Ni rinabadiidxaʼ ca ni ruundaʼ

Ora gudxi Binidxabaʼ Eva qué zati pa gó cuananaxhi stiʼ yaga stiʼ guendananna ni jneza ne ni cadi jneza, ¿ñee cayábibe laa de ti alma ni qué rati, casi runi cré stale binni yanna la?

Ruluíʼ coʼ. Ora gudxi Binidxabaʼ Eva gó cuananaxhi ni gudxi Dios laa cadi gó que, cadi cayábibe laa zati cuerpu stiʼ peru zabani alma stiʼ sti lugar. Biquiiñeʼ Binidxabaʼ ti beendaʼ para gudxi Eva qué zati. Casi ñaca gúdxibe Eva qué zati ne zapa ti guendanabani guizáʼ galán lu Guidxilayú sin gacané Dios laa (Gén. 2:17; 3:3-5).

¿Ñee ndaaniʼ jardín de Edén nga biasastí creencia falsu ni ná napa binni ti alma ni qué rati la? Qué gánnanu. Ni nánnanu nga binitilú religión falsu dxi guca Diluvio ca dxi bibani Noé. Cumu Noé ne familia stiʼ si nga ni bilá, ne nácacaʼ xpinni Dios la? binitilú guiráʼ ca ni rusiidiʼ religión falsu.

Nga runi, zándaca biasastí creencia falsu ni ná napa binni ti alma ni qué rati despué de Diluvio. Dxi bichaa Jehová diidxaʼ riníʼ ca binni de Babel bireechecaʼ lu guidubi Guidxilayú ne yenécabe creencia riʼ neza zécabe (Gén. 11:8, 9). Nga runi, qué gánnanu padxí peʼ biasastí creencia falsu riʼ. Ni nánnanu nga Binidxabaʼ «nga bixhoze guiráʼ ni rusiguii» ne laa nga napa donda ne biéchebe purtiʼ bireeche creencia falsu riʼ lu guidubi Guidxilayú (Juan 8:44).