9 ndaa: Ximodo acanenu cani cayúʼndanenu ti iníʼnecaʼ binni ratiica si nuucaʼ
Gúʼndanenu binni modo ganda iniisi jma lu Stiidxaʼ Dios
1 Ora gunna Andrés ne Felipe Jesús nga Mesías ni chigueeda que la? qué ñaanadxicaʼ de niniʼcaʼ ni; oraqueca bizulú caníʼcabe maʼ bidxélacabe Mesías, o Cristu (Juan 1:40-45). Yanna riʼ laaca zacá ni: ora ca binni ni ruundaʼ Biblia gápacaʼ fe lu ni caziidicaʼ la? nga rucaa laacabe iníʼcabe de laani (2 Cor. 4:13). Ximodo zanda uguʼnu gana cani cayúʼndanenu ti ucheechecaʼ diidxaʼ ratiica si nuucaʼ ne usíʼdinu laacabe gúnicabe ni jneza yaʼ.
2 Unabadiidxaʼ ni cayuundaneluʼ ca pa huaníʼnebe tuuxa de ni caziidibe lu Biblia. Zándaca guni invitarbe ca xhamígube o tuuxa binnilídxibe ora chiguundaneluʼ laabe. Unabadiidxaʼ laabe pa nuu tuuxa ni runinebe dxiiñaʼ, ni rinebe scuela o xcaadxi binni runibiaʼbe ni riuláʼdxicaʼ iziidicaʼ de ca diidxaʼ nacubi ne galán riʼ. Gudxi laabe zacá nga zanda uzulú ucheechebe diidxaʼ. Ucané laabe gánnabe ximodo iníʼnebe binni ti cadi uchiichibe laa, gápabe respetu ne iníʼnebe laa diidxaʼ nadóʼ ora usiidibe de Jiobá ne cani chiguni (Col. 4:6; 2 Tim. 2:24, 25).
3 Usiidibe cani runi crebe. Risácapeʼ nga usíʼdinu cani cayúʼndanenu iquiiñecaʼ Stiidxaʼ Dios ora chigusiidicaʼ ni runi crecaʼ. Ulí cani jma naquiiñeʼ gánnabe ora maʼ cayuundaneluʼ laabe ne, unabadiidxaʼ laabe: «Ximodo nusiéneluʼ binnilídxiluʼ cani cusiidiʼ Biblia» o «Xi textu niquiiñeluʼ para nuluiʼluʼ ti xhamíguluʼ de que dxandíʼ nga ni cayaʼbuʼ laa». Biiyaʼ ximodo ricábibe ne bisiidiʼ laabe iquiiñebe Biblia ora usiénebe xiixa (2 Tim. 2:15). Zacá zacaneluʼ laabe chuʼbe listu ora iníʼnebe binni ratiica nuube, ne ora maʼ rúnibe cani na Jiobá la? zanda chigucheechebe diidxaʼ ne ca binni ridagulisaa.
4 Galanpeʼ nga usíʼdinu laacabe ti chúʼcabe listu ora ucaalú binni laacabe pur ni caziidicabe (Mat. 10:36; Luc. 8:13; 2 Tim. 3:12). Laacabe riquiiñeʼ ácacabe nagueenda ora chuʼ tuuxa inabadiidxaʼ laacabe de ni caziidicabe o gunadiágacabe uzeeteʼ tuuxa de ca testigu stiʼ Jiobá. Folletu Los testigos de Jehová: ¿quiénes son y qué creen? zacaneni laacabe gatanácabe para icábicabe cani racalaʼdxiʼ ganna xii nga ni runi crécabe (1 Ped. 3:15). Folletu ca zacaneni cani cayúʼndanenu gánnacaʼ usiene chaahuicaʼ dxiiñaʼ ni rúninu ne cani runi crenu ni zeeda lu Biblia. Zanda usiénecabe ni ca xhamígucabe ne tuuxa binnilídxicabe ni dxandíʼ racalaʼdxiʼ iziidiʼ.