Ni Rinabadiidxaʼ Cani Ruundaʼ
Ñee cusiene ca diidxaʼ ni guníʼ David ni zeeda lu Salmo 37:25 ne ni guníʼ Jesús ni zeeda lu Mateo 6:33 qué ziuu dxi gudii Jiobá lugar guiaadxaʼ guendaró ca xpinni Cristu la?
David bicaa: «Dxiqué nahuiineʼ, ne yanna maʼ biooxhuaʼ, peru qué huayuuyaʼ guirutiʼ ni runi ni jneza guiaana zacasi, ne nin qué huayuuyaʼ ca xiiñibe cananabaʼ pan» (Sal. 37:25). Nanna dxíchibe qué nusaana Jiobá de ñapa laabe ne ngaca nga runi Dios ca xpinni. Peru ca diidxaʼ ca qué riníʼcani qué ziuu dxi guiaadxaʼ xiixa ca xpinni Jiobá.
Guyuu ora David peʼ bidxagalú guendanagana. Tobi de laacani nga dxi canaguxooñelube de Saúl. Cumu maʼ zirá guendaró zinécabe la? gunábabe pan para laabe ne para ca xpínnibe (1 Sam. 21:1-6). Ngue runi, cumu qué guidxélabe xi gúnibe la? gupa xidé gunábabe pan. Peru bidiibe cuenta qué nusaana Jiobá laabe. Nin ti textu stiʼ Biblia qué rieeteʼ guzabe gunábabe ni gobe.
Lu Mateo 6:33 casi na Traducción del Nuevo Mundo de las Santas Escrituras guníʼ Jesús zudii Dios ni caquiiñeʼ cani guni ni na Reinu primé lu xquendanabánicaʼ. Jesús guníʼ: «Cadi gusaanatu de guyúbitu primeru reinu stiʼ Dios ne gúnitu ni jneza ni rinabaʼ Dios laatu, ne qué ziaadxaʼ laatu xcaadxi cosa [casi ni gó binni, ni gueʼ, ni gacu] ni caquiiñetu». Peru laaca guniʼbe zándaca gueeda guiaadxaʼ ni gó ca «hermanu» stibe pur sanándacabe laacaʼ (Mat. 25:35, 37, 40). Ne zacá nga bizaaca apóstol Pablu; guyuu biaje biaadxaʼ ni gó ne biaadxaʼ nisa gueʼ (2 Cor. 11:27).
Jiobá cayabi laanu zazanándacabe laanu de gadxé gadxé modo. Zándaca gudiibe lugar guiaadxaʼ xiixa laanu laga gusihuínninu rusiguii Binidxabaʼ (Job 2:3-5). Guiníʼ íquenu de ca hermanu ni guyuu ndaaniʼ campu de concentración dxi biʼniʼ mandar ca nazi. Qué nudii ca nazi laacabe ni gócabe ne nga nga ti modo biquiiñeʼ Binidxabaʼ para nucheenécabe Dios. Qué nusaana ca Testigu de nuzuubacaʼ stiidxaʼ Jiobá, ne Jiobá qué nusaana laacabe. Dxandíʼ, bidii Jiobá lugar tiidicabe guendanagana que, cásica rudiibe lugar guidxaagalú ca xpinni Cristu gadxé gadxé guendanagana. Peru nanna dxíchinu zacané Jiobá guiráʼ cani cayacaná pur laabe ti ganda guni huantarcaʼ (1 Cor. 10:13). Naquiiñeʼ guietenaláʼdxinu ca diidxaʼ ni cá lu Filipenses 1:29, ra na: «Dichoso de laatu purti cadi cayuni cre si tu Cristu, sínuque ne cayacaná tu pur laa».
Jiobá maʼ guníʼ qué zusaana ca xpinni. Lu Isaías 54:17 ridúʼndanu: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ». Ni na ca diidxaʼ riʼ ne xcaadxi textu stiʼ Biblia rusihuínnicani zapa Dios xquidxi. Peru ti xpinni Cristu zándaca guidxaagalú guendanagana o dede zándaca gatiʼ.