Rietenalaʼdxuʼ la?
Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:
• Xii ngue caníʼ Dios ora gúdxibe tribu stiʼ Leví: «Naa nga herencia ni raca caber guicaaluʼ».
Guiráʼ ca tribu stiʼ Israel gucuaacaʼ herencia, peru ca levita qué nicaacaʼ nin ti ndaa layú. Jiobá nga herencia stícabe (Núm. 18:20). Neca qué ñápacabe layú, nabé risaca dxiiñaʼ gúpacabe nezalú Dios. Peru bidii Jiobá guiráʼ ni biquiiñecabe para guibánicabe. Zacaca nga yanna, ca xpinni Cristu ni runi dxiiñaʼ para guiroobaʼ xhiiñaʼ Reinu zanda guni crecaʼ zápacaʼ guiráʼ ni caquiiñecaʼ (15/9, yaza 7, 8 ne 13).
• Tuu nga naquiiñeʼ gusiidiʼ ca baʼduhuiiniʼ ca de Dios.
Casi na Biblia, bixhoze ne jñaa ca baʼduhuiiniʼ nga naquiiñeʼ gúnini (Pro. 1:8; Efe. 6:4). Maʼ bihuinni jma ribeendú xiiñiʼ binni stale cosa galán ora rusiidiʼ bixhózecaʼ laacaʼ de Dios (1/10, yaza 6 ne 7).
• Ximodo zanda gusihuínniluʼ runi respetarluʼ xheelaluʼ ora guiníʼneluʼ laa.
Ora guiníʼ xheelatu, «lachuu para ucaa diaga tu, peru cadi nisi undaa ruaa si tu xiixa, ne cadi casi ze tu idxiichi tu» (Sant. 1:19). Binni ni nanna gucaadiaga, rúnini de guidubi ladxidóʼ. Ora maʼ nuutu stúbitu, cadi guiniʼtu diidxaʼ ni guniná xheelatu o ni guchiichi laa. Ora rapasaa ca guendaxheelaʼ respetu la? reeda gaca lídxicaʼ «ti lugar ra guibáni[caʼ] galán» (Rut 1:9) (1/10, yaza 10 ne 11).
• Ñee zanda guiecheʼ Jiobá o guiuubaʼ ladxidóʼ la?
Salmo 78:40 ne 41 rusihuinni ximodo biʼniʼ sentir Jiobá pur caadxi cosa ni biʼniʼ ca israelita dxiqué. Hombre bicaa salmo riʼ guníʼ: «¡Guiráʼ ora qué nuzuubacabe stiidxabe lu desiertu que[!]». Ne guníʼrube: «Qué nusaanacabe de nucheenécabe Dios». Nga runi, lugar de quixhe íquenu gúninu ni cadi jneza, ne guninanu ladxidóʼ Dios la? jma galán gúninu ni jneza ne gusiéchenu ladxidoʼbe (1/10, yaza 27).
• Xi zacané ti xpinni Cristu para ganna pa zabeendú ni galán lu xiixa ni chiguni para chuʼ nayecheʼ o pa coʼ.
Para gánnanu pa jneza xiixa ni chigúninu ne pa ziuulaʼdxiʼ Dios ni la? galán guinabadiidxanu laca laanu: Xi zanda gúninu, pabiáʼ tiempu zaquiiñenu ne tu chinenu (15/10, yaza 9 dede 12).
• Xiñee gudxi Pablu ca xpinni Cristu guiaanacaʼ sin guichaganacaʼ.
Lu ca diidxaʼ ni gudxi Pablu ca xpinni Cristu de Corinto, bisihuínnibe xi guiráʼ zanda guni ti binni ni caʼruʼ guichaganáʼ lu xhiiñaʼ Dios (1 Cor. 7:8). Ora ridúʼndanu capítulo 13 dede 20 stiʼ Hechos, ridúʼyanu guiráʼ ni biʼniʼ Pablu lu xhiiñaʼ Dios: guzanebe xcaadxi misioneru, guyebe stale lugar ra qué huareeche diidxaʼ ne gucanebe para bizulú neza binni ridagulisaa ndaaniʼ stale guidxi. Dxi bíʼnibe xhiiñaʼ Dios bidxaagalube stale guendanagana ni zándaca qué huayuu dxi guidxaagalunu (2 Cor. 11:23-27, 32, 33). Qué ñanda diʼ ñúnibe guiráʼ nga pa ñápabe xheelabe ne xiiñibe (15/10, yaza 13 dede 15).
• Ximodo racané relatu ni zeeda lu Proverbios 7:6-23 laanu para cadi guidúʼyanu idxa guidxa, o cosa dxabaʼ.
Ca versículo riʼ ruzeetecani de ti hombrehuiiniʼ ni canazá neza ra nabeza ti gunaa ni rizá zacasi, peru maca nánnabe nabeza gunaa riʼ raqué. Despué bicuudxi gunaa que laabe chuʼbe ralidxi. Yanna riʼ laaca cadi jneza diʼ nga chuʼnu lu xiixa yaza stiʼ Internet ni gucaa laanu guiníʼ íquenu cosa ni cadi jneza. Galán guinábanu Dios gacané laanu ante guidúʼyanu xiixa dibuju o foto de laacani (15/11, yaza 9 ne 10).
• Xi rizíʼdinu de ejemplu stiʼ hombre ni yenduu biní que.
Lu ejemplu guníʼ Jesús ca rizíʼdinu maʼ qué zúninu xhiiñaʼ Jiobá né stale gana, pa chuʼnu xizaa pur modo guibáninu «ndaani guidxilayú riʼ» ne pa gudiʼnu «lugar quite bidxichi» íquenu (Mat. 13:22). Xi zacané laanu para cadi guiábanu lu trampa ca yaʼ. Chuʼnu nayecheʼ né ni caquiiñesinu ti guibáninu casi ni canazá xquidxi binni ndaaniʼ guidxilayú malu riʼ (15/11, yaza 20).