«Bizíʼdidu idxagaludu binni ni zeeda de sti ladu»
Zacá guníʼ tobi de ca binni de catorse guidxi ni guyé ra guca ca guendaridagulisaa stiʼ stale guidxi (asamblea internacional) lu beeu nobiembre 2003; Guidxi Méjicu, Monterrey ne Puebla. Zanda guininu de que ca guendaridagulisaa riʼ la? qué liica ziaandaʼ cani lu historia stiʼ ca testigu stiʼ Jiobá de Méjicu. Bizulú guluucabe guiráʼ ni listu diesiocho beeu ante. Ra maʼ ziugaanda dxi gaca cani la? ca bíchinu jma bíʼnicabe dxiiñaʼ ndaaniʼ guionnaʼ guidxi ca. Gulaquichaahuicabe ca dxiiñaʼ ni guni guiráʼ xixé boluntariu, ne ra ridoo boletu, dede ne Betel.
Stale de ca bíchinu ne bizánanu ni bidxiña ca lugar ra maʼ cabézacabe laacaʼ riʼ la? qué ñanda nucueezacaʼ laacaʼ, biinacaʼ de guendanayecheʼ ra biiyacaʼ xquidxi Jiobá nuu tobi si ora zidíʼdicabe lade ca bíchinu ne bizánanu ni nuucaʼ nayecheʼ zuhuaacaʼ pur fila cadxagalucaʼ laacabe ne diidxaʼ riuundaʼ ne dede cagapanacaʼ. Ti bizánanu ni zeeda de sti guidxi guníʼ sicaríʼ: «Riníʼ iqueʼ de que sicaríʼ nga zaca guendanayecheʼ ni ziuu ora guiasa ca gueʼtuʼ ca; biiyaʼ jma de ni gulezaʼ ñuuyaʼ».
Biluxe si ca guendaridagulisaa que la? bigaanda ora maʼ chibiicabe, biniibi ni ladxidóʼcabe cásica ndaaniʼ estadiu que ne zaqueca ra nuu ca binni ridagulisaa ra biaanacabe. Stale de ca semana que guyuu stale carta Betel, carta stiʼ ca testigu de sti guidxi, ne stiʼ ca bíchinu ne bizánanu ni cayúnicaʼ dxiiñaʼ sti Betel ni beeda gánnacaʼ laanu. Biaʼsi ndaaniʼ guionnaʼ guidxi que bidaagulisaa 198.368, ne guyuunisa 2.656.
Nannadxíchinu de que Jiobá nga gulaquistí guendaridxagayaa ni guca riʼ, cásica para cani beeda ganna riʼ ne zaqueca para guiráʼ xixé bíchinu ne bizánanu ni gucané lu guiráʼ dxiiñaʼ ra guca saa para gaca adorar Jiobá.