniibi dxacha laatu casi ora riguibi cabe [trigu]» (Luc. 22:31). Xi gucaláʼdxibe niniʼbe ne ca diidxaʼ ca yaʼ.
Ca dxi bibani Jesús que, para ganda guindisa binni cosecha stiʼ trigu biquiiñeni tiempu ne stale dxiiñaʼ. Ca binni runi dxiiñaʼ layú que primeru ruchuugucabe trigu ne rutópacabe ni. De racá ruchéndacabe ni ti lugar ra naguidxi o laaca biquiiñecabe ti yaga ni rixubiyú chupa yuze para guxuuxecabe ca vaina stiʼ trigu ca ti ganda cueecabe guixi ique ni. Oracaruʼ riguíbicabe trigu ni nuchaʼ rama ne guixi ca para chiné bi ca guixi nuu ique ni. Últimu la? rutiidicabe ni lu ti tela para guia chaahuini.
Cásipeʼ modo gudxi Jesús ca discípulo stiʼ que, zaquepeʼ biʼniʼ Binidxabaʼ: qué liica ñá ca xpinni Cristu ni bibani lu primé siglu que, bininabe laacaʼ ne cayúnirube ni dede yanna (Efe. 6:11). Laanu nánnanu cadi Binidxabaʼ peʼ rutiidiʼ laanu lu ca guendanagana ni ridxaagalunu (Ecl. 9:11). Peru, qué rusaanabe de guyúbibe modo guchéʼnenu Dios ne riquiiñebe stale cosa para gúnibe ni. Casi uquiindebe laanu ucáʼ íquenu gápanu jma bidxichi, quítenu xiixa ni qué riuulaʼdxiʼ Dios, o ucaabe laanu gápanu jnadxiinu. Zándaca iquiiñebe cani rinenu scuela, cani runinenu dxiiñaʼ, o ca binnilídxinu ni qué runi ni na Jiobá para gucaacaʼ laanu gucaʼ íquenu jma scuela o gápanu xiixa dxiiñaʼ ra guni ganarnu stale bidxichi. Laaca zándaca iquiiñebe tuuxa sananda laanu para guchéʼnenu Dios. Ndiʼ nga chupa chonna de ca cosa ni riquiiñeʼ Binidxabaʼ para guniibi dxacha laanu, cásica rúnicabe trigu.
Ximodo zanda chuʼnu naguidxi ora guniibi dxacha xhenemígunu riʼ laanu yaʼ. Nánnanu jma nadipaʼ Binidxabaʼ que laanu, nga runi laasinu qué zanda diʼ gudxíʼlunu laabe. Peru jma nadipaʼ Jiobá que Binidxabaʼ. Nga runi cadi gusaana de guni crenu zanda gacané Dios laanu. Guinábanu laabe gudiibe guendabiaaniʼ ne gacanebe laanu gácanu nadxibalú ti ganda guni huantarnu, ne gúninu guiráʼ ni nabe lu xquendanabáninu. Laabe zudiibe stipa laanu para ganda guni huantarnu guiráʼ ni quixhe Binidxabaʼ nezalunu (Sal. 25:4, 5).
Ora tiidinu lu xiixa guendanagana naquiiñeʼ chuʼnu listu ti gánnanu «uná nga jneza ne uná nga ni cadi jneza» purtiʼ zacatiʼ qué zaguite Binidxabaʼ laanu (Heb. 5:13, 14). Jiobá zacané laanu para ganda quixhe íquenu gúninu ni jneza lu xquendanabáninu. Ne ora maʼ guníʼ íquenu gúninu ni jneza la? cadi gusaana de gúninu ni, neca guidxaagalunu guendanagana. Pa chinándanu ca conseju stiʼ Jiobá la? qué zusaanabe de gacanebe laanu ora maʼ gudixhe íquenu gúninu ni jneza (Efe. 6:10).
Binidxabaʼ zuyubi modo guniibi dxacha laanu casi ñácanu trigu. Peru Jiobá zacané laanu para ganda guni huantarnu ora guniibi dxacha Binidxabaʼ laanu ti cadi gusaana de guni adorarnu laabe (1 Ped. 5:9). Stiidxaʼ Jiobá cayabi laanu: «Cadi ulabi tu binidxabaʼ, stubi stubi zaxele de laatu» (Sant. 4:7).