Bidxélacabe ximodo chécabe

CHONNA hombrehuiiniʼ de África central gudixhe íquecaʼ checaʼ guendaridagulisaa de chonna gubidxa ra maca nexheʼ checaʼ, peru ra chigácani que zitu riaana, biaʼ 90 kilómetru de ralídxicabe. Ximodo gúnicabe para chindácabe raqué yaʼ. Neza chécabe que guizáʼ feu ne napa stale yudé ne qué gápacabe xi lú chécabe. Ngue runi, guníʼ íquecabe quíʼñecabe chonna bicicleta, peru qué nidxéladicabe nin tobi ni gacané laacabe chíndacabe ra chigaca guendaridagulisaa que.

Ora gunna ti binnigola ni nuu ra ridagulisaacabe xi cayácacabe la? guníʼ gutiiñeʼ laacabe ti bicicleta yooxhoʼ huiiniʼ stiʼ, peru rándaruʼ ruxooñeʼ. Ne bisiénebe ca hombrehuiiniʼ que ximodo bíʼninebe xcaadxi xpinni Cristu dxiqué para gunda guyécabe ti guendaridagulisaa de chonna gubidxa. Binnigola riʼ guníʼ zanda iquiiñeʼ guiónnacabe ti bicicleta si. Neca ruluíʼ cadi nagana diʼ ni guniʼbe que la? naquiiñeʼ ganna ca hombre huiiniʼ qué xi gúnicaʼ para checaʼ guiónnacaʼ luni. Ximodo gúnicabe yaʼ.

Para cadi guninapeʼ gubidxa laacabe la? bidxiibacabe ca maleta stícabe lu bicicleta que ne bireecabe siadóʼ guieʼruʼ. Laga zigusá tobi de laacabe bicicleta que la? xhupa que nándacaʼ laabe nagueenda. Ora maʼ bisá tobi de laacabe bicicleta que biaʼ galaa kilómetru la? ruzuhuaadxí ne ruzucá ni cueʼ ti yaga. Peru ruuyaʼ chaahuibe pa cayuuyaʼ xhupa ni zeeda que ni ti cadi tiidiʼ tuuxa guicaa ni. Óraque maʼ laabe rizabe.

Ora maʼ yendá xhupa que ra zucá bicicleta que la? tobi de laacabe riguiʼbaʼ luni ne stobi que maʼ zizá galaa kilómetru, de raqué maʼ laa rusá bicicleta que. Cumu gudixhe ique guionnaʼ xpinni Cristu ca gúnicaʼ zacá la? maʼ qué nizádicabe 90 kilómetru a pie, sínuque 60 si. Ne galanpeʼ bíʼnicabe zaqué purtiʼ gunda guyuunécabe xcaadxi xpinni Cristu lu guendaridagulisaa de chonna gubidxa que ne biziidicabe jma de Dios (Deu. 31:12). Yanna lii yaʼ, ñee zúniluʼ stipa pur cheluʼ guendaridagulisaa de chonna gubidxa ni chigaca iza riʼ ra maʼ nexheʼ cheluʼ la?