Biʼniʼ ni na Jiobá ne endanayecheʼ
1 Nagana nga ibani binni nayecheʼ pur iráʼ endanagana ni nuu ndaaniʼ idxilayú riʼ. Nécapeʼ rándaruʼ riuu binni nayecheʼ ora guʼyaʼ ti lugar galán, gó ti endaró nanixe, idxaaga ca xhamigu o iziilaʼdxiʼ chaahuiʼ la? zanda irá cani nagueenda ora maʼ nuu binni triste, ora maʼ qué gapa bueltu, ora maʼ huará, ora maʼ nagola, ora cadiʼdiʼ binnilídxiluʼ endanagana, ora nuu stubi o pur ca endanagana ni rapa binni ora nahuiiniruʼ. Ximodo zanda chuʼ cani zinanda Cristu nayecheʼ ora gúnicaʼ ni na Jiobá neca nuu ca endanagana ca yaʼ.
2 Ora idxagalunu endanagana. Dios maca udixhená laanu ne Stiidxaʼ, de que ca dxi riʼ zaca cani «jma nagana [...] ora mayaca izaa xhi guidxilayú», ne Jesús uníʼ cadi «nisi icá ique tu ni ricá ique binni ni qué runibiáʼ Dios» (2 Tim. 3:1; Luc. 21:34). Peru, Jiobá ne Xiiñiʼ cadi cayábisicaʼ laanu xi chigaca yanna, sínuque laaca uníʼcabe de que zacanécabe laanu ora tiidinu ra nagana (Sal. 55:22; Mat. 11:29). Ñee ñanda nidxélanu stobi tu ñuni crenu laa de idubi ladxidoʼno la?
3 Pa lii huaraluʼ, cadíʼdiluʼ lu ca endananá stiʼ endanayooxhoʼ, nuuluʼ stúbiluʼ, qué gapu bueltu o cayuni huantarluʼ ca endanagana ni napa binnilídxiluʼ la? cadi udiiluʼ lugar chuʼ ladxidoʼloʼ triste. Biyúbiruʼ ximodo chuʼluʼ nayecheʼ. Ñee zanda la? Cumu Jiobá zabee iráʼ endananá ni nuu yanna riʼ la? nannadxíchinu de que intiisi endanagana gápanu zidiʼdiʼ si cani purtiʼ «maʼ xcaadxi si tiempu» cayaadxaʼ ne cani nadóʼ, ni rúnicaʼ ni na Jiobá ne endanayecheʼ, «zadxélacaʼ stale guendanayecheʼ purtiʼ ziuu stale guendariuudxi» (Apo. 21:4; Sal. 37:10, 11). Lu idxilayú cubi ca la? iráʼ cosa ni maʼ udiʼdiʼ ca maʼ qué zietenalaʼdxiʼ diʼ binni cani, ne maʼ qué zaguiʼbaʼ diʼ cani ladxidóʼcabe (Isa. 65:17).
4 Ora nahuiiniʼ binni. Pa nahuiiniluʼ o jma maʼ caniisiluʼ, ximodo zanda chuʼluʼ nayecheʼ ora guʼnuʼ ni na Jiobá yaʼ. Ora binni riulaʼdxiʼ ni napa o ni runi la? riuu nayecheʼ. Cumu «ni galán stiʼ cani nahuiiniʼ ca nga stipa sticaʼ» la? Biblia cayabi lii chuʼluʼ nayecheʼ laga nahuiiniluʼ ne cayabi lii: «guzá lu ca neza na ladxidoʼloʼ ne lu cani guʼyaʼ luluʼ» ya, ni cayabi ni lii nga, cuʼ bialuʼ iráʼ ni ruʼnuʼ ne cadi guʼnuʼ iráʼ ni racaláʼdxiluʼ (Pro. 20:29; Ecl. 11:9). Nga runi, «bietenalaʼdxiʼ, yanna, de [Dios] ni jma Naróʼ ni Bizáʼ lii, ca dxi nahuiiniluʼ, ante gueeda ca dxi nagana ca, o ugaandaluʼ ca iza ra guiniʼluʼ: “maʼ qué riéchediaʼ lu cani”» (Ecl. 12:1).
5 Stale de cani nahuiiniʼ la? rizanírucaʼ lu endarucheeche diidxaʼ, ne nga racané laacabe ti ganda gúnicabe jma xhiiñaʼ Jiobá casi pa chécabe Scuela ra Riziidicabe Gúnicabe Xhiiñaʼ Dios (Escuela de Entrenamiento Ministerial) o Betel. Xcaadxi la? caziidicaʼ ca diidxaʼ stiʼ sti guidxi o sti diidxaʼ ni riníʼcabe Méjicu o seña ti ganda gúnicaʼ jma lu xhiiñaʼ Jiobá. Zacá riuucabe nayecheʼ ra iquiiñecabe endabiaaniʼ stícabe ne ni nánnacabe gúnicabe para uyúbicabe cani riulaʼdxiʼ iziidiʼ ne acanécabe laacaʼ sacaʼ lu neza ni dxandíʼ ca. Pa lii qué usaanuʼ de iquiiñeluʼ ca stipa stiluʼ para guʼnuʼ ni na Jiobá la? Biblia cayabi lii: «Zacá la? zadxeʼluʼ stale guendanayecheʼ ra nuu Jiobá» (Isa. 58:14).
6 Nga runi, neca nuuluʼ ra nagana cadi usaana de ucheecheluʼ ca diidxaʼ nacubi ne galán stiʼ Reinu, biaʼ ganda gúniluʼ. Laacani nga ca diidxaʼ ni rudii endanabani ni qué zaluxe ne ni rudii endanayecheʼ ni dxandipeʼ, ne nánnaluʼ de que cadi pur gana si cayúniluʼ xhiiñaʼ Señor purtiʼ laabe zuxhale ndágabe ca puertaʼ stiʼ ibáʼ ne zundaatebe ndaayaʼ stibe luguialuʼ dede qué ziuu dxi iráʼ cani (1 Cor. 15:58; Mal. 3:10). Biʼniʼ cré Jiobá de idubi ladxidoʼloʼ ne biʼniʼ ni nabe ne stale endanayecheʼ, ne laabe zudiibe lii iráʼ ni inabaʼ ladxidoʼloʼ (Sal. 37:4).