Rietenalaʼdxuʼ la?

Ñee biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

• Ximodo zanda guiniʼluʼ «diidxaʼ nayá» ca sin gucá ruaaluʼ o cani dxandíʼ riziidiluʼ de Dios ne cani naguixhe ique guni yaʼ (Sof. 3:9).

Para ganda guiniʼluʼ «diidxaʼ nayá» ca sin gucá ruaaluʼ la? 1) bicaadiaga chaahuiʼ, 2) guníʼ modo riníʼ binni ni riníʼ diidxaʼ ca, 3) bicaa ique guiaananeluʼ ni guiziidiluʼ, casi guiziidiluʼ modo nexheʼ chaahuiʼ lá ca libru zeeda ndaaniʼ Biblia, 4) bietenalaʼdxiʼ cani riziidiluʼ, 5) guníʼ ique ni maʼ biindaluʼ, 6) naquiiñeʼ guʼndaʼ chaahuiluʼ ximodo guiniʼluʼ ni rusiidiʼ Biblia, 7) cadi gusaanaluʼ de guiziidiluʼ, 8) gudixhe ti hora para gúʼndaluʼ, 9) cadi gusaanaluʼ de guiniʼluʼ diidxaʼ nayá ca (15/8, yaza 21-25).

• Ximodo nga zeeda gaca guendaxheelaʼ ca casi ti «doo de chonna xcuaa».

Ti doo de chonna xcuaa ni zeeda gaca guendaxheelaʼ ca nga hombre ca, gunaa ca ne Jiobá, peru Jiobá nga xcuaa ni jma naguidxi ca (Ecl. 4:12). Ora chuʼ ti guendaxheelaʼ tobi si ne Dios la? jma naguidxi riuucabe para guidxagalúcabe intiica guendanagana ne para chúʼcabe nayecheʼ (15/9, yaza 16).

• Xii nga riníʼ ca diidxaʼ «riguixhe ná ca luguiá sti hermanu» ni rieeteʼ lu Hebreos 6:2.

Ruluíʼ si ca diidxaʼ ca cadi caníʼdicani quixhenácabe luguiáʼ binni para gaca binnigola, sínuque para guicaa cani deruʼ caziidiʼ de Cristu espíritu santu ni gacané laacaʼ gúnicaʼ milagru ne guiniʼcaʼ sti diidxaʼ (Hech. 8:14-17; 19:6) (15/9, yaza 32).

• Ximodo zanda gusihuinni ca binnigola nápacaʼ respetu ca xpinni Cristu.

Zusihuínnicabe ni ora cadi guinábacabe ca xpinni Cristu gúnicaʼ xiixa ni cadi cayúnicabe ne ora gusiénecabe laacaʼ xiñee canábacabe gaca xiixa (15/10, yaza 22).

• Xi zanda guiziidiʼ ca binnigola de modo biquiiñeʼ ca pastor israelita vara ni rábicabe cayado que.

Ca pastor ni guyuu Israel dxiqué biquiiñecaʼ ti vara ni nagandxu ique para gápacaʼ dendxuʼ sticaʼ, ne vara ca rábicabe ni cayado. Ora riguucabe o cueecabe ca dendxuʼ ndaaniʼ currá la? rutiidicabe laacame xaʼnaʼ cayado ca para ganda ugábacabe laacame ne gúʼyacabe cadi guiaadxaʼ nin tóbicame (Lev. 27:32). Ca binnigola ca laaca naquiiñeʼ gunibiáʼ chaahuicaʼ ca binni ni zeeda gaca casi dendxuʼ huiiniʼ ni bisaana Dios lu nacaʼ ne gúʼyacaʼ xi caquiiñecabe (15/11, yaza 9).