Ucheechenu Stiidxaʼ Dios pur modo laanu
1 Stale de cani bizáʼ Jiobá neca qué riníʼ cani peru rusihuinni cani ca guenda ni qué rihuinni stibe (Sal. 19:1-3; Rom. 1:20). Zaqueca nga laanu, laaca rusíʼdinu binni de Dios pur modo xpiaʼnu, ra usihuínninu ca guenda stiʼ ca xpinni Cristu ne pur modo cuáquinu lari (1 Ped. 2:12; 3:1-4). Iranu naquiiñeʼ usihuínninu pur modo laanu ne pur iráʼ ni rúninu pabiáʼ sicarú nga iráʼ ni rusiidiʼ Dios stinu ni bilá laanu (Tito 2:10).
2 Neca binni ruchee laanu, xi zanda gúninu ti acanenu binni chulaʼdxiʼ cani rusiidiʼ Biblia yaʼ. Udiʼnu lugar Biblia, Stiidxaʼ Dios, gabi laanu xi naquiiñeʼ gúninu ne acané espíritu santu laanu (Sal. 119:105; 143:10). Stiidxaʼ Dios ca «rudii[ni] enda nabani laanu, ne nandxóʼ ni. Jma naduxhu ni que ti puñal ni naduxhu iropa laadu» (Heb. 4:12). Riaazini ndaaniʼ ladxidoʼno ne racaneni laanu uchaʼnu modo laanu (Col. 3:9, 10). Ne espíritu santu ca laaca racané laanu ácanu binni ni qué rixhacalaʼdxiʼ stobi, ácanu nachaʼhuiʼ, nadóʼ ne ni rapa xpiáʼ (Gál. 5:22, 23). Ñee iranu rudiʼnu lugar Stiidxaʼ Dios ne espíritu santu stibe chuʼ lu endanabani stinu ne ucaani laanu gúninu ca ndiʼ la? (Efe. 4:30; 1 Tes. 2:13.)
3 Xcaadxi binni rudii cuenta. Ora nabáninu modo na Jiobá ne rúninu stipa pur usihuínninu ni lu xquendanabáninu la? xcaadxi binni rudii cuenta. Zacá bizaaca ti hombre ni nabé rugaanda cani runiné dxiiñaʼ laa purtiʼ nachucu. Ti baʼdudxaapaʼ Testigu ni biʼniʼ dxiiñaʼ ra nuube que nabé gupa respetu laabe. Ni bíʼyabe de baʼdudxaapaʼ riʼ bicaani laabe inabadiidxabe laa xiñee maʼ gadxé laa. Baʼdudxaapaʼ riʼ gúdxibe hombre que runi respetarbe laa purtiʼ rúnibe iráʼ ni caziidibe de lu Biblia. Laaca gúdxibe laa ni chiguni Reinu stiʼ Dios. Hombre que bizulú biindaʼ Biblia ne qué nindaa diʼ uyuunisa. Dxi bibiguetaʼ hombre riʼ xquidxi la? ca binnilídxibe biiyacaʼ maʼ bichaabe modo nácabe ne ngue bicaa laacaʼ chuláʼdxicaʼ iziidicaʼ Stiidxaʼ Dios.
4 Ratiica nuunu, ra dxiiñaʼ, ra scuela, ora caninenu ca binnilídxinu o ca xpesínunu, zanda ucaʼnu binni usisaca Dios ora gúʼyacaʼ nayá xpiaʼnu, cásica rúninu ni ora maʼ ziucheechenu diidxaʼ (Mat. 5:16).